សិក្ខាសាលាទី២ស្តីពី៖ “មូលដ្ឋានគ្រឹះនៃការទាញយកទិន្នន័យសម្រាប់អាជីពជាអ្នកសារព័ត៌មាន”
សិក្ខាសាលាទី២ស្តីពី៖ “មូលដ្ឋានគ្រឹះនៃការទាញយកទិន្នន័យសម្រាប់អាជីពជាអ្នកសារព័ត៌មាន”
តើអ្នករកឃើញប្រធានបទ ដែលគួរឱ្យចាប់អារម្មណ៍មួយដើម្បីសរសេរហើយឬនៅ? ការប្រើប្រាស់ទិន្នន័យ អាចជួយក្នុងការសរសេរអត្ថបទរបស់អ្នកបាន! ដើម្បីស្វែងយល់បន្ថែមអំពី “ការទាញយកទិន្នន័យសម្រាប់អាជីពជាអ្នកសារព័ត៌មាន” អង្គការទិន្នន័យអំពីការអភិវឌ្ឍ បានសហការជាមួយ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ បានរៀបចំសិក្ខាសាលា រយៈពេលពីរថ្ងៃលើកទីពីរ សម្រាប់សិស្សនិស្សិត ដែលកំពុងសិក្សាផ្នែកប្រព័ន្ធផ្សព្វផ្សាយ និងសារព័ត៌មាន និងអ្នកកាសែត នៅថ្ងៃទី២៤ និង ២៥ ខែឧសភា ឆ្នាំ២០១៨។ ការធ្វើការជាមួយទិន្នន័យគឺវាពិបាកណាស់ ប៉ុន្តែជាមួយអ្នកជំនាញដែលត្រូវបានអញ្ជើញមកចូលរួមធ្វើបទបង្ហាញក្នុងសិក្ខាសាលានេះ បានជួយដល់អ្នកចូលរួមឱ្យមានសមត្ថភាពក្នុងការចាប់ផ្តើមសរសេរសាច់រឿងសារព័ត៌មានដោយខ្លួនឯងបាន។
តើអ្វីទៅជាទិន្នន័យ?
ទិន្នន័យ គឺទាក់ទងជាមួយនឹងលេខ។ ពិតប្រាកដហើយ ប៉ុន្តែវាមានអ្វីច្រើនទៀតក្រៅពីនេះ។ តើអ្នកដឹងទេថា “Tag cloud” គឺជាអ្វី ? ឬក៏អ្វីទៅដែល ហៅថា “Scraping”? មិនខុសពីសិក្ខាសាលាវគ្គមុនទេ ចាប់ផ្តើមពីមួយជំហានទៅមួយជំហាន ដំបូងអ្នកត្រូវស្វែងរកទិន្នន័យ បន្ទាប់មកអ្នកត្រូវច្រោះ និងវិភាគវា។ បន្ទាប់ពីនេះ អ្នកអាចចាប់ផ្តើមធ្វើទិន្នន័យរបស់អ្នកឱ្យក្លាយជារូបភាព (Visualization) ហើយនៅទីបញ្ចប់អ្នកអាចសរសេរអត្ថបទសារព័ត៌មានរបស់អ្នកឱ្យមានភាពទាក់ទាញបាន។ អ្នកចូលរួមមានឱកាសអានគំរូអនុវត្តល្អបំផុត ដើម្បីស្វែងយល់ពីទម្រង់អត្ថបទទិន្នន័យ ដែលមានភាពស្រដៀងគ្នា។
អ្នកចូលរួមធ្វើការសិក្សាស្វែងយល់ជាក្រុមអំពីអត្ថបទសារព័ត៌មានដែលប្រើប្រាស់ទិន្នន័យ
តោះចាប់ផ្តើម!
ដូច្នេះ យើងចាប់ផ្តើមរកទិន្នន័យ! ប៉ុន្តែតើរកនៅទីណា? លោក លេណាត ក្រុតហ្ស៊ែឃ អ្នកហាត់ការផ្នែកប្រព័ន្ធផ្សព្វផ្សាយ និងទំនាក់ទំនង នៅអង្គការអូឌីស៊ី បានបង្ហាញពីកន្លែង ដែលត្រូវស្វែងរកទិន្នន័យតាមអ៊ីនធើណែត និងផ្តល់យោបល់ច្បាស់លាស់អំពីរបៀប ដែលអ្នកអាចច្រោះទិន្នន័យដើម្បីស្វែងរកព័ត៌មានល្អបំផុតសម្រាប់រឿងរបស់អ្នក។ ដំណើរការនេះ ត្រូវចំណាយពេលច្រើន ប៉ុន្ដែសុំកុំបោះបង់! ធនធានដ៏ល្អដើម្បីស្វែងរកទិន្នន័យអំពីប្រទេសកម្ពុជា គឺជាគេហទំព័ររបស់អូឌីស៊ី។ កញ្ញា ឌុច សុធាវីន ដែលជាមន្ត្រីស្រាវជ្រាវ និងភាពជាដៃគូ នៅអង្គការអូឌីស៊ីបានបង្ហាញពី ភាពងាយស្រួលក្នុងការស្វែងរកទិន្នន័យនៅលើ គេហទំព័រនេះ និងរបៀបដែលអ្នកអាចប្រើផែនទីអន្តរកម្មជាមូលដ្ឋាន សម្រាប់សរសេរអត្ថបទសារព័ត៌មានផ្ទាល់ខ្លួនរបស់អ្នក។ ដោយមានព័ត៌មានជាក់លាក់អំពីរចនាសម្ព័ន្ធនៃសំណុំទិន្នន័យ អ្នកចូលរួមបានអនុវត្តការវិភាគទិន្នន័យដោយប្រើកម្មវិធី អេសភីអេសអេស (SPSS) ក្រោមការបង្ហាត់បង្រៀនដោយ លោក លី ជាទី ជាអ្នកគ្រប់គ្រងប្រតិបត្តិការនៅក្រុមហ៊ុន រៀល ថាម ដាតា សឹលូសិន (Real-time Data Solution co., LTD)។
