បុគ្គលិក
ធី ទ្រី
នាយកប្រតិបត្តិ/និពន្ធនាយក
ធី ទ្រី ជានាយកប្រតិបត្តិ/និពន្ធនាយកនៃអង្គការទិន្នន័យអំពីការអភិវឌ្ឍ (អូឌីស៊ី)។ លោកបានចូលបម្រើការងារជាសមាជិកក្រុមប្រឹក្សាភិបាលតាំងពីឆ្នាំ២០១១ និងបានបន្តក្លាយខ្លួនជាប្រធានក្រុមប្រឹក្សាភិបាលនៃអង្គការទិន្នន័យអំពីការអភិវឌ្ឍ។ ក្នុងនាមជានាយកប្រតិបត្តិ/និពន្ធនាយក លោកដើរតួនាទីយ៉ាងសំខាន់ ក្នុងការបង្កើនភាពដែលអាចទទួលបានព័ត៌មានជាសាធារណៈ ដែលមានលក្ខណៈជាប្រវត្តិសាស្ត្រ និងថ្មីៗ អំពីនិន្នាការអភិវឌ្ឍរបស់ប្រទេសកម្ពុជា នៅក្នុងវេទិកាអនឡាញ ដែលគេហៅថា “ទិន្នន័យបើកទូលាយ” ជាវេទិកាចងក្រងទិន្នន័យដែលមានស្រាប់ និងមិនគិតថ្លៃ ពីប្រភពសាធារណៈ។ មុនពេលចាប់ផ្តើមការងារជាមួយអង្គការអូឌីស៊ី លោកបានធ្វើការឱ្យ បណ្តាញផលប៉ះពាល់សង្គម និងបរិស្ថាន និស្សារណកម្មឧស្សាហកម្ម (EISEI) ក្នុងតួនាទីជាអ្នកសម្របសម្រួល នៅក្នុងអង្គការ ការអភិវឌ្ឍ និងភាពជាដៃគូក្នុងសកម្មភាព (DPA) អស់រយៈពេល៤ឆ្នាំ។ លោក មានបទពិសោធន៏ចំនួន២ឆ្នាំ ក្នុងតួនាទីជាអ្នកអង្កេតសិទ្ធិមនុស្ស ជាមួយអង្គការ អាដហុក និងបទពិសោធន៍ការងារ២ឆ្នាំផ្សេងទៀត ជាមួយនឹងក្រុមហ៊ុន ឥណ្ឌូឆាយណា លីមីតធីត (IRL) ដែលធ្វើលើការស្រាវជ្រាវសង្គម និងពាណិជ្ជកម្ម។ លើសពីនេះទៀត លោក ក៏បានទទួលការអប់រំ និងការបណ្តុះបណ្តាលនានា យ៉ាងច្រើនបន្ថែមទៀតដែរ។
ហេង ហ៊ុយអេង
នាយកផ្នែក ព័ត៌មានវិទ្យា/គេហទំព័រ
ហ៊ុយអេង បានបញ្ចប់ការសិក្សាថ្នាក់បរិញ្ញាបត្រលើជំនាញ ផ្នែកវិទ្យាសាស្ត្រកុំព្យូទ័រ ពីសាកលវិទ្យាល័យភូមិន្ទភ្នំពេញ (RUPP) និង ផ្នែកសិក្សាអន្តរជាតិ ពីវិទ្យាស្ថានភាសាបរទេស (IFL)។ នាង បានធ្វើការលើគម្រោងរបស់អង្គការទិន្នន័យអំពីការអភិវឌ្ឍ ចាប់តាំងពីគម្រោងនេះត្រូវបានបង្កើតឡើងដំបូងក្នុងឆ្នាំ២០១១។ ជាមួយនឹងបទពិសោធន៍ជាច្រើនឆ្នាំក្នុងការអភិវឌ្ឍបណ្ដាញគហទំព័រ នាងទទួល បន្ទុកដឹកនាំលើការអភិវឌ្ឍធនធានព័ត៌មានលើបណ្តាញ សម្រាប់សហគមន៍ការអភិវឌ្ឍរបស់ប្រទេសកម្ពុជា។ លើសពីនេះទៅទៀត នាងផ្តល់ការណែនាំ ត្រួតពិនិត្យ និងគ្រប់គ្រងរាល់ការងាររបស់ក្រុមព័ត៌មានវិទ្យា ដើម្បីធានាឱ្យបាននូវភាពត្រឹមត្រូវ និងសមត្ថភាពបច្ចេកទេស។ បន្ថែមពីនេះ នាងក៏បានផ្តល់ការណែនាំ និង ការគាំទ្របច្ចេកទេសដល់សមាជិកក្រុមការងារ ដើម្បីដោះស្រាយបញ្ហាបច្ចេកវិទ្យាផ្សេងៗផងដែរ។
