បច្ចុប្បន្នភាពស្ដីពីស្ថានការណ៍ព្រំដែនកម្ពុជា-ថៃ ថ្ងៃទី ១៣-១៥ ខែតុលា ឆ្នាំ២០២៥
នៅថ្ងៃទី១៦ ខែតុលា ឆ្នាំ២០២៥ ក្រសួងការបរទេស និងសហប្រតិបត្តិការអន្តរជាតិ បានចេញផ្សាយពីបច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ ថ្ងៃទី១៣-១៥ ខែតុលា ឆ្នាំ២០២៥។ ថ្នាក់ដឹកនាំកម្ពុជាបានបន្តអនុវត្តកិច្ចខិតខំប្រឹងប្រែងផ្នែកការទូត ដោយសម្តេចតេជោ ហ៊ុន សែន ប្រធានព្រឹទ្ធសភា បានជួបពិភាក្សាជាមួយឧបនាយករដ្ឋមន្ត្រីម៉ាឡេស៊ី អំពីស្ថានការណ៍ព្រំដែន។ លោកក៏បានលើកឡើងពីស្ថានភាពទាក់ទងនឹងការចាក់សម្លេងខ្មោច និងសម្លេងផ្សេងៗទៀតខ្លាំងៗ ដោយភាគីថៃដែលធ្វើឱ្យប៉ះពាល់រំខានដល់ពលរដ្ឋកម្ពុជារស់នៅភូមិជោគជ័យ និងភូមិព្រៃចាន់ អស់រយៈពេលប្រមាណ ៤យប់មកហើយ។
កម្ពជាបានអះអាងជាថ្មីពីការប្តេជ្ញាចិត្តរបស់ខ្លួនក្នុងការរក្សាជំហរសន្តិភាព និងប្រកបដោយភាពអត់ធ្មត់ ដោយសង្កត់ធ្ងន់ថា ខ្លួនមិនចង់ឃើញប្រជាពលរដ្ឋនៃប្រទេសទាំងពីររងគ្រោះកាន់តែធ្ងន់ធ្ងរពីសង្គ្រាមបន្ថែមទៀតឡើយ។ ហើយកម្ពុជានៅតែបន្តស្វែងរកដំណោះស្រាយបញ្ហាតាមរយៈយន្តការទ្វេភាគី គោរពធម្មនុញ្ញអាស៊ាន ធម្មនុញ្ញអង្គការសហប្រជាជាតិ និងច្បាប់អន្តរជាតិនានា។ ជំហររបស់រដ្ឋាភិបាលកម្ពុជាគឺ «សន្តិភាពគឺជាបុរេលក្ខខណ្ឌដ៏ចាំបាច់ ដើម្បីសម្រេចបាននូវគោលបំណងរួមរបស់យើង»។ ជាមួយគ្នានេះ កម្ពុជាបានអំពាវនាវដល់ភាគីថៃឱ្យមានការដោះលែងកងទ័ពកម្ពុជាដែលត្រូវបានចាប់ឃុំខ្លួនទាំង ១៨រូប ជាបន្ទាន់ និងដោយគ្មានលក្ខខណ្ឌ ប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។
ក្រសួងការបរទេស និងសហប្រតិបត្តិការអន្តរជាតិ
