គ.ជ.ប.ពន្យារពេលវគ្គបណ្ដុះបណ្ដាលស្ដីពីការពិនិត្យនិងចុះឈ្មោះបោះឆ្នោត
គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសការពិនិត្យបញ្ជីឈ្មោះ និងចុះឈ្មោះអ្នកបោះឆ្នោត ឆ្នាំ២០១៣ នៅតាមសាលាឃុំ-សង្កាត់ នឹងត្រូវចាប់ផ្ដើមធ្វើពីថ្ងៃទី១ ដល់ថ្ងៃទី២០ ខែតុលា ឆ្នាំ២០១៣។ ទន្ទឹមគ្នានេះ (គ.ជ.ប) គ្រោងនឹងបើកវគ្គបណ្ដុះបណ្ដាលស្ដីពីពិនិត្យបញ្ជីឈ្មោះ និងចុះឈ្មោះបោះឆ្នោតដល់មន្ត្រីរៀបចំការបោះឆ្នោតនៅទូទាំង ប្រទេសផងដែរ។
គណៈកម្មាធិការជាតិរៀបចំការបោះឆ្នោត បានលើកពេលការរៀបចំវគ្គបណ្ដុះបណ្ដាល ស្ដីពីការពិនិត្យឈ្មោះ និងចុះឈ្មោះបោះឆ្នោតដល់មន្ត្រីរៀបចំការបោះឆ្នោត នៅតាមខេត្តក្រុងទូទាំងប្រទេសកម្ពុជា ទៅថ្ងៃក្រោយ ដោយពុំបានកំណត់កាលបរិច្ឆេទច្បាស់លាស់។ ការពន្យារពេលនេះ បានធ្វើឡើងស្របថ្ងៃដែលគណបក្សសង្គ្រោះជាតិ កំពុងដឹកនាំក្បួនធ្វើបាតុកម្មអហិង្សានៅក្នុងទីក្រុងភ្នំពេញ។
មន្ត្រីរៀបចំការបោះឆ្នោតខេត្តបន្ទាយមានជ័យ លោក គី គឹមសេង ថ្លែងឲ្យដឹងនៅថ្ងៃទី១៦ ខែកញ្ញា ថា កាលពីថ្ងៃទី៥ ខែកញ្ញា ឆ្នាំ២០១៣ នាយកដ្ឋានបណ្ដុះបណ្ដាល និងព័ត៌មានសាធារណៈរបស់គណៈកម្មាធិការជាតិរៀបចំការបោះឆ្នោត បានប្រកាសឲ្យប្រធានលេខាធិការដ្ឋានរាជធានីខេត្តរៀបចំការបោះឆ្នោត ឲ្យចូលរួមវគ្គបណ្ដុះបណ្ដាលស្ដីពីការពិនិត្យឈ្មោះ និងចុះឈ្មោះបោះឆ្នោត ឆ្នាំ២០១៣។ ប៉ុន្តែ វគ្គបណ្ដុះបណ្ដាលដែលនឹងត្រូវធ្វើឡើងនៅថ្ងៃទី១៧ ខែកញ្ញា នេះ បានផ្អាកទៅវិញ ដោយសារមានព្រឹត្តិការណ៍បាតុកម្មនៅទីក្រុងភ្នំពេញ៖ «ខ្ញុំ ត្រូវទៅរៀននៅថ្ងៃស្អែកនេះ ឥឡូវផ្អាកវិញមិនដឹងថាថ្ងៃណាត្រូវទេ ប៉ុន្តែត្រូវតែទៅ ប៉ុន្តែត្រូវតែ ព្រោះខានមិនបានទេ ព្រោះមួយឆ្នាំៗមានការកែនីតិវិធីបន្តិចៗ គ.ជ.ប ជូនដំណឹងមកថា ផ្អាកសិន ចាំឲ្យដំណឹងមកពេលក្រោយទៀត»។
មន្ត្រីលេខាធិការដ្ឋានរាជធានីខេត្ត ដែលត្រូវចូលរួមរៀនសូត្រនោះ ក្រោយពីបញ្ចប់វគ្គបណ្ដុះបណ្ដាលស្ដីពីការពិនិត្យឈ្មោះ និងចុះឈ្មោះបោះឆ្នោតរួចហើយ ពួកគេនឹងយកចំណេះវិជ្ជាទាំងនោះទៅបង្ហាត់បង្រៀនបន្តដល់ក្រុម ប្រឹក្សាឃុំសង្កាត់នៅតាមមូលដ្ឋាន។..
សួន សុផលមុន្នី
http://www.rfa.org/khmer/news/politics/nec-delays-to-train-about-check-and-register-voter-09162013055851.html
