អង្គការទិន្នន័យអំពីការអភិវឌ្ឍ ចាប់ផ្តើមវគ្គបណ្តុះបណ្តាលអក្ខរកម្មទិន្នន័យ
អង្គការទិន្នន័យអំពីការអភិវឌ្ឍ ហៅកាត់ថា អូឌីស៊ី ដែលជាអង្គការទិន្នន័យបើកទូលាយ បានចាប់ផ្តើមវគ្គបណ្តុះបណ្តាលអក្ខរកម្មទិន្នន័យរបស់ខ្លួន ដែលមានរយៈពេល ៥ថ្ងៃ នៅរាជធានីភ្នំពេញ ចាប់ពីថ្ងៃទី២១ ដល់ ថ្ងៃទី២៥ ខែតុលា ឆ្នាំ២០១៩។
ជាមួយជំនួយថវិកាពីគម្រោង គម្រោងពង្រឹងសមត្ថភាពអង្គការសង្គមស៊ីវិលកម្ពុជា (CCSS) របស់ទីភ្នាក់ងារជំនួយអាមេរិក (USAID) អង្គការ អូឌីស៊ី កំពុងអនុវត្តកម្មវិធី អក្ខរកម្មទិន្នន័យ ដែលមានវគ្គបណ្តុះបណ្តាលសរុបចំនួន ៣វគ្គ និងសិក្ខាបិទវគ្គមួយ។ វគ្គបណ្តុះបណ្តាលនីមួយៗមានរយៈពេលប្រាំថ្ងៃ។ វគ្គបណ្តុះបណ្តាលនីមួយៗរួមបញ្ចូល ការរៀនក្នុងថ្នាក់ ទស្សនកិច្ចសិក្សា ការណែនាំ ការសរសេរអត្ថបទដោយប្រើទិន្នន័យ និង ការបោះពុម្ពផ្សាយនៅលើគេហទំព័រ។
សិក្ខាកាមចំនួន ៣០រូប ត្រូវបានជ្រើសរើសឱ្យចូលរួមក្នុងកម្មវិធីបណ្តុះបណ្តាលនេះ ដែលសិក្ខាកាមទាំងអស់សុទ្ធតែជា អ្នកសារព័ត៌មាន មន្ត្រីទំនាក់ទំនង និង អ្នកធ្វើការក្នុងវិស័យសិក្សាស្រាវជ្រាវ។
ក្នុងកំឡុងវគ្គបណ្តុះបណ្តាល លោក ធី ទ្រី នាយកប្រតិបត្តិនៃ អង្គការ អូឌីស៊ី បានថ្លែងថា វគ្គបណ្តុះបណ្តាលស្តីពីអក្ខរកម្មទិន្នន័យនេះ នឹងប្រព្រឹត្តទៅរយៈពេល ១ឆ្នាំពេញ។ លោកបន្ថែមថា កម្មវិធីបណ្តុះបណ្តាលនេះនឹងផ្តល់ឱ្យសិក្ខាកាមនូវជំនាញ និងចំណេះដឹងអំពីការប្រើប្រាស់ទិន្នន័យ និងការសរសេរអត្ថបទដោយប្រើប្រាស់ទិន្នន័យ។
លោក បន្ថែមទៀតថា “នៅចុងបញ្ចប់នៃវគ្គបណ្តុះបណ្តាល ខ្ញុំបាទជឿជាក់ថា សិក្ខាកាមទាំងអស់ នឹងមានសមត្ថភាពប្រើប្រាស់ការនិទានរឿងប្រកបដោយភស្តុតាង ដើម្បីជួយលើកកម្ពស់ការយល់ដឹង និងការសម្រេចចិត្តប្រកបដោយចំណេះដឹង ទាក់ទងនឹងការគ្រប់គ្រងបរិស្ថាន និងធនធានធម្មជាតិនៅកម្ពុជា”។
មេរៀនចំនួនពីរដែលបានលើកយកមកក្នុងវគ្គបណ្តុះបណ្តាលទីមួយនេះរួមមាន “ពីភស្តុតាង ទៅជាអត្ថបទ” និង “ការស្វែងរកទិន្នន័យ និងទម្រង់ទិន្នន័យ”។ សិក្ខាកាមក៏បានរៀនអំពី ទិន្នន័យបើកទូលាយ សំនុំទិន្នន័យ និងការវិភាគទិន្នន័យ។