សំអាន ម៉ារឌី
មន្រ្តីជាន់ខ្ពស់ផ្នែកអភិវឌ្ឍន៍គេហទំព័រ និងព័ត៌មានវិទ្យា
ទំនួលខុសត្រូវចំបងរបស់ម៉ារឌីគឺ តំហែទាំនិងការធ្វើបច្ចុប្បន្នភាពលើគេហទំព័ររបស់អូឌីស៊ី រួមទាំងជំនួយដល់នាយកផ្នែកព័ត៌មានវិទ្យានិងគេហទំព័រលើការងារផ្សេងៗ រួមមានការស្នើដំណោះស្រាយចំពោះបញ្ហានិងតម្រូវការថ្មីៗទាក់ទងនឹងព័ត៌មានវិទ្យា ក៏ដូចជាការណែនាំនិងផ្តល់ជំនួយបច្ចេកទេសដល់ក្រុមការងារ ។
ម៉ារឌី ជានិស្សិតបញ្ចប់ការសិក្សាថ្នាក់បរិញ្ញាបត្រផ្នែកវិទ្យាសាស្ត្រកុំព្យូទ័រពីវិទ្យាស្ថានបច្ចេកវិទ្យាកម្ពុជា និងបរិញ្ញាបត្រអក្សរសាស្ត្រភាសាអង់គ្លេសផ្នែកអប់រំពីវិទ្យាស្ថានភាសាបរទេស ។
ស៊ីវ វឌ្ឍនា
ប្រធានផ្នែកស្រាវជ្រាវ និងគ្រប់គ្រងមាតិកាគេហទំព័រ
វឌ្ឍនាបានធ្វើការយ៉ាងសកម្មសម្រាប់អង្គការទិន្នន័យអំពីការអភិវឌ្ឍ (អូឌីស៊ី) ចាប់តាំងពីឆ្នាំ ២០១៦ ក្នុងតួនាទីជា បណ្ណាធិការ-អ្នកស្រាវជ្រាវ និងជាមន្ត្រីផ្នែកស្រាវជ្រាវ និងមាតិកា។ ជាមួយនឹងបទពិសោធន៍ជាច្រើនឆ្នាំ វឌ្ឍនាត្រូវបានទទួលស្គាល់ពីតួនាទីនាំមុខក្នុងការសម្របសម្រួលនិងចាត់ចែងក្រុមការងារមាតិកានិងក្រុមអភិវឌ្ឍន៍គេហទំព័រក្នុងការពង្រីកធនធានលើអ៊ីនធឺណិត។ នៅចុងឆ្នាំ ២០២០ នាងត្រូវបានតំឡើងមុខតំណែងជាប្រធានផ្នែកស្រាវជ្រាវ និងគ្រប់គ្រងមាតិកាគេហទំព័រ។
ជាមួយនឹងតួនាទីបច្ចុប្បន្ននាងមានការទទួលខុសត្រូវជាច្រើន ដើម្បីធានាថាផែនការការងារ និងគោលដៅនៃគម្រោងនឹងត្រូវបានសម្រេចដោយជោគជ័យ។ នាងដឹកនាំការងាររចនានិងអភិវឌ្ឍគេហទំព័រ ត្រួតពិនិត្យប្រតិបត្តិការប្រចាំថ្ងៃរបស់ក្រុមការងារផ្នែកមាតិកានិងគេហទំព័រ និងផ្តោតជាអាទិភាពលើផែនការសកម្មភាពគម្រោង។ វឌ្ឍនាក៏ធ្វើការយ៉ាងជិតស្និទ្ធិជាមួយក្រុមការងារអូឌីស៊ីផ្សេងទៀតក្នុងការតាមដានចរាចរណ៍គេហទំព័រ (Web Traffic) និងរក្សាអោយបាននូវគុណភាពនៃមាតិកាដោយឆ្លើយតបឱ្យបានទាន់ពេលវេលា ភាពត្រឹមត្រូវបំពេញទៅតាមស្តង់ដារដែលបានតម្រូវ ទាំងភាពត្រឹមត្រូវ និងពេញលេញ។
