សិក្ខាសាលាពិគ្រោះយោបល់ស្តីពីទិន្នន័យនិងព័ត៌មាននៃការវិនិយោគបរទេសនៅកម្ពុជា
នៅថ្ងៃទី២០ ខែធ្នូ ឆ្នាំ២០២២ អង្គការទិន្នន័យអំពីការអភិវឌ្ឍ (អូឌីស៊ី) បានរៀបចំ សិក្ខាសាលាពិគ្រោះយោបល់ស្តីពីទិន្នន័យ និងព័ត៌មាននៃការវិនិយោគបរទេសក្នុងប្រទេសកម្ពុជា នៅសណ្ឋាគារសាន់វ៉េភ្នំពេញ។ អ្នកចូលរួមចំនួន ១៥ នាក់ (ស្រី ០៣ នាក់) បានចូលរួមសិក្ខាសាលា ដែលអ្នកចូលរួមមានដូចជា តំណាងអង្គការសង្គមស៊ីវិលនិងអ្នកស្រាវជ្រាវ ដែលកំពុងធ្វើការយ៉ាងសកម្មភាពទាំងនៅថ្នាក់ជាតិ និងនៅមូលដ្ឋានទាក់ទងនឹងធុរៈកិច្ច និងសិទ្ធិមនុស្ស ការគ្រប់គ្រងធនធានធម្មជាតិ និងជនជាតិដើមភាគតិច។
គោលបំណងសំខាន់ចំនួនបីនៃសិក្ខាសាលានេះគឺដើម្បី ១) បង្ហាញពីបរិបទទូទៅនៃការវិនិយោគផ្ទាល់ពីបរទេសនៅក្នុងប្រទេសកម្ពុជា ២)របៀបចូលទៅប្រើប្រាស់ទំព័រព័ត៌មានទិន្នន័យស្តីពីការវិនិយោគបរទេសនៅក្នុងប្រទេសកម្ពុជា និងប្រមូលមតិត្រលប់ទៅលើកំណែលម្អថ្មីនៃទំព័រព័ត៌មានទិន្នន័យ និងមុខងារមួយចំនួន ៣) ជំរុញកិច្ចសហការរវាងគ្នាតាមរយៈការចែករំលែកទិន្នន័យ និងកិច្ចការស្រាវជ្រាវទៅលើប្រធានបទដែលពាក់ព័ន្ធនានា។
អ្នកស្រី ស៊ីវ វឌ្ឍនា ប្រធានផ្នែកស្រាវជ្រាវ និងគ្រប់គ្រងមាតិកាគេហទំព័រនៃអូឌីស៊ី បានផ្តល់ការស្វាគមន៍យ៉ាងកក់ក្តៅ ដោយសង្កត់ធ្ងន់លើសារៈសំខាន់នៃការវិនិយោគបរទេស និងសេដ្ឋកិច្ចនៅក្នុងប្រទេសកម្ពុជា។ គម្រោងវិនិយោគនៅក្នុងប្រទេសកម្ពុជាមានច្រើន ហើយពិបាកសម្រាប់អ្នកពាក់ព័ន្ធក្នុងការដឹងពីព័ត៌មានដែលទាក់ទងនឹងគម្រោងទាំងនោះ។ ចាប់តាំងពីដើមឆ្នាំ២០២១ អូឌីស៊ីបានចាប់ផ្តើមធ្វើការប្រមូលទិន្នន័យលើគម្រោងវិនិយោគបរទេសក្នុងប្រទេសកម្ពុជា។ អ្នកស្រីក៏បានលើកឡើងថា វាជាលើកទីបីហើយ ដែលអូឌីស៊ីបានរៀបចំសិក្ខាសាលាពិគ្រោះយោបល់ស្តីពីការវិនិយោគបរទេសក្នុងប្រទេសកម្ពុជា ដែលលើកទីមួយ គឺការសម្ពោធទំព័រព័ត៌មានទិន្នន័យនៅថ្ងៃទី២៣ ខែកុម្ភៈ ឆ្នាំ២០២២ ហើយលើកទីពីរ គឺផ្តោតលើការពង្រឹងសំណុំទិន្នន័យ និងទំព័រព័ត៌មានទិន្នន័យនៅថ្ងៃទី០១ ខែសីហា ឆ្នាំ២០២២។
