សេចក្តីថ្លែងការណ៍ពិសេសរបស់អ្នកនាំពាក្យរាជរដ្ឋាភិបាល ស្តីពីសកម្មភាពឈ្លានពានរបស់ថៃនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ
អង្គភាពអ្នកនាំពាក្យរាជរដ្ឋាភិបាល នៃព្រះរាជាណាចក្រកម្ពុជា បានចេញសេចក្តីថ្លែងការណ៍ព័ត៌មានថ្កោលទោសចំពោះសកម្មភាពរបស់កងកម្លាំងសមត្ថកិច្ចថៃ កាលពីព្រឹកថ្ងៃទី១០ ខែតុលា ឆ្នាំ២០២៥ ដែលបានចោទប្រកាន់ថាបានរំលោភបំពានលើបូរណភាពទឹកដីកម្ពុជា ក្នុងភូមិព្រៃចាន់ ខេត្តបន្ទាយមានជ័យ ដោយបានធ្វើសកម្មភាពរាវមីន និងប្រើប្រាស់គ្រឿងចក្រឈូសលើដីដែលពួកគេបានព័ទ្ធរបងលួស កាលពីខែសីហា ឆ្នាំ២០២៥។
រាជរដ្ឋាភិបាលកម្ពុជាបានចាត់ទុកទង្វើនេះថាជាការរំលោភបំពានដ៏ធ្ងន់ធ្ងរ យ៉ាងកំរោល និងយ៉ាងគឃ្លើនបំផុត លើអធិបតេយ្យភាព និងបូរណភាពទឹកដីរបស់កម្ពុជា តាមរយៈការអនុវត្តច្បាប់ថៃមកលើអធិបតេយ្យភាពរបស់កម្ពុជាផងដែរ។ សេចក្តីថ្លែងការណ៍បានអះអាងថា សកម្មភាពនេះបានរំលោភលើកិច្ចព្រមព្រៀងបទឈប់បាញ់ (ថ្ងៃទី២៨ ខែកក្កដា ឆ្នាំ២០២៥) ស្មារតីនៃកិច្ចប្រជុំ GBC និង RBC អនុស្សរណៈយោគយល់គ្នា (MOU) ឆ្នាំ២០០០ និងច្បាប់មនុស្សធម៌អន្តរជាតិ ដោយបង្ខំឱ្យប្រជាពលរដ្ឋជម្លៀសខ្លួន។ កម្ពុជាទាមទារឱ្យប្រទេសថៃបញ្ឈប់ជាបន្ទាន់នូវរាល់ទង្វើរំលោភបំពាន និងអំពាវនាវដល់សហគមន៍អន្តរជាតិឱ្យថ្កោលទោសចំពោះអំពើឈ្លានពាននេះ។
អង្គភាពអ្នកនាំពាក្យរាជរដ្ឋាភិបាល
