មាគ៌ារបស់ប្រទេសកម្ពុជាទៅកាន់ច្បាប់ស្តីពីកិច្ចការពារទិន្នន័យបុគ្គល៖ ចំណុចសំខាន់ៗពី សន្និសីទជាតិលើកដំបូងរបស់កម្ពុជាស្តីពីកិច្ចការពារទិន្នន័យបុគ្គល ឆ្នាំ២០២៥
កិច្ចពិភាក្សានៅក្នុង សិក្ខាសាលាពិគ្រោះយោបល់ស្តីពីសេចក្ដីព្រាងច្បាប់ស្តីពីកិច្ចការពារទិន្នន័យបុគ្គល
នៅថ្ងៃទី៧ ខែតុលា ឆ្នាំ២០២៥ អង្គការទិន្នន័យអំពីការអភិវឌ្ឍ (អូឌីស៊ី) មានឱកាសចូលរួម សន្និសីទជាតិលើកដំបូងរបស់កម្ពុជាស្តីពីកិច្ចការពារទិន្នន័យបុគ្គល នៅរាជធានីភ្នំពេញ។ សន្និសីទជាតិនេះត្រូវបានរៀបចំឡើងដោយ ក្រសួងប្រៃសណីយ៍និងទូរគមនាគមន៍ (ក.ប.ទ.) ដោយមានការគាំទ្រពីសហភាពអឺរ៉ុប និងអង្គការអភិវឌ្ឍន៍អន្តរជាតិអាល្លឺម៉ង់ប្រចាំប្រទេសកម្ពុជា (អង្គការ GIZ) ហើយបានប្រមូលផ្តុំអ្នកជំនាញ និងគណៈវិជ្ជាជីវៈចូលរួមប្រមាណ ១៥០ នាក់។ ជាពិសេស យើងពិតជារីករាយដែលបានស្តាប់ការថ្លែងសុន្ទរកថាស្វាគមន៍ និងឃើញការគាំទ្រយ៉ាងខ្លាំងរបស់ ឯកអគ្គរដ្ឋទូតអាល្លឺម៉ង់ និងឯកអគ្គរដ្ឋទូតសហភាពអឺរ៉ុប ចំពោះគំនិតផ្តួចផ្តើមនេះ។ អូឌីស៊ី ពិតជាមានអារម្មណ៍ថារំភើបរីករាយ ដែលបានចូលរួមក្នុងដំណាក់កាលដ៏សំខាន់មួយនៃអនាគតឌីជីថលរបស់កម្ពុជា។
សន្និសីទនេះបានធ្វើឡើងក្នុងពេលវេលាដ៏សមស្របមួយ ព្រោះកម្ពុជាកំពុងរៀបចំ សេចក្ដីព្រាងច្បាប់ស្តីពីកិច្ចការពារទិន្នន័យបុគ្គល ដែលគ្រោងនឹងបញ្ចប់នៅចុងឆ្នាំ២០២៥ ឬដើមឆ្នាំ២០២៦ខាងមុខនេះ។ បរិយាកាសនៅក្នុងសន្និសីទមានលក្ខណៈរស់រវើក ហើយអ្នកចូលរួមបានពិភាក្សាពីឧត្តមានុវត្តន៍អន្តរជាតិមកអនុវត្តឱ្យសមស្របក្នុងបរិបទរបស់កម្ពុជា។
កិច្ចពិភាក្សានៅក្នុងសន្និសីទនេះ បានកើតចេញពីដំណើរការពិគ្រោះយោបល់នានាដែលកំពុងបន្ត។ កាលពីដើមឆ្នាំនេះ នៅថ្ងៃទី២៣ ខែកក្កដា ឆ្នាំ២០២៥ ក.ប.