មុនពេលចូលបម្រើការងារនៅអូឌីស៊ី វឌ្ឍនាបានធ្វើជាជំនួយការស្រាវជ្រាវក្រោមគម្រោង (LWR-ID/2009/046) របស់មជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR) និងគម្រោងស្រាវជ្រាវផ្សេងទៀតនៅសាកលវិទ្យាល័យ។ វឌ្ឍនាបានបញ្ចប់បរិញ្ញាបត្រវិស្វករ ជំនាញវិស្វកម្មធនធានទឹក និងហេដ្ឋារចនាសម្ព័ន្ធជនបទ ពីវិទ្យាស្ថានបច្ចេកវិទ្យាកម្ពុជា នៅឆ្នាំ២០១៤។
អ៊ួន វិមល
មន្ត្រីកម្មវិធី និងភាពជាដៃគូ
វិមល ជាមន្ត្រីកម្មវិធី និងភាពជាដៃគូ នៅអង្គការទិន្នន័យអំពីការអភិវឌ្ឍ (អូឌីស៊ី)។ នាងជាអ្នកផ្តល់នូវយុទ្ធសាស្ត្រក្នុងការត្រួតពិនិត្យ និងការគ្រប់គ្រងសម្រាប់គម្រោងការច្នៃប្រឌិតថ្មីសម្រាប់គណនេយ្យភាពសង្គមនៅក្នុងប្រទេសកម្ពុជា (ISAC) និងចូលរួមក្នុងការស្រាវជ្រាវសម្រាប់បង្កើតជាមាតិកានៅលើគេហទំព័រអូឌីស៊ី ព្រមទាំងសម្របសម្រួលលើគ្រប់ផ្នែកនៃគម្រោងការច្នៃប្រឌិតថ្មីសម្រាប់គណនេយ្យភាពសង្គមនៅក្នុងប្រទេសកម្ពុជា (ISAC)។ នាងក៏ទទួលខុសត្រូវផងដែរក្នុងការបង្កើតកម្មវិធីបណ្តុះបណ្តាល និងផ្តល់ការបណ្តុះបណ្តាលក្រុមគោលដៅអំពីរបៀបប្រើប្រាស់គេហទំព័រអូឌីស៊ី។
នាងបញ្ចប់ការសិក្សាជាមួយបរិញ្ញាបត្រពីរ ផ្នែកការអភិវឌ្ឍសេដ្ឋកិច្ច និងភាសាអង់គ្លេសសម្រាប់ការបកប្រែ និងបរិញ្ញាបត្រជាន់ខ្ពស់ផ្នែកបរិស្ថាន ការអភិវឌ្ឍ និងនិរន្តរភាព ពីសាកលវិទ្យាល័យជូឡាឡុងកន។ មុនមកបម្រើការងារនៅអូឌីស៊ី នាងគឺជាជំនួយការកម្មវិធីនៅ វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) និងជាជំនួយការនាយកគ្រប់គ្រងក្រុមហ៊ុនឯកជន។
បាន ចន្ទផល្លា
បណ្ណាធិការ – អ្នកស្រាវជ្រាវ ផ្នែកអភិវឌ្ឍន៍សង្គម
លោកចន្ទផល្លាជា បណ្ណាធិការ- អ្នកស្រាវជ្រាវ ផ្នែកអភិវឌ្ឍន៍សង្គមនៃអង្គការទិន្នន័យអំពីការអភិវឌ្ឍ។ ការងារ និងការទទួលខុសត្រូវចម្បងរបស់លោកមានដូចជា ការសង្ខេបព័ត៌មានប្រចាំថ្ងៃ ការស្រាវជ្រាវ ការផលិតមាតិកាដែលទាក់ទងនឹងការអភិវឌ្ឍន៍សង្គម ការបកប្រែ ការកែសម្រួល និងធ្វើរបាយការណ៏ពីការងារផ្សេងៗ។
លោកចន្ទផល្លា ជានិស្សិតបញ្ចប់ការសិក្សាផ្នែកទំនាក់ទំនងអន្តរជាតិ (IR) នៃវិទ្យាស្ថានភាសាបរទេស (IFL) នៃសាកលវិទ្យាល័យភូមិន្ទភ្នំពេញក្នុងឆ្នាំ ២០១៧ ។ មុនពេលចូលរួមជាមួយអូឌីស៊ី លោកចន្ទផល្លាធ្វើការ ជាអ្នកស្រាវជ្រាវនៅអង្គការវេទិកាអនាគត ដែលនៅទីនោះ លោកបានធ្វើគម្រោងស្រាវជ្រាវជាច្រើន។ គម្រោងស្រាវជ្រាវចុងក្រោយរបស់លោកផ្តោតទៅលើការអប់រំតាមបែបស្តែម(STEM)ក្នុងប្រទេសកម្ពុជា។
ហៀង កុសល
បណ្ណាធិការ – អ្នកស្រាវជ្រាវ ផ្នែកសេដ្ឋកិច្ច
កុសលបានបញ្ចប់ថ្នាក់បរិញ្ញាប័ត្រជំនាញទំនាក់ទំនងអន្តរជាតិពីវិទ្យាស្ថានភាសាបរទេស នៃសាកលវិទ្យាល័យភូមិន្ទភ្នំពេញក្នុងឆ្នាំ ២០១៩។ មុននោះដែរ លោកក៏បានបញ្ចប់ថ្នាក់វិញ្ញាបនបត្រជាន់ខ្ពស់ផ្នែកវិស្វកម្មរថយន្តពីសាលាបច្ចេកទេស JVC នៅឆ្នាំ ២០១៥។ នៅឆ្នាំ ២០១៩ លោកបានទទួលជ័យលាភីលេខ១ នៅក្នុងការប្រកួតប្រជែងស្រាវជ្រាវប្រចាំឆ្នាំដែលធ្វើឡើងដោយនាយកដ្ឋានសិក្សាអន្តរជាតិនៃវិទ្យាស្ថានភាសាបរទេស (IFL)។ ក្រៅពីនេះ លោកក៏មានបទពិសោធការងារជាច្រើនផងដែរ ជាក់ស្តែង លោកបានធ្វើជាអ្នកហាត់ការយុទ្ធនាការតាមឌីជីថលនៅអង្គការ ActionAid Cambodia អ្នកហាត់ការស្រាវជ្រាវនៅវិទ្យាស្ថានស្រាវជ្រាវសេដ្ឋកិច្ចនពន្ធ (NUPPUN) អ្នកស្រាវជ្រាវផ្នែកបរិមាណនៃក្រុមហ៊ុនស្រាវជ្រាវឥណ្ឌូឆាយណា ហើយថ្មីៗនេះបានបញ្ចប់ការងារស្រាវជ្រាវរយៈពេលខ្លី (Research Freelancer) នៅអង្គការ BBC Media Action Cambodia។
ជូលៀ ហ្គាសៀ ពុជ
មន្ត្រីស្រាវជ្រាវ និងយុទ្ធសាស្ត្រ
ជូលៀ មានបរិញ្ញាបត្រផ្នែកសេដ្ឋកិច្ច និង សញ្ញាបត្របរិញ្ញាបត្រជាន់ខ្ពស់ផ្នែកអភិវឌ្ឍន៍អន្តរជាតិ ពីវិទ្យាស្ថានបាសេឡូណាសម្រាប់ការសិក្សាអន្តរជាតិ (IBEI)។ ជូលៀ ធ្លាប់ធ្វើជាអ្នកស្រាវជ្រាវស្ម័គ្រចិត្តជាមួយ អូឌីស៊ី កាលពីខែតុលា ដល់ខែធ្នូ ឆ្នាំ២០១៨។ នៅក្នុងតួនាទីបច្ចុប្បន្ន ជូលៀនឹងធ្វើផែនការយុទ្ធសាស្ត្រសម្រាប់ស្ថាប័ន ធ្វើការសិក្សាស្រាវជ្រាវ ព្រមទាំងសរសេរអត្ថបទសម្រាប់គេហទំព័រ ទាក់ទងនឹង គោលដៅអភិវឌ្ឍន៍ប្រកបដោយចីរភាព