Ideathon៖ បើកផ្លូវឱ្យឱកាសថ្មីៗ
នៅពេលដែលខ្ញុំបានចូលរួមកម្មវិធី Ideathon ដំបូង ខ្ញុំមិនដែលស្រមៃថាវានឹងអាចនាំទៅដល់ដំណើរទស្សនកិច្ចសិក្សានៅប្រទេសសិង្ហបុរីនោះទេ។ ការឈ្នះក្នុងកម្មវិធី Ideathon និងការទទួលបានឱកាសនេះ គឺជាកិត្តិយសព្រមទាំងជាចំណុចរបត់មួយសម្រាប់ក្រុមរបស់ពួកយើង។ ពួកយើងបានចាប់ផ្តើមជាមួយនឹង Refair ដែលជាគំនិតសម្រាប់ឧបករណ៍មួយដែលត្រូវបានរៀបចំឡើងដើម្បីស្វែងរកភាពលំអៀងខាងយេនឌ័រនៅក្នុងសំណុំទិន្នន័យ។ ពេញមួយដំណើរដ៏មានអត្ថន័យនេះ យើងបានប្រកួតប្រជែងនឹងសម្មតិកម្មរបស់យើង ធ្វើឱ្យចក្ខុវិស័យរបស់យើងកាន់តែច្បាស់ និងបានផ្លាស់ប្តូរគំនិតនេះទៅជាដំណោះស្រាយដែលកាន់តែមានភាពប្រសើរឡើង និងមានឥទ្ធិពល។
កម្មវិធីនេះពិតជាស្វិតស្វាញតាំងពីដើមដំបូងមកម្ល៉េះ។ មានកាលកំណត់ដ៏តឹងរ៉ឹង ការពិភាក្សាឥតឈប់ឈរ និងពេលដែលសង្ស័យ ។ យ៉ាងណាក៏ដោយ ក៏មានការរំភើបផងដែរជាពិសេសនៅពេលដែលយើងបានដឹងថាគំនិតរបស់ពួកយើងបានដោះស្រាយបញ្ហាជាក់ស្តែង និងសំខាន់។ បច្ចុប្បន្ន ទិន្នន័យជំរុញការសម្រេចចិត្តជាច្រើន ប៉ុន្តែជារឿយៗភាពលំអៀងនៅក្នុងសំណុំទិន្នន័យពុំត្រូវបានគេកត់សម្គាល់ឡើយ។
នៅពេលដែលបានចាប់ផ្ដើមដំណើរការនៃការប្រកួតប្រជែង ពួកយើងបានពិភាក្សាអំពីគំនិតរបស់យើងជាមួយអ្នកណែនាំរបស់យើង គឺលោក Dixon Siu ដោយទទួលបានមតិកែលម្អដែលជំរុញឱ្យយើងគិតកាន់តែស៊ីជម្រៅ។ នៅពេលដែលគេប្រកាសថា Refair ជាគម្រោង គម្រោងដែលឈ្នះ ខ្ញុំមានអារម្មណ៍ថាមិនគួរឱ្យជឿនោះទេ។ គ្រានោះមិនមែនគ្រាន់តែជាការឈ្នះនោះទេ ប៉ុន្តែវាគឺជាការដែលដឹងថាគំនិតរបស់យើងមានសារៈសំខាន់។
មុនពេលធ្វើដំណើរទៅកាន់ប្រទេសសិង្ហបុរី ខ្ញុំពិតជារំភើបណាស់ ដោយដឹងថាបទពិសោធន៍នេះនឹងផ្តល់នូវឱកាសដ៏មានតម្លៃក្នុងការសិក្សារៀនសូត្រ និងភាពរីកចម្រើន។ ខ្ញុំបានរំពឹងថានឹងរៀនអំពីបច្ចេកវិទ្យា នវានុវត្តន៍ និងគោលនយោបាយ ប៉ុន្តែខ្ញុំមិននឹកស្មានថាបទពិសោធន៍ជាក់ស្ដែងនេះមានឥទ្ធិពលខ្លាំងមកលើខ្ញុំបែបនេះទេ។
តាំងពីពេលដែលខ្ញុំមកដល់ប្រទេសសិង្ហបុរី ខ្ញុំមានអារម្មណ៍ថាមានភាពខុសប្លែកគ្នា។ ពេញមួយដំណើរទស្សនកិច្ចសិក្សា ខ្ញុំត្រូវបានបើកបង្ហាញទៅនឹងគំនិត បច្ចេកវិទ្យា និងទស្សនៈថ្មីៗដែលបង្ហាញអំពីរបៀបដែលទិន្នន័យ ក្រមសីលធម៌ និងការទទួលខុសត្រូវក្នុងសង្គមអាចធ្វើការរួមគ្នាដើម្បីបង្កើតផលជះពិតប្រាកដ។ តាមរយៈការពិភាក្សាជាមួយអ្នកជំនាញ ខ្ញុំចាប់ផ្តើមយល់ថា ការកសាងបញ្ញាសិប្បនិម្មិតដែលមានទំនួលខុសត្រូវ មិនត្រឹមតែត្រូវការជំនាញបច្ចេកទេសដ៍រឹងមាំនោះទេ។ វាទាមទារកិច្ចសហការ ទូទាំងវិស័យ បទប្បញ្ញត្តិដ៏ស៊ីជម្រៅ ទំនាក់ទំនងដ៏រឹងមាំ និងការប្តេជ្ញាចិត្តចំពោះតម្លៃដែលផ្តោតលើមនុស្ស។ ខ្ញុំបានមើលឃើញពីរបៀបដែលសិទ្ធិឌីជីថល ការការពារទិន្នន័យ ការគ្រប់គ្រងអ៊ីនធឺណិត និងបញ្ញាសិប្បនិម្មិតដ៏គួរឱ្យទុកចិត្តមិនមែនជាប្រធានបទដាច់ដោយឡែកពីគ្នានោះទេ ប៉ុន្តែវាជាផ្នែកមួយនៃប្រព័ន្ធអេកូឡូស៊ីធំមួយដែលកំណត់ពីរបៀបដែលបច្ចេកវិទ្យាប៉ះពាល់ដល់សង្គម។
ពេលក្រឡេកមើលទៅក្រោយវិញ កម្មវិធី Ideathon និងដំណើរទស្សនកិច្ចសិក្សានេះ គឺលើសពីការប្រកួតប្រជែង ឬដំណើរកម្សាន្ត ប៉ុន្តែជាបទពិសោធន៍ផ្លាស់ប្តូរដែលបានជំរុញ ទឹកចិត្តរបស់ខ្ញុំឱ្យបន្តគំនិតដែលលើកកម្ពស់យុត្តិធម៌ និងបរិយាបន្ន ព្រមទាំងបានផ្តល់ឱ្យខ្ញុំនូវគោលបំណងកាន់តែច្បាស់ក្នុងការប្រើប្រាស់បច្ចេកវិទ្យាដើម្បីធ្វើឱ្យមានភាពខុសគ្នាជាវិជ្ជមាននៅក្នុងពិភពលោក។
ដំណើរទស្សនកិច្ចសិក្សានេះបានជួយពួកយើងឱ្យមើលឃើញ Refair ពីទស្សនៈទូលំទូលាយជាងមុន ដោយសារយើងបានដឹងថា ការបង្កើតឧបករណ៍រកឃើញភាពលំអៀងគ្រាន់តែជាជំហានដំបូងប៉ុណ្ណោះ។ ដើម្បីបង្កើតផលជះពិតប្រាកដ វាត្រូវតែស្របតាមគោលនយោបាយ និងរក្សាគោលការណ៍សីលធម៌ដ៏រឹងមាំ។ មេរៀនទាំងនេះនឹងកំណត់ដំណាក់កាលបន្ទាប់នៃការអភិវឌ្ឍរបស់ Refair។
បន្តទៅមុខទៀត ក្រុមការងាររបស់យើងមានការលើកទឹកចិត្តក្នុងការបន្តកែលម្អ Refair។ យើងមានគោលបំណងកែលម្អឧបករណ៍របស់យើងឱ្យកាន់តែមានភាពត្រឹមត្រូវ ងាយស្រួលប្រើប្រាស់ និងសមត្ថភាពក្នុងការបង្កើតការយល់ដឹងដ៏មានអត្ថន័យសម្រាប់អង្គការនានា។ យើងក៏សង្ឃឹមថានឹងសហការជាមួយភាគីពាក់ព័ន្ធជាច្រើនទៀត និងឈ្វេងយល់ពីរបៀបដែល Refair អាចគាំទ្រដល់ការអនុវត្តបញ្ញាសិប្បនិម្មិត (AI) (AI) ប្រកបដោយក្រមសីលធម៌នៅក្នុងប្រទេសកម្ពុជា និងក្រៅប្រទេស។
បទពិសោធន៍នៅក្នុងប្រទេសសិង្ហបុរីបានពង្រឹងមហិច្ឆតារបស់យើងក្នុងការចូលរួមចំណែកក្នុងការកសាងប្រព័ន្ធអេកូឡូស៊ីបញ្ញាសិប្បនិម្មិតប្រកបដោយបរិយាបន្ននៅក្នុងតំបន់របស់យើង។