ទ. បានរៀបចំ «សិក្ខាសាលាពិគ្រោះយោបល់ស្តីពីសេចក្ដីព្រាងច្បាប់ស្តីពីកិច្ចការពារទិន្នន័យបុគ្គល» ដោយមានអ្នកចូលរួមប្រមាណ ២០០ នាក់ មកពីស្ថាប័នរាជរដ្ឋាភិបាល វិស័យឯកជន អង្គការសង្គមស៊ីវិល និងស្ថាប័នអប់រំ។ កិច្ចពិភាក្សានោះបានបង្ហាញថា កម្ពុជា រួមជាមួយមីយ៉ាន់ម៉ានិងឡាវ មិនទាន់បានអនុម័ត ច្បាប់ស្តីពីកិច្ចការពារទិន្នន័យបុគ្គល នៅឡើយ ហើយបានបញ្ជាក់ថាសេចក្តីព្រាងច្បាប់នេះគ្រោងនឹងបញ្ចប់នៅចុងឆ្នាំ២០២៥ ឬដើមឆ្នាំ២០២៦ខាងមុខនេះ។ ច្បាប់នេះត្រូវបានតាក់តែងឡើងដោយអនុលោមតាមក្របខណ្ឌច្បាប់អន្តរជាតិ និងបទប្បញ្ញត្តិជាតិ ដើម្បីធានាបាននូវសុខដុមនីយកម្មផ្នែកគតិយុត្ត និងភាពអនុវត្តបានប្រកបដោយប្រសិទ្ធិភាព។ សិក្ខាសាលានេះមានគោលបំណងប្រមូលធាតុចូលពីភាគីពាក់ព័ន្ធ ដើម្បីកំណត់ចន្លោះខ្វះខាត ចំណុចជាន់គ្នា និងផលប៉ះពាល់ដែលអាចកើតមាន ព្រមទាំងលើកកម្ពស់តម្លាភាព ទំនុកចិត្ត និងការចូលរួមប្រកបដោយបរិយាបន្ន។ នៅក្នុងអំឡុងពេលពិភាក្សា លោក ធី ទ្រី នាយកប្រតិបត្តិនៃ អូឌីស៊ី បានផ្តល់ធាតុចូល និងមតិយោបល់ ដើម្បីជួយកែលម្អសេចក្តីព្រាងច្បាប់នេះឱ្យមានភាពល្អប្រសើរជាងមុន។
កិច្ចពិភាក្សានេះក៏មានទំនាក់ទំនងទៅនឹងការងារដែលបានអនុវត្តកន្លងមកផងដែរ។ នៅថ្ងៃទី៣០ ខែវិច្ឆិកា ឆ្នាំ២០២៣ កិច្ចពិភាក្សាផ្នែកច្បាប់ដោយ មូលនិធិខុនរ៉ាដអាឌិនណៅអ៊ែរ លើកទី២២ បានផ្តោតទៅលើ «សន្តិសុខសាយប័រ និងកិច្ចការពារទិន្នន័យនៅកម្ពុជា និងលើសពីនេះ» ដោយមានបញ្ញាវ័ន និងអ្នកអនុវត្តផ្នែកច្បាប់ចូលរួមប្រមាណ ៦០ នាក់។ នៅក្នុងកម្មវិធីនេះ មូលនិធិខុនរ៉ាដអាឌិនណៅអ៊ែរ សាកលវិទ្យាល័យជាតិគ្រប់គ្រង និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានធ្វើការបោះពុម្ពផ្សាយដែលពាក់ព័ន្ធទៅនឹងប្រធានបទខាងលើ។ លោក ធី ទ្រី ក៏បានចូលរួមក្នុងកិច្ចពិភាក្សាផ្នែកច្បាប់នេះ ហើយបានផ្តល់ធាតុចូល និងមតិយោបល់លើច្បាប់ស្តីពីកិច្ចការពារទិន្នន័យ។
ប្រធានបទនៃ សន្និសីទជាតិលើកដំបូងរបស់កម្ពុជាស្តីពីកិច្ចការពារទិន្នន័យបុគ្គល ឆ្នាំ២០២៥ គឺ «ការកសាងមូលដ្ឋានគ្រឹះសម្រាប់កិច្ចការពារទិន្នន័យបុគ្គលនៅកម្ពុជា៖ ការចែករំលែកបទពិសោធន៍ពីបណ្តាប្រទេសក្នុងតំបន់និងសកល»។ អ្នកជំនាញមកពីប្រទេសសមាជិកអាស៊ានបានចែករំលែកចំណេះដឹងដ៏មានតម្លៃ ដោយលើកឡើងពីគោលការណ៍សំខាន់ៗមួយចំនួនសម្រាប់ការបង្កើតក្របខណ្ឌកិច្ចការពារទិន្នន័យដ៏រឹងមាំមួយ។ អ្នកជំនាញបានផ្តល់អនុសាសន៍ដល់ធុរកិច្ចថា មិនគួររង់ចាំរហូតដល់ច្បាប់ត្រូវបានអនុម័តនោះទេ ប៉ុន្តែគួរចាប់ផ្តើមអនុវត្តឧត្តមានុវត្តន៍អន្តរជាតិតាំងពីពេលនេះ ដែលមានដូចជា ការរៀបចំគោលនយោបាយផ្ទៃក្នុងឪ្យរឹងមាំ ការបណ្តុះបណ្តាលបុគ្គលិក និងការតែងតាំងមន្ត្រីទទួលបន្ទុកកិច្ចការពារទិន្នន័យដើម្បីត្រួតពិនិត្យការអនុលោម។ អ្នកជំនាញបានសង្កត់ធ្ងន់ថា នៅពេលដែលមានការផ្ទេរទិន្នន័យលក្ខណៈអន្តរជាតិ ធុរកិច្ចគួរតែពឹងផ្អែកលើកិច្ចសន្យាផ្លូវច្បាប់ ដើម្បីធានាឱ្យដៃគូអន្តរជាតិរបស់ពួកគេគោរពតាមស្តង់ដារការពារទិន្នន័យរឹងមាំ។ ជាមួយគ្នានេះផងដែរ ការការពារទិន្នន័យគឺពាក់ព័ន្ធទៅនឹងសិទ្ធិបុគ្គលឬម្ចាស់ទិន្នន័យ។ ច្បាប់ស្តីពីកិច្ចការពារទិន្នន័យបុគ្គល មានគោលបំណងការពារទិន្នន័យរបស់បុគ្គល និងអនុញ្ញាតឱ្យមានការប្រើប្រាស់ទិន្នន័យស្របតាមច្បាប់កំណត់ ដែលជាកត្តាសំខាន់សម្រាប់ការកំណើនសេដ្ឋកិច្ច។
របៀបវារៈនៃសន្និសីទបានគ្របដណ្តប់លើវិស័យជាច្រើន ចាប់ពីវិស័យធនាគារ និងទូរគមនាគមន៍ រហូតដល់វិស័យសិទ្ធិការពារទិន្នន័យកុមារ និងបុគ្គលិក ដោយគូសបញ្ជាក់អំពីវិធីសាស្រ្តដ៏ទូលំទូលាយដែលត្រូវការសម្រាប់អភិបាលកិច្ចទិន្នន័យប្រកបដោយប្រសិទ្ធភាព។ សន្និសីទនេះគឺជាជំហានដ៏សំខាន់មួយក្នុងការឆ្ពោះទៅរកការបង្កើតវប្បធម៌នៃទំនួលខុសត្រូវរួមសម្រាប់ការការពារទិន្នន័យនៅកម្ពុជា។ នៅពេលដែលច្បាប់ថ្មីបានបង្កើតឡើង អូឌីស៊ីនឹងបន្តតាមដានវឌ្ឍនភាពរបស់ច្បាប់នេះ ហើយលើកកម្ពស់ឱ្យមានក្របខណ្ឌការពារទិន្នន័យដែលបង្កើតទំនុកចិត្ត ការពារសិទ្ធិប្រជាពលរដ្ឋ និងគាំទ្រដល់កំណើនឌីជីថលប្រកបដោយចីរភាព។
យើងសូមអរគុណ ក.ប.ទ. សម្រាប់ឱកាសចូលរួមក្នុងសន្និសីទដ៏សំខាន់នេះ។ យើងនឹងទន្ទឹងរង់ចាំសន្និសីទបន្តបន្ទាប់ទៀត ហើយសង្ឃឹមថានឹងឃើញការអភិវឌ្ឍបន្តនៃ ច្បាប់ស្តីពីកិច្ចការពារទិន្នន័យបុគ្គល ដែលមានលក្ខណៈទូលំទូលាយសម្រាប់កម្ពុជា។
