សេចក្តីប្រកាសព័ត៌មាន៖ ក្លិបអ្នកកាសែតកម្ពុជា រៀបចំគណៈប្រតិភូទៅយកព័ត៌មានពីទុក្ខលំបាករបស់ជនភៀសខ្លួនស៊ីវិល ដោយសារជម្លោះព្រំដែនកម្ពុជា-ថៃ
នៅថ្ងៃទី១១ ខែធ្នូ ឆ្នាំ២០២៥ ក្លិបអ្នកកាសែតកម្ពុជា (ក.អ.ក) បានចេញសេចក្តីប្រកាសព័ត៌មានជម្រាបជូនថា ដោយសារជម្លោះព្រំដែនកម្ពុជា-ថៃ បានធ្លាក់ក្នុងស្ថានភាពកាន់តែធ្ងន់ធ្ងរបន្ទាប់ពីការវាយប្រហារជាថ្មីពីសំណាក់ទាហានថៃចាប់តាំងពីថ្ងៃទី៧ ខែធ្នូ ឆ្នាំ២០២៥ ដែលបណ្តាលឱ្យជនស៊ីវិលស្លាប់យ៉ាងហោចណាស់ ១១នាក់ និងរងរបួស ៧៤នាក់ (រួមទាំងអ្នកសារព័ត៌មាន) អំពើវាយប្រហារនេះក៏បានធ្វើឱ្យពលរដ្ឋកម្ពុជាជិត ២០ម៉ឺននាក់ក្លាយជាជនភៀសសឹក សាលារៀនជិត ៦០០ខ្នងត្រូវបានបិទទ្វារ និងសិស្សសាលាជាង ១៣ម៉ឺននាក់ត្រូវបោះបង់ការសិក្សា។ ដើម្បីផ្តល់ព័ត៌មានពិតអំពីផលប៉ះពាល់នេះ ក្លិបអ្នកកាសែតកម្ពុជានឹងដឹកនាំអ្នកសារព័ត៌មានជិត ៣០រូប មកពី ១៣ស្ថាប័ន (រួមទាំងសារព័ត៌មានផ្សាយជាភាសាបរទេស) ទៅកាន់ជំរំជនភៀសសឹកយ៉ាងហោចណាស់មួយទីតាំងក្នុងខេត្តឧត្តរមានជ័យ នៅថ្ងៃទី១២ ខែធ្នូ ឆ្នាំ២០២៥។ ក្នុងបេសកកម្មនេះ ក្លិបក៏នឹងចែកអំណោយសប្បុរសធម៌ រួមមាន៖ តង់ចំនួន ៣.០០០ សម្ភារៈប្រើប្រាស់ គ្រឿងឧបភោគបរិភោគ និងថវិកា ជូនដល់បងប្អូនជនភៀសសឹកចំនួន ១.០០០គ្រួសារផងដែរ។
ក្លិបអ្នកកាសែតកម្ពុជា
