ការផ្តល់អំណាចដល់សហគមន៍តាមឆ្នេរតាមរយៈជំនាញឌីជីថល
នៅថ្ងៃទី ២ ខែឧសភា ឆ្នាំ ២០២៥ អង្គការទិន្នន័យអំពីការអភិវឌ្ឍ (អូឌីស៊ី) បានរៀបចំសិក្ខាសាលាបណ្តុះបណ្តាលមួយក្នុងគោលបំណងបំពាក់ឱ្យតំណាងសហគមន៍ឆ្នេរ និងអ្នកដឹកនាំយុវជននូវជំនាញប្រព័ន្ធផ្សព្វផ្សាយសង្គមសំខាន់ៗ។ វគ្គបណ្ដុះបណ្ដាលនេះបានផ្ដល់សិទ្ធិអំណាចដល់អ្នកចូលរួមក្នុងការប្រើប្រាស់វេទិកាឌីជីថល ដើម្បីពង្រីកសំឡេងរបស់ពួកគេ និងលើកកម្ពស់កិច្ចខិតខំប្រឹងប្រែងអភិវឌ្ឍន៍ប្រកបដោយចីរភាពនៅក្នុងសហគមន៍របស់ពួកគេ។
សិក្ខាសាលានេះធ្វើឡើងក្រោមគម្រោង “ពង្រឹងសកម្មភាពសង្គមស៊ីវិលដើម្បីចូលរួមក្នុងអភិបាលកិច្ចសេដ្ឋកិច្ច (SCAEG) ២០២៣-២០២៦” ក្រោមកិច្ចសហការឧបត្ថម្ភមូលនិធិដោយសហភាពអឺរ៉ុប និងដោយមានការគាំទ្រពីអង្គការដៃគូថ្នាក់ខេត្តរបស់យើង រួមមាន៖ មជ្ឈមណ្ឌលអភិវឌ្ឍន៍កុមារ និងស្ត្រីនៅកម្ពុជា (CWDCC) មជ្ឈមណ្ឌលម្លប់ព្រហ្មវិហារធម៌ (MPC) និងអង្គការស្រលាញ់ធនធានធម្មជាតិកម្ពុជា (CNRO)។ ព្រឹត្តិការណ៍នេះផ្តោតលើការបង្កើតខ្លឹមសារប្រព័ន្ធផ្សព្វផ្សាយសង្គម និងការគ្រប់គ្រងទំព័រ ដោយមានការចូលរួមយ៉ាងសកម្មពីអ្នកចូលរួមចំនួន ២៧នាក់ ក្នុងនោះ ៦នាក់ជាស្ត្រី ដែលជាតំណាងសហគមន៍នេសាទ (CFIs) សហគមន៍ស្រះជម្រកត្រី (CFRs) និងសហគមន៍តំបន់ការពារ (CPAs) នៅក្នុងខេត្តជាប់ឆ្នេរសមុទ្រទាំងបួន កំពត កែប កោះកុង និងព្រះសីហនុ។
សិក្ខាសាលានេះត្រូវបានរៀបចំឡើងក្នុងគោលបំណង៖
- បំពាក់ឱ្យអ្នកចូលរួមនូវជំនាញជាក់ស្តែងក្នុងការផលិតខ្លឹមសារប្រព័ន្ធផ្សព្វផ្សាយសង្គម រួមទាំងការប្រើប្រាស់ឧបករណ៍រចនា និងមូលដ្ឋានគ្រឹះនៃការថតរូប។
- ពង្រឹងសមត្ថភាពរបស់អ្នកចូលរួមក្នុងការបង្កើត គ្រប់គ្រង និងទាក់ទាញទស្សនិកជននៅលើទំព័រហ្វេសប៊ុក។
- ផ្តល់ការអនុវត្តជាក់ស្តែង និងបន្តការគាំទ្រ ដើម្បីអនុវត្តយុទ្ធនាការផ្សព្វផ្សាយតាមអ៊ីនធឺណិតប្រកបដោយប្រសិទ្ធភាព។
