តុលាការសម្រេចដោះលែងយុវជនជាប់ចោទ៤នាក់
ចៅក្រមសាលាដំបូងរាជធានីភ្នំពេញ លោក សេង នាង ចេញដីកានៅថ្ងៃទី២០ ខែសីហា សម្រេចដោះលែងយុវជន ៤នាក់ ឲ្យនៅក្រៅឃុំបណ្ដោះអាសន្ន តាមការទាមទាររបស់មេធាវី និងគ្រួសាររបស់ពួកគេ។ អង្គការសង្គមស៊ីវិលដែលឃ្លាំមើលករណីនេះ បានសាទរចំពោះការដោះលែង ហើយស្នើសុំឲ្យតុលាការលើកលែងការចោទប្រកាន់ទៅលើយុវជនទាំងនោះឲ្យផុតបទចោទ។ យុវជន ៤នាក់ ដែលត្រូវតុលាការចោទប្រកាន់ពីបទញុះញង់ឲ្យមានហិង្សាប្រដាប់អាវុធ ផ្ដួលរំលំរដ្ឋាភិបាល ត្រូវបានមន្ត្រីពន្ធនាគារព្រៃស ដោះលែងកាលពីរសៀលថ្ងៃទី២០ ខែសីហា តាមដីកាសម្រេចឲ្យនៅក្រៅឃុំបណ្ដោះអាសន្នរបស់ចៅក្រមនៃសាលាដំបូង រាជធានីភ្នំពេញ។ លោក សេង នាង បានចេញដីកាសម្រេចដោះលែងយុវជន ៤នាក់ តាមការស្នើសុំរបស់មេធាវីការពារក្តី និងគ្រួសាររបស់ពួកគេ។ ប៉ុន្តែ ពួកគេត្រូវស្ថិតក្រោមការត្រួតពិនិត្យរបស់តុលាការ និងត្រូវមានវត្តមានគ្រប់ពេលដែលតុលាការកោះហៅឲ្យចូលបំភ្លឺ។ ក្រោយពីដោះលែង យុវជនទាំង ៤នាក់មិនត្រូវបានផ្តល់បទសម្ភាសន៍ភ្លាមៗដល់អ្នកកាសែតទេ។ ពួកគេត្រូវបានដឹកជម្លៀសចេញពីពន្ធនាគារដោយស្ងាត់ៗ គេចពីក្រុមអ្នកកាសែត និងក្រុមយុវជនដែលគាំទ្រនៅមុខពន្ធនាគារ ហើយ ២នាក់ក្នុងចំណោមនោះ ត្រូវបានដឹកទៅស្នាក់ការអង្គការលីកាដូ (Licadho)។ លោក ទត់ ចាន់បញ្ញា យុវជនម្នាក់ក្នុងចំណោម ៤នាក់ ដែលត្រូវដោះលែង ប្រាប់អ្នកកាសែតនៅមុខស្នាក់ការអង្គការលីកាដូ ដោយអះអាងថា លោកមិនមានកំហុសដូចការចោទប្រកាន់របស់តុលាការទេ។ លោកមិនបានឆ្លើយសំណួរ ថាតើពិតជាស្គាល់ និងធ្វើតាមការបញ្ជារបស់លោក សួន សេរីរដ្ឋា ដូចការចោទប្រកាន់របស់សមត្ថកិច្ចឬក៏អត់?៖ «ខ្ញុំអត់បានធ្វើខុស គ្រាន់តែប៉ុណ្ណឹង»។…
http://www.rfa.org/khmer/news/politics/4suspects-freed-on-bail-08202013002513.html