លោកលេណាត កំពុងពន្យល់ពីរបៀបស្វែងរកទិន្នន័យនៅលើប្រព័ន្ធអនឡាញ
លោក ជាទី កំពុងពន្យល់ពីរបៀបវិភាគទិន្នន័យដោយប្រើប្រាស់កម្មវិធី អេសភីអេសអេស (SPSS)
ការធ្វើឱ្យទិន្នន័យក្លាយជារូបភាព៖ គួរឱ្យទាក់ទាញ និងមានខ្លឹមសារ
កំឡុងពេលសិក្ខាសាលានេះ អ្នកចូលរួមត្រូវបានជួួយគាំទ្រក្នុងការវិភាគ និងការធ្វើឱ្យទិន្នន័យក្លាយជារូបភាពស្តីពី ការអប់រំនៅកម្ពុជា ក្រោមការណែនាំដោយលោក ព្រំ ពន់វឌ្ឍន៍ អ្នកស្រាវជ្រាវទិន្នន័យ និងមន្ត្រីផ្នែក GIS របស់អូឌីស៊ី។ ប៉ុន្ដែតើខ្ញុំអាចជ្រើសក្រាហ្វមួយណាដែលល្អបំផុតសម្រាប់ប្រធានបទនេះ? នៅចុងបញ្ចប់ អ្នកចូលរួមបានរៀន និងស្វែងយល់ពីអ្វីដែលត្រូវធ្វើ និងមិនត្រូវក្នុងការធ្វើឱ្យទិន្នន័យក្លាយជារូបភាព។ ហើយកុំភ្លេចណា៖ ការធ្វើឱ្យទិន្នន័យក្លាយជារូបភាពមិនត្រឹមតែស្រស់ស្អាតគួរឱ្យទាក់ទាញទេ ប៉ុន្តែវាក៏មានមុខងារ និងបង្កប់អត្ថន័យផងដែរ!
លោកព្រំ ពន់វឌ្ឍន៍ កំពុងបង្ហាញអ្នកចូលរួមពីរបៀបធ្វើឱ្យទិន្នន័យក្លាយជារូបភាព ទាក់ទងនឹងការអប់រំដែលទាញចេញពីគេហទំព័រអូឌីស៊ី
ការចាប់ផ្តើមសរសេរអត្ថបទសារព័ត៌មាន
ខណៈដែលទិន្នន័យត្រូវបានក្លាយជារូបភាពមើលឃើញ អ្នកចូលរួមអាចចាប់ផ្តើមសរសេររឿងរ៉ាវរបស់គេ តាមបរិបទ និងវិធីសាស្ត្ររបស់គេរៀងៗខ្លួនដោយផ្អែកលើទិន្នន័យនោះ។ ដើម្បីបង្ហាញពីរបៀបបកស្រាយទិន្នន័យតាមបែបអ្នកសារព័ត៌មាន លោក គុណ ចិន្តា ពណ្ណាធីការសារព័ត៌មាន/អ្នកផលិតកម្មវិធីទូរទស្សន៍ បានណែនាំអ្នកចូលរួមពីរបៀបបកស្រាយពីទិន្នន័យរូបភាពមើលឃើញទៅជាអត្ថបទកាសែត។
លោក គុណ ចិន្តា កំពុងធ្វើបទបង្ហាញអំពីរបៀបសរសេរសារព័ត៌មានដោយភ្ជាប់ជាមួយទិន្នន័យ
ជាការពិតណាស់ អ្នកចូលរួមបានចាកចេញ ជាមួយនឹងវិញ្ញាបនបត្រ ដែលបង្ហាញពីចំណេះដឹង និងជំនាញថ្មីៗ ដែលទទួលបានពី “ការទាញយកទិន្នន័យសម្រាប់អាជីពជាអ្នកសារព័ត៌មាន”។ អ្នកទាំងអស់គ្នា មានភាពសប្បាយរីករាយជាមួយនឹងលទ្ធផល នៃគម្រោងផ្ទាល់ខ្លួនរបស់ពួកគេ ហើយយើងទាំងអ់ស់គ្នាមានក្តីរំភើបខ្លាំងណាស់ចំពោះគម្រោង ដែលផ្អែកលើទិន្នន័យទាំងអស់ ដែលនឹងកើតឡើងនាពេលអនាគត បន្ទាប់ពីសិក្ខាសាលានេះ!
អ្នកចូលរួមទទួលបានវិញ្ញាបនបត្រក្រោយបញ្ចប់សិក្ខាសាលា
តើអ្នកចង់អានវគ្គបណ្តុះបណ្តាលវគ្គមុនដែរឬទេ? អ្នកអាចអាននៅតំណនេះ៖ https://bit.ly/2Lk4QnS
