សេចក្តីប្រកាសព័ត៌មាន ស្តីពីលទ្ធផលសម័យប្រជុំលើកទី៤ ព្រឹទ្ធសភា នីតិកាលទី៥
នៅថ្ងៃទី១៦ ខែតុលា ឆ្នាំ២០២៥ អគ្គលេខាធិការដ្ឋានព្រឹទ្ធសភាបានចេញផ្សាយនូវសេចក្តីប្រកាសព័ត៌មាន ដោយរៀបរាប់លម្អិតអំពីលទ្ធផលនៃសម័យប្រជុំលើកទី៤ ព្រឹទ្ធសភានីតិកាលទី៥ ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដោយមានវត្តមានសមាជិកព្រឹទ្ធសភាចូលរួមចំនួន ៦០រូប។ អង្គប្រជុំបានពិនិត្យរបាយការណ៍របស់គណៈកម្មាធិការអចិន្ត្រៃយ៍ ស្តីពីសកម្មភាពរបស់ព្រឹទ្ធសភានៅចន្លោះសម័យប្រជុំលើកទី៣ និងលើកទី៤ (ថ្ងៃទី៧ ខែកក្កដា ដល់ថ្ងៃទី៦ ខែតុលា ឆ្នាំ២០២៥)។
សមិទ្ធផលនីតិកម្មសំខាន់ៗរួមមាន កិច្ចប្រជុំគណៈកម្មាធិការអចិន្ត្រៃយ៍ចំនួន ៧លើក និងកិច្ចប្រជុំព្រឹទ្ធសភាវិសាមញ្ញចំនួន ៤លើក ដើម្បីពិនិត្យហើយផ្តល់យោបល់លើសេចក្តីព្រាងច្បាប់ចំនួន ៤ ព្រមទាំងបោះឆ្នោតជ្រើសតាំងសមាជិកក្រុមប្រឹក្សាជាតិប្រឆាំងអំពើពុករលួយ ១រូប។ ព្រឹទ្ធសភាក៏បានបំពេញមុខងារតំណាងផងដែរ ដោយក្រុមសមាជិកព្រឹទ្ធសភាប្រចាំភូមិភាគទាំង ៨ បានរៀបចំពិធីសំណេះសំណាលចំនួន ៣២លើក ដើម្បីតាមដានការផ្តល់សេវាសាធារណៈ ការអភិវឌ្ឍមូលដ្ឋាន និងសកម្មភាពឈ្លានពានរបស់កម្លាំងទ័ពថៃ។ លើសពីនេះ កិច្ចសហប្រតិបត្តិការអន្តរជាតិរបស់ព្រឹទ្ធសភាបន្តពង្រីកក្រោមការដឹកនាំរបស់ប្រធានព្រឹទ្ធសភា ដោយបានចូលរួមយ៉ាងសកម្មក្នុងកិច្ចការទូតសភា រួមទាំងការបំពេញទស្សនកិច្ចផ្លូវការនៅសាធារណរដ្ឋសង្គមនិយមវៀតណាម និងការពិភាក្សាជាមួយភ្ញៀវអន្តរជាតិ ក្នុងពេលដោះស្រាយជម្លោះព្រំដែនកម្ពុជា-ថៃដែលបង្កដោយភាគីថៃ។
អគ្គលេខាធិការដ្ឋានព្រឹទ្ធសភា
