ប្រតិបត្តិករទូរគមនាគមន៍

ទំព័រព័ត៌មាន​ទិន្នន័យ​នេះ ផ្តល់ព័ត៌មានដែលមានប្រយោជន៍អំពីប្រតិបត្តិករទូរគមនាគមន៍នៅក្នុងប្រទេសកម្ពុជា។ ទំព័រព័ត៌មានទិន្នន័យនេះមានបញ្ចូលព័ត៌មានដូចជា ឈ្មោះរបស់ក្រុមហ៊ុន/ប្រតិបត្តិករ/អ្នកកាន់អាជ្ញាបណ្ណ ប្រភេទ និងសេចក្តីលម្អិតនៃអាជ្ញាបណ្ណ ចន្លោះនៃបច្ចុប្បន្នភាពរបស់ប្រតិបត្តិករ និងអាជ្ញាបណ្ណ អាសយដ្ឋាន​ និងលេខទំនាក់ទំនងរបស់ប្រតិបត្តិករ ព្រមទាំងឯកសារយោង។ ទិន្នន័យនេះមានប្រភពដកស្រង់ចេញពីបញ្ជីរបស់និយ័តករទូរគមនាគមន៍កម្ពុជាដែលគ្របដណ្តប់ព័ត៌មានបច្ចុប្បន្នភាពនៃប្រតិបត្តិករទូរគមនាគមន៍នៅកម្ពុជាចាប់ពីខែមករា ឆ្នាំ២០២២​ ដល់ខែកក្កដា ឆ្នាំ២០២៤។ អង្គការទិន្នន័យអំពីការអភិវឌ្ឍ (អូឌីស៊ី) បានបម្លែងទិន្នន័យនេះយ៉ាងលិ្អតល្អន់ពីទម្រង់ PDF ទៅជាទម្រង់តារាងទិន្នន័យ CSV ដែលអាច​ឱ្យសាធារណៈជនធ្វើការទាញយកទិន្នន័យបានដោយសេរីដែលមានទិន្នន័យជាភាសាខ្មែរ និងភាសាអង់គ្លេស។ ការបម្លែងទិន្នន័យនេះអាចជួយឱ្យអ្នកប្រើប្រាស់ងាយស្រួលយកមកប្រើប្រាស់ និងចាត់ចែងទិន្នន័យ។ សំណុំទិន្នន័យនេះត្រូវបានដាក់ឱ្យប្រើប្រាស់ជាសាធារណៈ ដើម្បីសម្រួលដល់តម្លាភាព និងភាពងាយស្រួលសម្រាប់អ្នកសិក្សាស្រាវជ្រាវ អ្នកជំនាញ និងសាធារណជនដែលចាប់អារម្មណ៍លើវិស័យទូរគមនាគមន៍នៅកម្ពុជា។

ក្នុងដំណើរការប្រមូល និងបម្លែងទិន្នន័យនេះ ក្រុមការងាររបស់អូឌីស៊ី បានកត់សម្គាល់ឃើញថាប្រតិបត្តិករមួយចំនួនមានអាជ្ញាបណ្ណច្រើន។ ដើម្បីបង្កើនភាពច្បាស់លាស់ និងសម្របតាមស្តង់ដារដែលកំណត់ក្នុងលិខិតបទដ្ឋានគតិយុត្ត អូឌីស៊ីបានធ្វើការសិក្សាស្រាវជ្រាវទិន្នន័យបន្ថែម និងធ្វើបច្ចុប្បន្នភាពអំពីចំណាត់ថ្នាក់នៃអាជ្ញាបណ្ណដោយផ្អែកលើប្រកាសលេខ ១២២ ចុះថ្ងៃទី០៧ ខែមេសា ឆ្នាំ២០១៧ ដែលចេញដោយក្រសួងប្រៃសណីយ៍ និងទូរគមនាគមន៍។ ចំណាត់ថ្នាក់ថ្មីនៃអាជ្ញាបណ្ណ ដែលមានចែងក្នុងប្រការ ៩ និងប្រការ ៣៥ នៃប្រកាសនេះ មានដូចខាងក្រោម៖  

១. អាជ្ញាបណ្ណហេដ្ឋារចនាសម្ព័ន្ធ និងសេវា៖ អាជ្ញាបណ្ណប្រភេទនេះសម្រាប់ប្រតិបតិ្តករទូរគមនាគមន៍ (អ្នកកាន់ ឬអ្នកទទួលអាជ្ញាបណ្ណ) ដែលធ្វើការស្ថាបនាផង និងធ្វើប្រតិបត្តិបណ្តាញទូរគមនាគមន៍ និងប្រតិបត្តិការសេវាកម្មទូគមនាគមន៍ផង។

