សេចក្តីប្រកាសព័ត៌មានស្តីពី លទ្ធផលនៃការបន្តសម័យប្រជុំលើកទី៤ ព្រឹទ្ធសភា នីតិកាលទី៥
ការបន្តសម័យប្រជុំលើកទី៤ ព្រឹទ្ធសភានីតិកាលទី៥ ត្រូវបានប្រារព្ធឡើងនៅថ្ងៃទី២៤ ខែតុលា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដោយមានវត្តមានសមាជិកព្រឹទ្ធសភាចូលរួមចំនួន ៥៥រូប។ មុនពេលដំណើរការសម័យប្រជុំ ប្រធានព្រឹទ្ធសភាបានរំលឹកខួបលើកទី៣៤ នៃកិច្ចព្រមព្រៀងសន្តិភាពទីក្រុងប៉ារីស ហើយបានអះអាងថា បញ្ហាព្រំដែនកម្ពុជា-ថៃ បានដើរហួសពីកិច្ចព្រមព្រៀងនោះហើយ ជាមួយនឹងកិច្ចព្រមព្រៀងដោះស្រាយជម្លោះដែលនឹងត្រូវចុះហត្ថលេខានៅថ្ងៃទី២៦ ខែតុលា ឆ្នាំ២០២៥ ខាងមុខនេះ។ បន្ទាប់មក អង្គប្រជុំបានបន្តពិនិត្យហើយឱ្យយោបល់យល់ព្រមលើសេចក្តីព្រាងច្បាប់ចំនួន ៥ ដែលត្រូវបានអនុម័តដោយរដ្ឋសភាពីមុនរួចមកហើយ។
របៀបវារៈនីតិកម្មទាំងប្រាំត្រូវបានអនុម័តជាឯកច្ឆន្ទដោយសំឡេង ៥៥ រួមមាន៖
- កិច្ចព្រមព្រៀងស្តីពីក្របខ័ណ្ឌបទប្បញ្ញត្តិសុវត្ថិភាពម្ហូបអាហារអាស៊ាន ដែលមានគោលបំណងធានាសុខភាពអ្នកប្រើប្រាស់ និងសម្រួលដល់ការធ្វើពាណិជ្ជកម្មផលិតផលម្ហូបអាហារមានសុវត្ថិភាពក្នុងតំបន់។
- ពិធីសារធ្វើវិសោធនកម្មកិច្ចព្រមព្រៀងអាស៊ានស្តីពីបម្លាស់ទីរូបវន្តបុគ្គល ដែលធ្វើបច្ចុប្បន្នភាពលើតារាងសន្យា ដើម្បីសម្រួលដល់លំហូរជាបណ្តោះអាសន្ននៃបុគ្គលជំនាញ និងអ្នកចូលមកទស្សនកិច្ចក្នុងគោលបំណងធ្វើពាណិជ្ជកម្ម។
- ពិធីសារទីមួយ ធ្វើវិសោធនកម្មកិច្ចព្រមព្រៀងពាណិជ្ជកម្មសេរីអាស៊ាន-ហុងកុងនៃសាធារណរដ្ឋប្រជាមានិតចិន ដែលធ្វើវិសោធនកម្មជំពូកស្តីពីវិធានដើមកំណើតទំនិញ ដើម្បីលើកកម្ពស់តម្លាភាពសម្រាប់ពាណិជ្ជករ។
- ពិធីសារទីពីរ ធ្វើវិសោធនកម្មកិច្ចព្រមព្រៀងបង្កើតតំបន់ពាណិជ្ជកម្មសេរីអាស៊ាន-អូស្ត្រាលី-នូវែលសេឡង់ ដែលមានបំណងដំឡើងកម្រិតកិច្ចព្រមព្រៀង ពង្រីកឱកាសសេដ្ឋកិច្ច និងទាក់ទាញការវិនិយោគផ្ទាល់ពីបរទេសកាន់តែច្រើន។
- អនុសញ្ញាស្តីពីការបង្កើតអង្គការអន្តរជាតិសម្រាប់សន្ធានកម្ម ដែលគាំទ្រការដោះស្រាយវិវាទអន្តរជាតិដោយសន្តិវិធី និងផ្តល់យន្តការមិនមែនតុលាការដ៏បត់បែនសម្រាប់ការដោះស្រាយវិវាទពាណិជ្ជកម្ម និងវិនិយោគ។
អគ្គលេខាធិការដ្ឋានព្រឹទ្ធសភា