“ថ្មីៗនេះ ក្រុមការងារបានប្រមូល និងធ្វើបច្ចុប្បន្នភាពសំណុំទិន្នន័យនៃទំព័រព័ត៌មានទិន្នន័យពី ១១១ ទៅ ២៧៩ គម្រោង ហើយឥឡូវនេះកំពុងធ្វើការដើម្បីបង្កើនការបង្ហាញទិន្នន័យអន្តរកម្មនៅលើទំព័រព័ត៌មានទិន្នន័យស្តីពីការវិនិយោគបរទេស។” - អ្នកស្រី ស៊ីវ វឌ្ឍនា ប្រធានផ្នែកស្រាវជ្រាវ និងគ្រប់គ្រងមាតិកាគេហទំព័រនៃអូឌីស៊ី។
របៀបវារៈសំខាន់មួយទៀតនៃសិក្ខាសាលា គឺបទបង្ហាញស្តីពីបរិបទនៃការវិនិយោគបរទេសនៅប្រទេសកម្ពុជាដោយលោក បាន ចន្ទផល្លា បណ្ណាធិការ – អ្នកស្រាវជ្រាវ ផ្នែកអភិវឌ្ឍន៍សង្គម។ បទបង្ហាញនេះផ្តោតសំខាន់លើទិដ្ឋភាពទូទៅនៃការវិនិយោគបរទេសក្នុងប្រទេសកម្ពុជា និងកត្តាលើកទឹកចិត្តសម្រាប់ការបង្កើតទំព័រព័ត៌មានទិន្នន័យស្តីពីការវិនិយោគបរទេសក្នុងប្រទេសកម្ពុជា។ ការចូលរួមចំណែករបស់ការវិនិយោគបរទេសផ្ទាល់ដល់ប្រទេសកម្ពុជាគឺធំធេងណាស់ ប៉ុន្តែទិន្នន័យលើគម្រោងវិនិយោគទាំងនោះនៅមានកម្រិត។ ព័ត៌មានស្តីពីការវិនិយោគបរទេសក្នុងប្រទេសកម្ពុជានឹងជំរុញឱ្យមានការចូលរួមពីសាធារណៈជនកាន់តែច្រើននៅក្នុងប្រធានបទវិនិយោគបរទេស លើកកម្ពស់តម្លាភាពនៃការអភិវឌ្ឍន៍ និងគណនេយ្យភាព ដែលនឹងជួយលើកកម្ពស់កំណើនប្រកបដោយចីរភាពរបស់ប្រទេសជាតិ។
លោក ហាង វិសិដ្ឋ អ្នកស្រាវជ្រាវទិន្នន័យការវិនិយោគនៃអូឌីស៊ី បានបង្ហាញពីរបៀបចូលទៅកាន់ទំព័រព័ត៌មានទិន្នន័យ។ មុនពេលបង្ហាញកំណែទី ២ នៃទំព័រព័ត៌មានទិន្នន័យ លោកបានបង្ហាញកំណែទី ១ នៃទំព័រព័ត៌មានទិន្នន័យដល់អ្នកចូលរួម ដើម្បីងាយស្រួលសម្រាប់ពួកគេក្នុងការប្រៀបធៀប និងផ្តល់ធាតុចូលរវាងទំព័រព័ត៌មានទិន្នន័យទាំងពីរ។ បើតាមអ្វីដែលលោកបានបង្ហាញនោះ កំណែទី ១ នៅតែមើលទៅអាចប្រើប្រាស់បានយ៉ាងល្អ។ ប៉ុន្តែ កំណែទី ២ អាចជួយអ្នកប្រើប្រាស់ជាច្រើននិងកាន់តែប្រសើរទាក់ទងនឹងមាតិកាស្រាវជ្រាវ ព្រឹត្តិការណ៍ប្រវត្តិសាស្ត្រ និងច្បាប់ទាក់ទងនឹងការវិនិយោគបរទេសក្នុងប្រទេសកម្ពុជា។ កំណែទី ២ ក៏ត្រូវបានបំពាក់ដោយផ្ទាំងព័ត៌មាន ដែលអនុញ្ញាតឱ្យអ្នកប្រើប្រាស់ស្វែងរកទិន្នន័យលើធាតុបួនផ្សេងគ្នា រួមមាន ទីតាំង ប្រទេសនៃការវិនិយោគ វិស័យ និងទុនវិនិយោគ។