សេវាសាធារណៈ និងគណនេយ្យភាព។ ជូលៀ ក៏ជួយសម្របសម្រួលផងដែរ សម្រាប់កិច្ចសហការរវាង ក្រសួងផែនការ ដើម្បីពង្រឹងការអនុវត្តគោលដៅ អភិវឌ្ឍន៍ប្រកបដោយចីរភាព នៅកម្ពុជា។ ជាមួយគ្នានេះដែរការងាររបស់ ជូលៀ គឺផ្តោតសំខាន់លើ តួនាទីរបស់ បច្ចេកវិទ្យា ទិន្នន័យ និង ICT ក្នុងការអភិវឌ្ឍ។
គ្រី សូរសិរីបុត្រ
អ្នកគ្រប់គ្រងភាពជាដៃគូ និងទំនាក់ទំនង
សិរីបុត្របានបញ្ចប់បរិញ្ញាប័ត្រផ្នែកទំនាក់ទំនងអន្តរជាតិនៅវិទ្យាស្ថានភាសាបរទេស។ លោកមានចំណាប់អារម្មណ៍ខ្ពស់ក្នុងការងារអភិវឌ្ឍសង្គម និងវិស័យអប់រំ ហើយបានខិតខំប្រឹងប្រែងធ្វើការយ៉ាងខ្លាំងនៅក្នុងវិស័យទាំងនេះ។ មុនចូលរួមជាមួយអង្គការទិន្នន័យអំពីការអភិវឌ្ឍ លោកធ្លាប់ជាមន្ត្រីផ្នែកទំនាក់ទំនងនៅឯអង្គការហ្វ្រេនអ៊ិនធឺណាសស៊ិនណល ជាអ្នករចនាក្រាហ្វិកឱ្យក្រុមហ៊ុនឯកជនមួយ និងធ្លាប់ជាអ្នកហាត់ការផ្នែកទំនាក់ទំនងនៅអង្គការតម្លាភាពកម្ពុជាផងដែរ។
ការទទួលខុសត្រូវចម្បងរបស់លោកនៅក្នុងអង្គការទិន្នន័យអំពីការអភិវឌ្ឍនេះ គឺផ្តោតសំខាន់ទៅលើការពង្រឹងទំនាក់ទំនង និងគុណភាពវេទិកាបណ្តាញផ្សព្វផ្សាយសង្គម និងការចែករំលែកមាតិកាឱ្យបានទូលំទូលាយទៅកាន់ដៃគូសហការ ក៏ដូចជាសាធារណៈជន។
ង៉ូវ ជីហ័រ
មន្ត្រីផ្នែកទំនាក់ទំនង
ជីហ័រ បញ្ចប់ថ្នាក់បរិញ្ញាបត្រជំនាញគ្រប់គ្រងប្រព័ន្ធផ្សព្វផ្សាយ ពីដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ នៃសាកលវិទ្យាល័យភូមិន្ទភ្នំពេញ។ មុនចូលបម្រើការងារនៅអង្គការទិន្នន័យអំពីការអភិវឌ្ឍ (អូឌីស៊ី) ជីហ័រ ធ្លាប់ធ្វើជាអ្នកហាត់ការនៅមជ្ឈមណ្ឌលឯកសារកម្ពុជា (DC-Cam) នៅឆ្នាំ២០១៨ និងអង្គការឃែរ (CARE Deutschland) ប្រទេសអាល្លឺម៉ង់ នៅឆ្នាំ២០១៩។ បន្ថែមពីនេះ ក្នុងឆ្នាំ២០២០ ជីហ័រក៏ធ្លាប់ធ្វើជាអ្នកស្ម័គ្រចិត្តផ្នែកទំនាក់ទំនងសាធារណៈ នៅដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ផងដែរ។
ទំនួលខុសត្រូវរបស់ ជីហ័រ គឺផ្ដោតទៅលើផ្នែកទំនាក់ទំនងនិងសហការអនុវត្តសកម្មភាពគម្រោងផ្សេងៗរបស់ អូឌីស៊ី ផងដែរ។
ឡុច កល្យាណ
អ្នកស្រាវជ្រាវទិន្នន័យ និងឯកទេសប្រព័ន្ធព័ត៌មានភូមិសាស្ត្រ (GIS)
