គ.ជ.បនឹងប្រកាសលទ្ធផលបោះឆ្នោតបណ្ដោះអាសន្ននៅថ្ងៃទី១២ សីហា
មន្ត្រីគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ឱ្យដឹងថា ទោះជាការបង្កើតគណៈកម្មការចំពោះកិច្ចចម្រុះ សម្រាប់ស៊ើបអង្កេតភាពមិនប្រក្រតីក្នុងការបោះឆ្នោត នៅខ្វែងគំនិតគ្នាមិនអាចបង្កើតទៅរួចក្ដី ក៏ គ.ជ.ប នឹងប្រកាសលទ្ធផលបោះឆ្នោតជ្រើសតាំងតំណាងរាស្ត្រ សម្រាប់នីតិកាលទី៥ នៅវេលាម៉ោង ៩ព្រឹក ថ្ងៃទី១២ ខែសីហា ឆ្នាំ២០១៣។
អគ្គលេខាធិការ គ.ជ.ប លោក ទេព នីថា មានប្រសាសន៍បញ្ជាក់នៅល្ងាចថ្ងៃទី១១ សីហា ថា ការប្រកាសលទ្ធផលនេះ នឹងធ្វើឡើងតាមរយៈការផ្សាយរបស់ទូរទស្សន៍ជាតិកម្ពុជា វិទ្យុជាតិ អេហ្វ.អឹម (FM) 96 MHz និងវិទ្យុវត្តភ្នំ FM 105.70 MHz។
លោក ទេព នីថា មានប្រសាសន៍ថា បន្ទាប់ពីពិនិត្យផ្ទៀងផ្ទាត់ហ្មត់ចត់លើរបាយការណ៍ករណីភាពមិន ប្រក្រតីរួចមក គ.ជ.ប សន្និដ្ឋានថា បញ្ហាទាំងនោះអាចកើតមានឡើងមែន ទាំងការការរំខាន និងជះឥទ្ធិពលដល់អ្នកបោះឆ្នោត ការបោះឆ្នោត និងរាប់សន្លឹកឆ្នោតក្នុងកម្រិតណាមួយ។ ក៏ប៉ុន្តែ លោកថាមិនផលប៉ះពាល់អ្វីធ្ងន់ធ្ងរដល់លទ្ធផលបោះឆ្នោតទេ។
លោក ទេព នីថា៖ «មានភាពមិនប្រក្រតីមួយចំនួន តែវាមិនមានសភាពធ្ងន់ធ្ងរដែលនាំឱ្យប៉ះពាល់ទេ។ អ៊ីចឹងបាន គ.ជ.ប សម្រេចថា ករណីហ្នឹងគឺយើងបានត្រួតពិនិត្យហើយ យើងទុកឯកសារហ្នឹងមួយចំនួន ដែលយើងរកឃើញហ្នឹង អាចថាជាឯកសារមេរៀនពិសោធន៍សម្រាប់ការបោះឆ្នោតទៅថ្ងៃក្រោយ ហើយអ្វីដែលមិនប្រក្រតីនេះ ត្រូវបានប្ដឹង ហើយត្រូវបានដោះស្រាយមួយចំនួនធំហើយនៅក្នុងការប្ដឹងជាផ្លូវការ ដែលគេបានធ្វើមក ហើយ គ.ជ.ប សម្រេចនឹងប្រកាសលទ្ធផលជាបណ្ដោះអាសន្ន»។…