កំណែទី ២ នៃទំព័រព័ត៌មានទិន្នន័យមិនទាន់ត្រូវបានដាក់ឱ្យដំណើរការនៅឡើយទេ ដូច្នេះអ្នកចូលរួមក្នុងសិក្ខាសាលាអាចផ្តល់ធាតុចូលនិងសំណូមពរ ដើម្បីកែលម្អរូបរាងថ្មីនៃទំព័រព័ត៌មានទិន្នន័យ។ លោក សំអាន ម៉ារឌី ប្រធានគ្រប់គ្រងផ្នែកព័ត៌មានវិទ្យា និងគេហទំព័រនៃអូឌីស៊ី បានធ្វើបទបង្ហាញខ្លីៗអំពីផែនទីគេហទំព័រនៃទំព័រព័ត៌មានទិន្នន័យថ្មី រួមមាន រចនាសម្ព័ន្ធនៃមាតិកា ផ្ទាំងព័ត៌មានអន្តរកម្ម ទស្សនីយកម្មទិន្នន័យនៃលំហូរចូលនៃការវិនិយោគបរទេសផ្ទាល់ និន្នាការវិនិយោគតាមប្រទេសនិងវិស័យ ភាពស្រដៀងគ្នា និងភាពខុសគ្នារវាងច្បាប់ចាស់និងច្បាប់ថ្មីស្តីពីការវិនិយោគ បន្ទាត់ពេលវេលានៃច្បាប់និងបទប្បញ្ញត្តិ និងព្រឹត្តិការណ៍ និងតារាងនៃសំណុំទិន្នន័យ។
សិក្ខាសាលាក៏បានឈានចូលទៅដល់វគ្គសំណួរនិងចម្លើយ ព្រោះអ្នកចូលរួមមានការចាប់អារម្មណ៍យ៉ាងខ្លាំងចំពោះសំណុំទិន្នន័យ ក៏ដូចជារូបរាងថ្មីនៃទំព័រព័ត៌មានទិន្នន័យ។ អ្នកចូលរួមជាច្រើនបានសួរទាក់ទងនឹងវិធីសាស្ត្រក្នុងការប្រមូលទិន្នន័យ ហើយពួកគេក៏បានចែករំលែកថា វាជាបញ្ហាប្រឈមសម្រាប់ពួកគេក្នុងការស្វែងរកប្រភពព័ត៌មានដែលពាក់ព័ន្ធ និងគួរឱ្យទុកចិត្តទាក់ទងនឹងគម្រោងវិនិយោគនៅក្នុងតំបន់គោលដៅរបស់ពួកគេ និងសម្រាប់គម្រោងស្រាវជ្រាវរបស់ពួកគេ។
ការពិភាក្សាជាក្រុមត្រូវបានរៀបចំជាពីរផ្នែកធំៗ ដើម្បីឱ្យអ្នកចូលរួមអាចឈ្វេងយល់យ៉ាងស៊ីជម្រៅលើទំព័រព័ត៌មានទិន្នន័យ ហើយអាចពិភាក្សា និងផ្តល់មតិក្នុងការកែលម្អ។ ផ្នែកដំបូងនៃកិច្ចពិភាក្សាបានផ្តោតលើកត្តាប្រឈមក្នុងការទទួលបានព័ត៌មានពាក់ព័ន្ធនៃគម្រោងអភិវឌ្ឍន៍ក្នុងតំបន់គោលដៅរបស់ពួកគេដោយប្រើសំណុំទិន្នន័យនៃទំព័រព័ត៌មានទិន្នន័យ។ ផ្នែកមួយទៀតនៃកិច្ចពិភាក្សាជាក្រុមបានអនុញ្ញាតឱ្យអ្នកចូលរួមចែករំលែកមតិកែលម្អ និងផ្ដល់យោបល់ទាក់ទងនឹងការរចនា និងការបង្ហាញនៃកំណែទី ២ នៃទំព័រព័ត៌មានទិន្នន័យ។