កល្យាណ គឺជាអ្នកស្រាវជ្រាវទិន្នន័យ និងឯកទេសប្រព័ន្ធព័ត៌មានភូមិសាស្ត្រ (GIS) នៅអង្គការទិន្នន័យអំពីការអភិវឌ្ឍ។ លោកធ្លាប់បានធ្វើការជាមួយគម្រោងអង្គការទិន្នន័យអំពីការអភិវឌ្ឍ ចាប់តាំងពីគម្រោងត្រូវបានបង្កើតឡើងជាលើកដំបូងនៅក្នុងឆ្នាំ ២០១១ រហូតដល់ឆ្នាំ ២០១៥។ ក្រោយមកគាត់បានដើរតួជាអ្នកដឹកនាំបច្ចេកទេសក្នុងគម្រោងព័ត៌មានភូមិសាស្ត្រនៃប្រព័ន្ធ GPS Navigation នៅក្នុងវិស័យឯកជន។ លោកបានចូលបម្រើការងារជាថ្មីជាមួយអង្គការទិន្នន័យអំពីការអភិវឌ្ឍនៅក្នុងឆ្នាំ ២០១៩។
លោកទទួលបន្ទុកដឹកនាំក្រុមក្នុងគ្រប់សកម្មភាពស្រាវជ្រាវទាក់ទងទៅនឹងទិន្នន័យដោយផ្តោតលើការ ប្រមូលផ្តុំ រៀបចំ និងបង្ហាញទិន្នន័យអំពីទីតាំងជាក់លាក់មួយនៅក្នុងទម្រង់ជាឌីជីថល។ លោកក៏ប្រើបច្ចេកវិទ្យា ប្រព័ន្ធព័ត៌មានភូមិសាស្ត្រ ដើម្បីចងក្រង រក្សាទុក និងធ្វើបច្ចុប្បន្នភាពព័ត៌មានពីប្រភពផ្សេងៗគ្នាសម្រាប់ការប្រើប្រាស់ជាសាធារណៈ និងធានាថាទិន្នន័យនៅលើគ្រប់ប្រធានបទទាំងអស់មានលក្ខណៈពេញលេញត្រឹមត្រូវ និងមានបច្ចុប្បន្នភាព។ លោកបានបញ្ចប់ការសិក្សា ជំនាញរៀបចំដែនដី និងរដ្ឋបាលដីធ្លីនៅក្នុងឆ្នាំ២០១១ និងបញ្ចប់បរិញ្ញាបត្រជាន់ខ្ពស់ ជំនាញគ្រប់គ្រងធនធានធម្មជាតិនៃសាកលវិទ្យាល័យភូមិន្ទកសិកម្ម (RUA) ក្នុងឆ្នាំ២០២០។
វង្ស ពិសិទ្ធ
មន្ត្រីជាន់ខ្ពស់ផ្នែកស្រាវជ្រាវទិន្នន័យ និងប្រព័ន្ធព័ត៌មានភូមិសាស្ត្រ (GIS)
ពិសិទ្ធធ្វើការជាមន្ត្រីជាន់ខ្ពស់ផ្នែកស្រាវជ្រាវទិន្នន័យ និងGIS នៅអង្គការទិន្នន័យអំពីការអភិវឌ្ឍ (ODC)។ គាត់បានបញ្ចប់ការសិក្សាថ្នាក់វិស្វករឯកទេសធនធានរ៉ែ និងភូគភ្ពសាស្ត្រ ពីវិទ្យាស្ថានបច្ចេកវិទ្យាកម្ពុជា នៅឆ្នាំ ២០១៩។ ក្នុងឆ្នាំបញ្ចប់ការសិក្សារបស់គាត់ ពិសិទ្ធបានទទួលអាហារូបករណ៍ទៅសិក្សាមួយឆមាសនៅសកលវិទ្យាល័យជូឡាឡុងកន ប្រទេសថៃជាទីដែលគាត់បានបញ្ចប់និក្ខេបទសម្រាប់ការបញ្ចប់ការសិក្សានៅវិទ្យាស្ថានបច្ចេកវិទ្យាកម្ពុជា។