ក្នុងនាមជាក្រុម ដំណើរទស្សនកិច្ចសិក្សានេះបានពង្រឹងកិច្ចសហការ និងទំនុកចិត្តរបស់ពួកយើង។ ពួកយើងបានរៀនពីរបៀបសម្របខ្លួន ការពន្យល់ពីគំនិតរបស់យើងឱ្យបានច្បាស់លាស់ និងការគិតដោយប្រុងប្រយ័ត្នទាំងផ្នែកបច្ចេកទេស និង ការងារក្នុងសង្គមរបស់យើង។ កម្មវិធី Ideathon បានបង្រៀនយើងឱ្យមានភាពធន់ ហើយដំណើរទស្សនកិច្ចសិក្សាបានជួយយើងឱ្យមើលឃើញពិភពលោកក្នុងទិដ្ឋភាពទូលំទូលាយ។
ពួកយើងសូមថ្លែងអំណរគុណយ៉ាងជ្រាលជ្រៅចំពោះ ទីភ្នាក់ងារសហប្រតិបត្តិការអាល្លឺម៉ង់ (GIZ) និង អង្គការទិន្នន័យអំពីការអភិវឌ្ឍ (អូឌីស៊ី) ដែលបានធ្វើឱ្យឱកាសនេះអាចប្រព្រឹត្តទៅបាន។ ការគាំទ្រនេះបានអនុញ្ញាតឱ្យពួកយើងទទួលបានបទពិសោធន៍ដ៏មានតម្លៃអំពីប្រព័ន្ធអេកូឡូស៊ីបច្ចេកវិទ្យា និងគោលនយោបាយរបស់ប្រទេសសិង្ហបុរី។
កម្មវិធី Ideathon និងដំណើរទស្សនកិច្ចសិក្សាគឺលើសពីសមិទ្ធផលទៅទៀត វាគឺជាបទពិសោធន៍ដែលផ្លាស់ប្តូរជីវិតរបស់ពួកយើង។ វាបានបង្ហាញអំពីគោលបំណង និងជំរុញ ទឹកចិត្តពួកយើងឱ្យបន្តធ្វើការឆ្ពោះទៅរកប្រព័ន្ធបញ្ញាសិប្បនិម្មិតប្រកបដោយយុត្តិធម៌ បរិយាបន្ន និងផ្តោតលើមនុស្ស។ ពួកយើងទន្ទឹងរង់ចាំអនុវត្តមេរៀនទាំងនេះនៅពេលដែលយើងអភិវឌ្ឍ Refair បន្ថែមទៀត និងចូលរួមជាចំណែកដល់អនាគតឌីជីថលដែលមានសមធម៌ជាងមុន។
ខ្ញុំឈ្មោះ តាំង មុយលាង ហើយខ្ញុំជានិស្សិតវិទ្យាសាស្ត្រកុំព្យូទ័រនៅសាកលវិទ្យាល័យអាមេរិកាំងភ្នំពេញ ដែលមានចំណង់ចំណូលចិត្តលើបញ្ញាសិប្បនិម្មិត (AI) និងសក្តានុពលរបស់វាក្នុងការបង្កើតផលជះដល់សង្គម។ ខ្ញុំមានឱកាសចូលរួមក្នុងកម្មវិធី បញ្ញាសិប្បនិម្មិត (AI) សម្រាប់បរិយាបន្នយេនឌ័រ ជាកន្លែងដែលខ្ញុំបានរួមចំណែកគំនិត និងស្វែងយល់ពីវិធីសាស្ត្រដែលមានមូលដ្ឋានលើបញ្ញាសិប្បនិម្មិត (AI) ដើម្បីលើកកម្ពស់សមភាព និងបរិយាបន្ន។ ខ្ញុំចូលចិត្តប្រើប្រាស់បច្ចេកវិទ្យាដើម្បីដោះស្រាយបញ្ហាដែលមានអត្ថន័យ ការរៀនសូត្រជាបន្តបន្ទាប់ និងការបង្កើតការងារដែលធ្វើ,ឱ្យមានភាពខុសគ្នាជាវិជ្ជមាន។
ក្រៅពីនេះ ខ្ញុំចាប់អារម្មណ៍ជាពិសេសចំពោះកម្មវិធី បញ្ញាសិប្បនិម្មិត (AI) ប្រកបដោយភាពច្នៃប្រឌិតដែលដោះស្រាយបញ្ហាប្រឈមក្នុងពិភពពិត។ ខ្ញុំរីកចម្រើននៅក្នុងបរិយាកាសសហការ ដែលខ្ញុំអាចរៀនពីអ្នកដទៃ និងចូលរួមចំណែកជំនាញរបស់ខ្ញុំជាមួយគម្រោងដែលមានឥទ្ធិពល។ គោលដៅរបស់ខ្ញុំគឺប្រើប្រាស់ចំណេះដឹងបច្ចេកទេស និងភាពច្នៃប្រឌិតរបស់ខ្ញុំ ដើម្បីជំរុញការផ្លាស់ប្តូរជាវិជ្ជមានតាមរយៈបច្ចេកវិទ្យា។