២. អាជ្ញាបណ្ណហេដ្ឋារចនាសម្ព័ន្ធ និងសេវាមានដែនកំណត់៖ អាជ្ញាបណ្ណប្រភេទនេះសម្រាប់ប្រតិបត្តិករទូរគមនាគមន៍ (អ្នកកាន់ ឬអ្នកទទួលអាជ្ញាបណ្ណ) ដែលមានតែហេដ្ឋារចនាសម្ព័ន្ធទូរគមនាគមន៍អកម្ម (អង់តែនទូរគមនាគមន៍ និងបណ្តាញខ្សែកាប្លិ៍អុបទិកលើគោក) សម្រាប់ជួលឱ្យអ្នកទទួលអាជ្ញាបណ្ណដទៃផ្តល់សេវាកម្មទូរគមនាគមន៍នៅលើបណ្តាញរបស់ខ្លួន ឬសម្រាប់ប្រតិបត្តិការផ្ទាល់ខ្លួន។

៣. អាជ្ញាបណ្ណសេវាទូរគមនាគមន៍៖ អាជ្ញាបណ្ណប្រភេទនេះសម្រាប់ប្រតិបត្តិករទូរគមនាគមន៍ (អ្នកកាន់ ឬអ្នកទទួលអាជ្ញាបណ្ណ) ដែលផ្តោតជាចម្បងលើការផ្តល់សេវាទូរគមនាគមន៍ដោយគ្មានការទទួលខុសត្រូវលើហេដ្ឋារចនាសម្ព័ន្ធ (ដូចជា សេវា VoIP សេវាអ៊ិនធឺណែត សេវា Toll-Free សេវា VSAT និងសេវាតម្លៃបន្ថែម)។ 

ចំណាត់ថ្នាក់នៃអាជ្ញាបណ្ណថ្មីនេះមានគោលបំណងផ្តល់នូវការយល់ដឹងកាន់តែច្បាស់អំពីតួនាទី និងសមត្ថភាពរបស់ប្រតិបត្តិករនីមួយៗនៅក្នុងទិដ្ឋភាពនៃទូរគមនាគមន៍កម្ពុជា។

ទំព័រព័ត៌មានទិន្នន័យនេះបង្ហាញពីកម្រិតព័ត៌មានបច្ចុប្បន្នដែលអាចស្វែងរកបានទាក់ទងនឹងប្រតិបត្តិករទូរគមនាគមន៍ រួមបញ្ចូលសំណុំទិន្នន័យដែលបានធ្វើបច្ចុប្បន្នភាពត្រឹមកម្រិតនៃប្រភពទិន្នន័យដែលអាចរកបាន។ អូឌីស៊ីប្តេជ្ញាបន្តធ្វើបច្ចុប្បន្នភាពលើសំណុំទិន្នន័យនេះ នៅពេលរកបានព័ត៌មានចុងក្រោយបំផុតថែមទៀត ដើម្បីធានាបានថាអ្នកប្រើប្រាស់អាចរកបានសម្រាប់ប្រើនូវទិន្នន័យដែលមានបច្ចុប្បន្នភាព និងពាក់ព័ន្ធបំផុត។ សំណុំទិន្នន័យនេះមានគោលបំណងបម្រើជាទិន្នន័យមូលដ្ឋានដំបូង។ អូឌីស៊ីលើកទឹកចិត្តដល់អ្នកប្រើប្រាស់សំណុំទិន្នន័យនេះ ឱ្យធ្វើការស្រាវជ្រាវបន្ថែម​ ដើម្បីគាំទ្រការងាររបស់អ្នកប្រើប្រាស់ ហើយសូមជួយរួមចំណែកផ្តល់ព័ត៌មានបន្ថែមលើសំណុំទិន្នន័យនេះ ដើម្បីឱ្យវាកាន់តែមានប្រយោជន៍ក្នុងការប្រើប្រាស់ និងកាន់តែមានភាពសុក្រឹតត្រឹមត្រូវ។ សូមលើកទឹកចិត្តឱ្យអ្នកប្រើប្រាស់ តាមដានចូលមើលទំព័រព័ត៌មានទិន្នន័យនេះសារជាថ្មីម្តងម្កាល និងបន្តចូលរួមជាមួយ​អូឌីស៊ីសម្រាប់ការធ្វើបច្ចុប្បន្នភាពបន្ថែមលើសំណុំទិន្នន័យអំពីប្រតិបត្តិករទូរគមនាគមន៍៍នៅកម្ពុជា។