នៅអង្គការទិន្នន័យអំពីការអភិវឌ្ឍការងាររបស់គាត់ គឺផ្ដោតទៅលើការស្រាវជ្រាវទិន្នន័យភូមិសាស្ត្រ ស្ដីពីវិស័យជាច្រើនទាក់ទងនឹងការអភិវឌ្ឍក្នុងប្រទេសកម្ពុជា ដែលបានមកពីគ្រប់ប្រភពដែលផ្ដល់ទិន្នន័យបើកទូលាយ សម្រាប់ការគ្រប់គ្រង ប្រមូលផ្ដុំ កែសម្រួល និងធ្វើទស្សនីយ៍កម្ម ដោយប្រើប្រាស់GIS សម្រាប់ដាក់អោយប្រើជាសាធារណៈនៅលើគេហទំព័ររបស់អង្គការ។ ក្រៅពីការងារតួនាទីផលិតទិន្នន័យ ជាពិសេសទិន្នន័យភូមិសាស្ត្រ គាត់ចូលរួមនៅក្នុងការធ្វើការបណ្ដុះបណ្ដាល និងតាក់តែងកម្មវិធីបណ្ដុះបណ្ដាលដែលទាក់ទងនឹងទិន្នន័យ និងGISផងដែរ សម្រាប់គម្រោងដែលពាក់ព័ន្ធ។
ភី សាខឿន
ប្រធានហិរញ្ញវត្ថុ និង រដ្ឋបាល
លោក ភី សាខឿន បានបញ្ចប់ការសិក្សាបរិញ្ញាបត្រជាន់ខ្ពស់ ផ្នែកគ្រប់គ្រង ពីសាកលវិទ្យាល័យធនធានមនុស្សក្នុងឆ្នាំ២០១២, បញ្ចប់បរិញ្ញាបត្រផ្នែកភាសាអង់គ្លេស ពីសាកលវិទ្យាល័យបៀលប្រាយក្នុងឆ្នាំ២០០៩ និង បញ្ចប់បរិញ្ញាបត្រផ្នែកគណនេយ្យ ពីសាកលវិទ្យាល័យជាតិគ្រប់គ្រងក្នុងឆ្នាំ២០០៣។ ទាក់ទងនឹងបទពិសោធន៍ការងារ លោក សាខឿន មានបទពិសោធន៍ជាង១៣ឆ្នាំផ្នែកហិរញ្ញវត្ថុ រដ្ឋបាល និងធនធានមនុស្ស ពីអង្គការជាតិ និងអន្តរជាតិនៅក្នុងប្រទេសកម្ពុជា។
លោក សាខឿន ជាប្រធានហិរញ្ញវត្ថុ និងរដ្ឋបាល នៃអង្គការទិន្នន័យអំពីការអភិវឌ្ឍ (អូឌីស៊ី)។ លោកបានចូលរួមបម្រើការងារជាមួយអង្គការ អូឌីស៊ី នៅដើមឆ្នាំ២០១៨ ដោយធ្វើការយ៉ាងជិតស្និទជាមួយនាយកប្រតិបត្តិនៃអង្គការទិន្នន័យអំពីការអភិវឌ្ឍ និងទទួលខុសត្រូវលើការងារសំខាន់ៗមួយចំនួនដូចជា៖ ពិនិត្យមើលរាល់ឯកសារចំណាយ និងប្រតិបត្តិការគណនេយ្យអោយបានត្រឹមត្រូវមុននឹងបញ្ជូលក្នុងប្រព័ន្ធគណនេយ្យ, ធ្វើរបាយការណ៍ហិរញ្ញវត្ថុជូននាយកប្រតិបត្តិ និងម្ចាស់ជំនួយអោយទាន់ពេលវេលា, រៀបចំគម្រោងថវិកាដើម្បីស្នើសុំទៅម្ចាស់ជំនួយ, រៀបចំរបាយការណ៍តាមដានការចំណាយគ្រប់គម្រោងទាំងអស់ និងដាក់ជូននាយកប្រតិបត្តិជារៀងរាល់ខែ, សម្របសម្រួលការងារសាវនកម្មអោយបានរលូន, ត្រួតពិនិត្យមើលការប្រើប្រាស់ថវិកាក្នុងដៃអោយមានប្រសិទ្ធិភាព, ផ្តល់ការគាំទ្រផែ្នកបច្ចេកទេសដល់មន្ត្រីហិរញ្ញវត្ថុ និងរដ្ឋបាល, សម្របសម្រួលដំណើរការនៃការជ្រើសរើសបុគ្គលិក