{"id":198109,"date":"2026-05-25T09:54:33","date_gmt":"2026-05-25T02:54:33","guid":{"rendered":"https:\/\/opendevelopmentcambodia.net\/?p=198109"},"modified":"2026-05-25T10:00:43","modified_gmt":"2026-05-25T03:00:43","slug":"strengthening-public-access-to-environmental-impact-assessment-eia-in-cambodia","status":"publish","type":"post","link":"https:\/\/opendevelopmentcambodia.net\/km\/strengthening-public-access-to-environmental-impact-assessment-eia-in-cambodia\/","title":{"rendered":"\u1780\u17b6\u179a\u200b\u1796\u1784\u17d2\u179a\u17b9\u1784\u200b\u1780\u17b6\u179a\u200b\u1791\u1791\u17bd\u179b\u200b\u1794\u17b6\u1793\u200b\u1796\u17d0\u178f\u17cc\u1798\u17b6\u1793\u200b\u179f\u17d2\u178f\u17b8\u200b\u1796\u17b8\u200b\u1780\u17b6\u179a\u200b\u179c\u17b6\u1799\u178f\u1798\u17d2\u179b\u17c3\u200b\u17a0\u17c1\u178f\u17bb\u200b\u1794\u17c9\u17c7\u1796\u17b6\u179b\u17cb\u200b\u1794\u179a\u17b7\u179f\u17d2\u1790\u17b6\u1793\u200b (EIA)\u200b \u1787\u17b6\u200b\u179f\u17b6\u1792\u17b6\u179a\u178e\u17c8\u200b\u1793\u17c5\u200b\u1780\u1798\u17d2\u1796\u17bb\u1787\u17b6\u200b"},"content":{"rendered":"\n

ទោះបីជាកម្ពុជាកំពុងមានកំណើននៃគម្រោងវិនិយោគ និងហេដ្ឋារចនាសម្ព័ន្ធខ្នាតធំនៅទូទាំងប្រទេសក៏ដោយ ការទទួលបានព័ត៌មានស្តីពីការវាយតម្លៃហេតុប៉ះពាល់បរិស្ថាន (EIA) នៅតែមានកម្រិតសម្រាប់សហគមន៍ និងភាគីពាក់ព័ន្ធជាច្រើន។ ដើម្បីគាំទ្រដល់តម្លាភាព និងលើកកម្ពស់ការទទួលបានព័ត៌មានបរិស្ថានជាសាធារណៈ អង្គការទិន្នន័យអំពីការអភិវឌ្ឍ (អូឌីស៊ី)<\/a> បានធ្វើបទបង្ហាញអំពីព័ត៌មានទិន្នន័យស្តីពីការវាយតម្លៃហេតុប៉ះពាល់បរិស្ថាន ក្នុងសិក្ខាសាលាពិគ្រោះយោបល់ជាមួយភាគីពាក់ព័ន្ធ ស្តីពីការពិនិត្យវិធីសាស្ត្រការវាយតម្លៃហេតុប៉ះពាល់បរិស្ថាន និងសង្គមសម្រាប់ការវិនិយោគរបស់ចិននៅកម្ពុជា។<\/p>

នៅថ្ងៃទី៧ ខែឧសភា ឆ្នាំ២០២៦ អង្គការវេទិកានៃអង្គការមិនមែនរដ្ឋាភិបាលស្តីពីកម្ពុជា (NGOF) បានរៀបចំសិក្ខាសាលាពិគ្រោះយោបល់ជាមួយភាគីពាក់ព័ន្ធរយៈពេលកន្លះថ្ងៃ ពីការពិនិត្យវិធីសាស្ត្រការវាយតម្លៃហេតុប៉ះពាល់បរិស្ថាន និងសង្គម សម្រាប់ការវិនិយោគរបស់ចិននៅកម្ពុជា ក្រោមប្រធានបទ “ប្រសិទ្ធភាព និងការចូលរួមចំណែកនៃគម្រោងវិនិយោគរបស់ចិនដល់សេដ្ឋកិច្ចកម្ពុជា”។ កម្មវិធីនេះមានការចូលរួមពីអ្នកចូលរួមប្រមាណ ៦០នាក់ មកពីស្ថាប័នរដ្ឋ ស្ថានទូតចិន ដៃគូអភិវឌ្ឍន៍ វិស័យឯកជន អង្គការសង្គមស៊ីវិល ប្រព័ន្ធផ្សព្វផ្សាយ អ្នកស្រាវជ្រាវ សហគមន៍ និងយុវជន។<\/p>

សិក្ខាសាលានេះបានក្លាយជាវេទិកាសម្រាប់ភាគីពាក់ព័ន្ធក្នុងការពិភាក្សាអំពីវិមាត្របរិស្ថាន និងសង្គមនៃគម្រោងវិនិយោគរបស់ចិននៅកម្ពុជា ព្រមទាំងផ្តល់ធាតុចូលដើម្បីពង្រឹងវិធីសាស្ត្រការវាយតម្លៃហេតុប៉ះពាល់បរិស្ថាន និងសង្គម ឱ្យកាន់តែសមស្របទៅនឹងបរិបទជាក់ស្តែង ក្របខណ្ឌបទប្បញ្ញត្តិ និងកង្វល់របស់សហគមន៍។ កិច្ចពិភាក្សាក្នុងអំឡុងពេលកម្មវិធីក៏បានលើកឡើងពីសារៈសំខាន់នៃការចូលរួមជាសាធារណៈប្រកបដោយបរិយាបន្ន ជាពិសេសសម្រាប់ស្ត្រី ជនជាតិដើមភាគតិច និងសហគមន៍ដែលរស់នៅតំបន់ដាច់ស្រយាល ដែលជាក្រុមអាចទទួលរងផលប៉ះពាល់ដោយផ្ទាល់ពីគម្រោងអភិវឌ្ឍន៍។<\/p>