វគ្គបណ្តុះបណ្តាលពេញមួយថ្ងៃនេះមានម៉ូឌុលចំនួនបួនដែលបានរៀបចំយ៉ាងយកចិត្តទុកដាក់ និងបង្រៀនដោយមន្ត្រីផ្នែកទំនាក់ទំនងរបស់អូឌីស៊ី រួមមាន លោក វត ចាន់ណារ៉ា និងកញ្ញា សួស ធីតា។ វគ្គបណ្តុះបណ្តាលបានសង្កត់ធ្ងន់ទាំងផ្នែកបច្ចេកទេស និងយុទ្ធសាស្ត្រនៃការគ្រប់គ្រងប្រព័ន្ធផ្សព្វផ្សាយសង្គម ដែលមានបំណងបង្កើនចំណេះដឹងផ្នែកឌីជីថលក្នុងចំណោមអ្នកចូលរួម។
យើងជឿជាក់ថាជំនាញទាំងនេះនឹងអាចឱ្យសហគមន៍បង្កើនវត្តមានលើអ៊ីនធឺណិតរបស់ពួកគេ បង្កើនការយល់ដឹងជាសាធារណៈអំពីកិច្ចខិតខំប្រឹងប្រែងអភិរក្សរបស់ពួកគេ និងទាក់ទាញការយកចិត្តទុកដាក់កាន់តែខ្លាំងពីភាគីពាក់ព័ន្ធសំខាន់ៗចំពោះបញ្ហានៃការអភិវឌ្ឍន៍ប្រកបដោយចីរភាព និងអភិបាលកិច្ចសេដ្ឋកិច្ចនៅតាមឆ្នេរសមុទ្រកម្ពុជា។
សិក្ខាសាលានេះបានចាប់ផ្តើមដោយសុន្ទរកថាស្វាគមន៍ពីលោកស្រី ស៊ីវ វឌ្ឍនា ប្រធានផ្នែកស្រាវជ្រាវ និងគ្រប់គ្រងមាតិកាអូឌីស៊ី ដោយចែករំលែកដោយសង្ខេបពីគោលដៅរួមនៃគម្រោង SCAEG គោលបំណងជាក់លាក់នៃការបណ្តុះបណ្តាល និងសកម្មភាពគាំទ្រនានារបស់អូឌីស៊ីនាពេលខាងមុខ។
ដើម្បីវាយតម្លៃប្រសិទ្ធភាពនៃសិក្ខាសាលា អ្នកចូលរួមរបស់យើងទាំងអស់បានចូលរួមបំពេញការវាយតម្លៃមុន និងក្រោយការបណ្តុះបណ្តាល។ លទ្ធផលបានបង្ហាញថា ប្រហែល៨០ភាគរយ នៃអ្នកចូលរួមបានរាយការណ៍ពីការពេញចិត្តខ្ពស់ចំពោះវគ្គបណ្តុះបណ្តាល និងបង្ហាញពីឆន្ទៈក្នុងការណែនាំវាដល់សមាជិកសហគមន៍ផ្សេងទៀត។ មតិត្រលប់ក៏បានគូសបញ្ជាក់ពីភាពប្រសើរជាក់ស្តែងនៅក្នុងជំនាញរបស់ពួកគេ រួមមានការគ្រប់គ្រងទំព័រហ្វេសបុកប្រកបដោយប្រសិទ្ធភាព ការបង្កើត និងកំណត់ពេលសម្រាប់បង្ហោះមាតិកា ការប្រើប្រាស់ឧបករណ៍រចនា និងឧបករណ៍កាត់តវីដេអូដូចជា Canva និង CapCut និងការថតរូបដែលមានគុណភាពជាមួយស្មាតហ្វូន។
វគ្គបណ្តុះបណ្តាលនេះគឺជាជំហានរីកចម្រើនឆ្ពោះទៅរកការពង្រឹងសមត្ថភាពឌីជីថលរបស់អ្នកដឹកនាំសហគមន៍មូលដ្ឋាន ដោយធានាថាពួកគេមានភាពប្រសើរឡើងក្នុងការតស៊ូមតិសម្រាប់អាទិភាពបរិស្ថាន និងសេដ្ឋកិច្ចរបស់ពួកគេនៅក្នុងពិភពលោកដែលមានទំនាក់ទំនងកាន់តែខ្លាំងឡើង។
