លទ្ធផលនៃជំនួបទ្វេភាគីរវាងនាយករដ្ឋមន្ត្រីនៃព្រះរាជាណាចក្រកម្ពុជា និងប្រធានាធិបតីនៃសាធារណរដ្ឋកូរ៉េ
កាលពីថ្ងៃទី២៧ ខែតុលា ឆ្នាំ២០២៥ ក្រសួងការបរទេស និងសហប្រតិបត្តិការអន្តរជាតិ បានចេញផ្សាយសេចក្តីប្រកាសព័ត៌មានស្តីពីលទ្ធផលនៃជំនួបទ្វេភាគីដែលបានប្រព្រឹត្តទៅនៅទីក្រុង គូឡាឡាំពួរ ប្រទេសម៉ាឡេស៊ី រវាងនាយករដ្ឋមន្ត្រីនៃព្រះរាជាណាចក្រកម្ពុជា និងប្រធានាធិបតីនៃសាធារណរដ្ឋកូរ៉េ។
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និង ឯកឧត្តម Lee Jae Myung ប្រធានាធិបតីនៃសាធារណរដ្ឋកូរ៉េ (ROK) បានអះអាងជាថ្មីនូវ ភាពជាដៃគូយុទ្ធសាស្ត្រ របស់ប្រទេសទាំងពីរ និងទំនាក់ទំនងដ៏ល្អប្រសើរដែលបានកសាងឡើងអស់រយៈពេលជិតបីទសវត្សរ៍។ ថ្នាក់ដឹកនាំទាំងពីរបានឯកភាពគ្នាបង្កើត ក្រុមការងារចម្រុះមួយនៅខែវិច្ឆិកា ដើម្បីលើកកម្ពស់កិច្ចសហប្រតិបត្តិការក្នុងការប្រយុទ្ធប្រឆាំងនឹង ឧក្រិដ្ឋកម្មឆ្លងដែន និងឧក្រិដ្ឋកម្មតាមប្រព័ន្ធអ៊ីនធឺណិត ដោយផ្តោតសំខាន់លើករណីដែលពាក់ព័ន្ធនឹងពលរដ្ឋកូរ៉េ។ ជាការឆ្លើយតបទៅនឹងការប្តេជ្ញាចិត្តដ៏វិជ្ជមាននេះ ប្រធានាធិបតី Lee បានសម្តែងនូវការគាំទ្រយ៉ាងខ្លាំងចំពោះកិច្ចសហប្រតិបត្តិការនេះ ដោយសន្យាពិចារណាដោះស្រាយ បញ្ហាពលកម្ម និង ការបន្ទាបកម្រិតនៃការប្រកាសអាសន្ននៃការធ្វើដំណើរ។ ចុងក្រោយ ភាគីទាំងពីរបានយល់ព្រមជំរុញ ទំហំពាណិជ្ជកម្មទ្វេភាគី ទាក់ទាញ ការវិនិយោគពីកូរ៉េ មកកម្ពុជា និងលើកកម្ពស់ ទំនាក់ទំនងរវាងប្រជាជន និងប្រជាជន។
ក្រសួងការបរទេស និងសហប្រតិបត្តិការអន្តរជាតិ