លោក យ៉ាន ណោងអ៊ុក ដែលជាគ្រូឧទ្ទេសបង្គោលនៃកម្មវិធីបណ្តុះបណ្តាលនេះ បានឱ្យដឹងថា “ក្នុងវគ្គបណ្តុះបណ្តាលទីមួយនេះ ខ្ញុំណែនាំសិក្ខាកាមអំពីវិធីសាស្ត្រមួយចំនួនក្នុងការកំណត់មុំនៃរឿង និងបង្ហាញពីរបៀបដែលទិន្នន័យក្នុងវិស័យនានាត្រូវបានប្រើសម្រាប់បង្កើតអត្ថបទដែលប្រើប្រាស់ទិន្នន័យ។
កញ្ញា ឆន រក្សា ដែលជាសិក្ខាកាមមួយរូបមកពី អង្គការតម្លារភាពកម្ពុជា បានឱ្យដឹងពីសារៈសំខាន់នៃទិន្នន័យសម្រាប់ការងារក៏ដូចជាការសម្រេចចិត្តរបស់គាត់។ គាត់និយាយថា “ខ្ញុំមានបំណងប្រើប្រាស់ទិន្នន័យឱ្យអស់ពីលទ្ធភាព តាមរយៈការស្រាវជ្រាវស្វែងរកទិន្នន័យ ដែលមានសារៈប្រយោជន៍និងមានបច្ចុប្បន្នភាព ហើយប្រើវាក្នុងការសម្រេចចិត្ត។ ឧទាហរណ៍ ការបង្កើតផែនការយុទ្ធសាស្ត្រនៅកន្លែងការងារខ្ញុំ ហើយបង្ហាញវាទៅអ្នកដទៃដើម្បីឱ្យគេស្គាល់ពីបញ្ហាដែលទាក់ទងនឹងទិន្នន័យដែរ”។ ឆ្លងកាត់វគ្គបណ្តុះបណ្តាលនេះ គាត់សង្ឃឹមថា គាត់អាចប្រើប្រាស់ជំនាញដែលបានរៀន សម្រាប់ការងារ និងការស្រាវជ្រាវរបស់គាត់ “ខ្ញុំរំពឹងថានឹងបានរៀនឧបករណ៍នានាដែលមានសារប្រយោជន៍ក្នុងការស្វែងរកទិន្នន័យ និងធ្វើឱ្យវាអាចប្រើប្រាស់បាន។ បន្ទាប់ពីវគ្គបណ្តុះបណ្តាលនេះ ខ្ញុំចង់ធ្វើឯកសារស្រាវជ្រាវមួយទាក់ទងនឹងការចូលរួមរបស់យុវជនក្នុងកម្រិតមូលដ្ឋាន តាមរយៈការប្រើប្រាស់ឧបករណ៍ និងចំណេះដែលបានរៀនពីវគ្គបណ្តុះបណ្តាលនេះ”។
នៅថ្ងៃចុងក្រោយនៃវគ្គបណ្តុះបណ្តាលនេះ លោកស្រី Catherine Cecil ប្រធាន វិទ្យាស្ថានគ្រប់គ្រង បូព៌ា-បញ្ចឹម បានថ្លែងសន្ទរកថាបិទកម្មវិធី ហើយលោកស្រីក៏បានផ្តល់កិត្តិយសចែកលិខិតបញ្ជាក់ការបញ្ចប់វគ្គបណ្តុះបណ្តាលទីមួយទៅកាន់សិក្ខាកាមផងដែរ។
វគ្គបណ្តុះបណ្តាលទីពីរ នឹងប្រព្រឹត្តិទៅពីថ្ងៃទី០២ ដល់ ទី០៦ ខែធ្នូ ឆ្នាំ២០១៩។
គួរបញ្ជាក់ផងដែរថា កម្មវិធីបណ្តុះបណ្តាលទាំងមូលមានរយៈពេល ១ឆ្នាំ គិតចាប់ពីខែកក្កដា ឆ្នាំ២០១៩ ដល់ខែកក្កដា ឆ្នាំ២០២០។ សិក្ខាកាមទាំងអស់ ត្រូវរំពឹងថា នឹងប្រើប្រាស់ចំណេះដឹងដែលទទួលបានកំឡុងវគ្គបណ្តុះបណ្តាល ដើម្បីអនុវត្តផ្ទាល់ទៅក្នុងគម្រោងរបស់ពួកគេនៅសប្តាហ៍បន្តបន្ទាប់នៃវគ្គបណ្តុះបណ្តាល។