និងតម្រង់ទិសបុគ្គលិក, ពិនិត្យមើលការបើកប្រាក់បៀវត្សន៍ និងអត្ថប្រយោជន៍ផ្សេងៗរបស់បុគ្គលិក, ពិនិត្យមើលឯកសារនៃការបង់ពន្ធផ្សេងៗ និង របបសន្តិសុខសង្គម, ពិនិត្យមើលគោលនយោបាយ និងនីតិវិធីរបស់អង្គការ និងធ្វើការកែសម្រួលប្រសិនបើនៅមានភាពខ្វះចន្លោះ និងបំពេញការងារផ្សេងៗទៀតដែលចែងនៅក្នុងឯកសារពិពណ៌រនាការងារ។
ឃីម សេងហួរ
មន្ត្រីហិរញ្ញវត្ថុ និង រដ្ឋបាល
មុនពេលចូលបម្រើការនៅអង្គការទិន្នន័យអំពីការអភិវឌ្ឍ សេងហួរបានបម្រើការជាជំនួយការហិរញ្ញវត្ថុ និងរដ្ឋបាលនៅឯមូលនិធិបៃតងអាល្លឺម៉ង់មួយកន្លែង។ ឥឡូវនេះនៅអង្គការទិន្នន័យអំពីការអភិវឌ្ឍ គាត់ទទួលខុសត្រូវលើភារកិច្ចទាក់ទងនឹងហិរញ្ញវត្ថុ និងគណនេយ្យ និងគាំទ្រប្រតិបត្តិការប្រចាំថ្ងៃរបស់ស្ថាប័ន។ គាត់ត្រូវធ្វើការយ៉ាងជិតស្និទ្ធជាមួយអ្នកគ្រប់គ្រងរបស់គាត់ ដើម្បីធានាឱ្យបាននូវសុខុមាលភាពផ្នែកហិរញ្ញវត្ថុដែលរឹងមាំ និងប្រកបដោយចីរភាពរបស់ស្ថាប័ន។ សេងហួរ ជានិស្សិតបញ្ចប់ការសិក្សាថ្នាក់បរិញ្ញាបត្រផ្នែកគ្រប់គ្រងពាណិជ្ជកម្ម ពីសាកលវិទ្យាល័យបញ្ញាសាស្ត្រកម្ពុជា ហើយគាត់ក៏ជាអតីតនិស្សិតនៃសាកលវិទ្យាល័យហ្គូធីងងឹន នៅប្រទេសអាល្លឺម៉ង់ផងដែរ។
មាស រក្សា
ជំនួយការរដ្ឋបាល
រក្សាគឺជាជំនួយការរដ្ឋបាលនៅអង្គការទិន្នន័យអំពីការអភិវឌ្ឍ (អូឌីស៊ី)។ លោកទទួលខុសត្រូវជាជំនួយការក្នុងភារកិច្ចនានានៃហិរញ្ញវត្ថុ និង រដ្ឋបាលដែលស្ថិតនៅក្រោមការចាត់ចែងដោយផ្ទាល់ពីប្រធានហិរញ្ញវត្ថុ និងរដ្ឋបាល។ គាត់ក៏ទទួលខុសត្រូវផងដែរក្នុងការគាំទ្រសកម្មភាពកម្មវិធីរបស់អូឌីស៊ី។
រក្សា បានបញ្ចប់ថ្នាក់បរិញ្ញាប័ត្រផ្នែកទំនាក់ទំនងអន្តរជាតិ ពីសាកលវិទ្យាល័យបញ្ញាសាស្ត្រកម្ពុជា (PUC)។ ចំណង់ចំណូលចិត្តរបស់លោក គឺចង់ក្លាយជាផ្នែកមួយនៃអង្គការមនុស្សធម៌ក៏ដូចជាចូលរួមចំណែកធ្វើឱ្យមានឥទ្ធិពលវិជ្ជមាននៅក្នុងសង្គមកម្ពុជា។ មុនពេលលោកមកបម្រើការងារនៅអង្គការទិន្នន័យអំពីការអភិវឌ្ឍ លោកធ្លាប់ជាអ្នកគ្រប់គ្រងឯកសារនៅក្រុមហ៊ុនឯកជនមួយ ហើយក៏ធ្លាប់ជាជំនួយការរដ្ឋបាលនៅ អង្គការសង្គ្រោះសត្វកម្ពុជា(Animal Rescue Cambodia)ផងដែរ។
