ក្រសួងបរិស្ថាន៖ សេចក្តីជូនដំណឹងស្តីពី ការផ្សព្វផ្សាយបច្ចុប្បន្នភាពឯកសារសម្រាប់គ្រប់គ្រងសុវត្ថិភាពបរិស្ថាននិងសង្គម
នៅថ្ងៃទី ១២ ខែមីនា ឆ្នាំ២០២០ ក្រសួងបរិស្ថានបានចេញផ្សាយសេចក្តីជូនដំណឹងស្តីពីការផ្សព្វផ្សាយបច្ចុប្បន្នភាពឯកសារសម្រាប់គ្រប់គ្រងសុវត្ថិភាពបរិស្ថាន និងសង្គមក្នុងការអនុវត្តគម្រោង «និរន្តភាពតំបន់ទេសភាព និងទេសចរណ៍ធម្មជាតិកម្ពុជា» ក្នុងគោលបំណងឱ្យសាធារណៈជនបានជ្រាប និងមានមតិយោបល់បន្ថែមទៀត ដើម្បីឱ្យការរៀបចំឯកសារទាំងនោះមានលក្ខណៈគ្រប់ជ្រុងជ្រោយ និងអនុវត្តបាន សំដៅធានាបាននូវនិរន្តរភាពបរិស្ថាន និងសង្គម។
ឯកសារទាំងនោះរួមមាន៖
១. ឯកសារក្របខណ្ឌដំណើរការគ្រប់គ្រងសុវត្ថិភាពសង្គម
២. ឯកសារក្របខណ្ឌគោលនយោបាយស្តីពីការដោះស្រាយផលប៉ះពាល់
៣. ឯកសារក្របខណ្ឌរៀបចំផែនការសម្រាប់ជនជាតិដើមភាគតិច និង
៤. ឯកសារក្របខណ្ឌសម្រាប់គ្រប់គ្រងសុវត្ថិភាពបរិស្ថាន និងសង្គម
នៅក្នុងសេចក្តីជូនដំណឹងនេះបានឱ្យដឹងដែរថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជានេះ ត្រូវបាននឹងកំពុងរៀបចំដោយក្រសួងបរិស្ដាន សហការជាមួយធនាគារពិភពលោក ក្រោមគម្រោងឥណទានសម្បទានរបស់ធនាគារពិភពលោក ក្នុងគោលដៅបង្កើនប្រសិទ្ធិភាពនៃការគ្រប់គ្រងធនធានធម្មជាតិ ជំរុញទេសចរណ៍ធម្មជាតិ និងសង្វាក់តម្លៃអនុផលព្រៃឈើនៅក្នុងខេត្តគោលដៅចំនួន៧ ស្ថិតក្នុងតំបន់ទេសភាពជួរភ្នំក្រវាញ និងតំបន់ជុំវិញបឹងទន្លេសាប រួមមាន ខេត្តកំពង់ស្ពឺ កោះកុង ពោធិ៍សាត់ បាត់ដំបង កំពង់ឆ្នាំង កំពង់ធំនិងខេត្តសៀមរាប។ នៅក្នុងដំណាក់កាលរៀបចំគម្រោងនេះ ការគិតគូរអំពីការគ្រប់គ្រងសុវត្ថិភាពបរិស្ថាន និងសង្គម គឺជាកត្តាចាំបាច់ដើម្បីធានាបាននូវការអភិវឌ្ឍដោយចីរភាព ក៏ដូចជានិរន្តរភាពរបស់គម្រោង។ ក្នុងករណីសាធារណៈជន និងអ្នកពាក់ព័ន្ធមានមតិយោបល់ទាក់ទងទៅនឹងឯកសារទាំង ០៤ ខាងលើ សូមមេត្តាទំនាក់ទំនងតាមរយៈទូរស័ព្ទលេខ ០៩២ ៨៧៨ ៧៨១ ឬ អ៊ីម៉ែល mom.sary@yahoo.com។
ក្រសួងបរិស្ថាន
