គ.ជ.ប.បង្ហាញបញ្ជីឈ្មោះអ្នកបោះឆ្នោតបណ្ដោះអាសន្នឆ្នាំ២០១៣
គណៈកម្មាធិការជាតិរៀបចំការបោះឆ្នោត (គ.ជ.ប) បានបង្ហាញលទ្ធផលបណ្ដោះអាសន្ននៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៣។ មន្ត្រីឃ្លាំមើលការបោះឆ្នោត រិះគន់ចំពោះប្រព័ន្ធចុះឈ្មោះបោះឆ្នោតដែលរៀបចំឡើងដោយ គ.ជ.ប និងស្នើសុំឲ្យមានការកែប្រែ ទើបអាចធានាចំពោះការចុះឈ្មោះ និងពិនិត្យឈ្មោះបោះឆ្នោតមានភាពត្រឹមត្រូវ។
ពលរដ្ឋអាយុ ១៨ឆ្នាំឡើងទៅចំនួនជាង ៦ម៉ឺន ៨ពាន់នាក់ (៦៨.៦៨២នាក់) បានទៅចុះឈ្មោះបោះឆ្នោតថ្មី ចាប់ពីថ្ងៃទី១ ដល់ថ្ងៃទី១១ ខែតុលា។
លទ្ធផលបណ្ដោះអាសន្ននៃការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១៣ ចេញដោយ គ.ជ.ប នៅថ្ងៃទី១២ ខែតុលា បង្ហាញថា នៅរាជធានីខេត្តទាំង២៤ គ.ជ.ប បានកែតម្រូវឈ្មោះក្នុងបញ្ជីឆ្នោតចំនួនជាង ៦ពាន់នាក់ (៦.៣៩៤នាក់) និងបានលុបឈ្មោះក្នុងបញ្ជីឆ្នោតចំនួនជាង ២ម៉ឺន ២ពាន់នាក់ (២២.២៧៨នាក់)។
អគ្គលេខាធិការ គ.ជ.ប លោក ទេព នីថា ពន្យល់ថា ការចុះឈ្មោះអ្នកបោះឆ្នោតថ្មី ការលុបឈ្មោះ និងការកែតម្រូវឈ្មោះក្នុងបញ្ជីបោះឆ្នោត ជាការធ្វើបច្ចុប្បន្នភាពបញ្ជីបោះឆ្នោតដែលត្រូវធ្វើឡើងជារៀង រាល់ឆ្នាំ៖ «យើងត្រូវធ្វើបច្ចុប្បន្នភាពបញ្ជីនេះ គឺទី១ ដកឈ្មោះដែលត្រូវបាត់បង់សិទ្ធិក្នុងបញ្ជីឈ្មោះនៅតាមឃុំសង្កាត់ ហើយទី២ គឺកែតម្រូវ គឺដោយសារតែការកាត់ឈ្មោះ ដោយឃុំសង្កាត់សរសេរដោយដៃ អ៊ីចឹងទេ មកបញ្ចូលទិន្នន័យនេះធ្វើជាបញ្ជីឲ្យគាត់ពិនិត្យមើល ឲ្យគាត់កែតម្រូវ គាត់អត់បានកែតម្រូវរហូតដល់ពេលបោះឆ្នោត ឬពេលណាមួយដែលមកមើលបញ្ជីគាត់ដឹងឈ្មោះគាត់មិនត្រឹមត្រូវ សរសេរអក្ខរាវិរុទ្ធខុស គាត់សុំកែ គាត់កែតម្រូវរហូតមកដល់ថ្ងៃនេះ គឺបានជាង ៦ពាន់នាក់»។…
ទេព សុរ៉ាវី
http://www.rfa.org/khmer/news/politics/nec-release-first-report-of-voter-registration-10122013061025.html