ក្នុងអំឡុងសិក្ខាសាលា អូឌីស៊ី បានបង្ហាញ និងណែនាំអំពីព័ត៌មានទិន្នន័យស្តីពីការវាយតម្លៃហេតុប៉ះពាល់បរិស្ថាន<\/a>របស់ខ្លួន ដែលជាវេទិកាទិន្នន័យបើកទូលាយ សម្រាប់ផ្តល់ការចូលប្រើជាសាធារណៈទៅកាន់របាយការណ៍វាយតម្លៃហេតុប៉ះពាល់បរិស្ថាន និងព័ត៌មានពាក់ព័ន្ធនឹងបរិស្ថាននៅកម្ពុជា។ ទំព័រនេះអនុញ្ញាតឱ្យអ្នកប្រើប្រាស់អាចស្វែងរក និងច្រោះរបាយការណ៍តាមខេត្ត វិស័យ និងពាក្យគន្លឹះផ្សេងៗ ដែលធ្វើឱ្យព័ត៌មានកាន់តែងាយស្រួលក្នុងការចូលប្រើសម្រាប់សហគមន៍ អ្នកស្រាវជ្រាវ អ្នកសារព័ត៌មាន អង្គការសង្គមស៊ីវិល និស្សិត និងភាគីពាក់ព័ន្ធផ្សេងៗទៀត។<\/p>

$\"\"$ <\/a><\/p>

បន្ថែមពីលើការដាក់ឱ្យចូលប្រើរបាយការណ៍វាយតម្លៃហេតុប៉ះពាល់បរិស្ថាន ទំព័រនេះក៏ផ្តល់នូវទិដ្ឋភាពទូទៅអំពីដំណើរការវាយតម្លៃហេតុប៉ះពាល់បរិស្ថាន និងក្របខណ្ឌច្បាប់ពាក់ព័ន្ធនៅកម្ពុជា<\/a> ដើម្បីគាំទ្រដល់ការយល់ដឹងរបស់សាធារណជនអំពីអភិបាលកិច្ចបរិស្ថាន និងនីតិវិធីវាយតម្លៃហេតុប៉ះពាល់។ ទិន្នន័យការវាយតម្លៃហេតុប៉ះពាល់បរិស្ថាននីមួយៗក៏មានព័ត៌មានសង្ខេបអំពីគម្រោង ដើម្បីជួយឱ្យអ្នកប្រើប្រាស់អាចយល់បានយ៉ាងឆាប់រហ័សអំពីចំណុចសំខាន់ៗនៃគម្រោងអភិវឌ្ឍន៍នីមួយៗ ព្រមទាំងអាចចូលប្រើពង្រាងរបាយការណ៍វាយតម្លៃហេតុប៉ះពាល់បរិស្ថានដោយសេរី និងគ្មានការរឹតបន្តឹង។<\/p>

បច្ចុប្បន្ន គេហទំព័ររបស់អូឌីស៊ី មាន របាយការណ៍ការវាយតម្លៃហេតុប៉ះពាល់បរិស្ថាន<\/a>ចំនួន ៣៨ ដែលគ្របដណ្តប់លើវិស័យ និងគម្រោងវិនិយោគផ្សេងៗនៅទូទាំងប្រទេសកម្ពុជា។ តាមរយៈគំនិតផ្តួចផ្តើមនេះ អូឌីស៊ីមានគោលបំណងពង្រឹងលទ្ធភាពទទួលបានទិន្នន័យបរិស្ថាន និងលើកកម្ពស់តម្លាភាព គណនេយ្យភាព និងការចូលរួមជាសាធារណៈប្រកបដោយព័ត៌មានគ្រប់គ្រាន់ ក្នុងដំណើរការសម្រេចចិត្តពាក់ព័ន្ធនឹងការអភិវឌ្ឍ និងការវិនិយោគ។<\/p>

$\"\"$ <\/a><\/p>

អូឌីស៊ីក៏បានសង្កត់ធ្ងន់ពីសារៈសំខាន់នៃកិច្ចសហការរវាងស្ថាប័នរដ្ឋ អង្គការសង្គមស៊ីវិល ដៃគូអភិវឌ្ឍន៍ អ្នកស្រាវជ្រាវ និងវិស័យឯកជន ក្នុងការលើកកម្ពស់ការអនុវត្តទិន្នន័យបើកទូលាយ និងពង្រឹងតម្លាភាពលើព័ត៌មានពាក់ព័ន្ធនឹងបរិស្ថាន និងការវិនិយោគនៅកម្ពុជា។<\/p>