ឌិន លីសីណែត៖ ការឆ្លុះបញ្ចាំងពីបទពិសោធន៍កម្មសិក្សារបស់ខ្ញុំនៅអង្គការទិន្នន័យអំពីការអភិវឌ្ឍ
ខ្ញុំធ្លាប់ជាអ្នកចូលមើលគេហទំព័រ អង្គការទិន្នន័យអំពីការអភិវឌ្ឍ (អូឌីស៊ី) ជាញឹកញាប់ដើម្បីស្វែងរកព័ត៌មានដែលទាក់ទងនឹងកម្ពុជាក៏ដូចជាសម្រាប់គោលបំណងសិក្សា។ ខ្ញុំធ្លាប់មានការងឿងឆ្ងល់ថាតើអាចសាកល្បងនៅទីនេះបានទេដោយសារខ្ញុំកម្របានជួបដំណឹងការងារ ឬកម្មសិក្សាពីស្ថាប័ននេះ។ ប៉ុន្តែខ្ញុំចង់ចែករំលែកថា អស់រយៈពេលប្រាំមួយខែកន្លងមកនេះ ខ្ញុំបានធ្វើការជាអ្នកហាត់ការផ្នែកស្រាវជ្រាវនៅអូឌីស៊ី ហើយរយះពេលដែលនៅអូឌីស៊ីនេះបានក្លាយជាបទពិសោធន៍គួរឱ្យចងចាំ និងគួរឱ្យចាប់អារម្មណ៍។
ជាដំបូង ខ្ញុំរីករាយដែលបានចូលរួមជាមួយអូឌីស៊ី ហើយក៏រីករាយដែលកម្មសិក្សានេះបានផ្តល់ឱ្យខ្ញុំនូវម៉ោងធ្វើការដ៏ងាយស្រួលនឹងកាលវិភាគរបស់ខ្ញុំ។ មុនពេលដែលមកកម្មសិក្សានេះ ខ្ញុំមានបទពិសោធន៍ពីមុនតិចតួច ដូច្នេះហើយមុននឹងចាប់ផ្តើមកម្មសិក្សានេះ ខ្ញុំបានកំណត់គោលដៅមួយចំនួនសម្រាប់ខ្លួនមានដូចជាការទទួលបានជំនាញស្រាវជ្រាវ និងបទពិសោធន៍ ដូចជាការសរសេរ ការប្រមូលទិន្នន័យ ការវិភាគ និងការបកស្រាយព័ត៌មានដែលមាននៅក្នុងដៃ ហើយសំខាន់បំផុតគឺខ្ញុំចង់ធ្វើអោយខ្លួនស្គាល់នឹងបរិយាកាសការងារនៅអង្គការ។ ក្រោមការគ្រប់គ្រងរបស់បណ្ណាធិការ - អ្នកស្រាវជ្រាវ ផ្នែកសេដ្ឋកិច្ច តួនាទី និងទំនួលខុសត្រូវរបស់ខ្ញុំគឺជួយក្រុមស្រាវជ្រាវក្នុងការប្រមូលទិន្នន័យបឋម ដូចជាការសម្ភាសន៍ និងការស្ទង់មតិ ការកត់ត្រា ការកត់ត្រាការសម្ភាសន៍ ការទាក់ទងអ្នកសម្ភាសន៍ ការសម្របសម្រួលកិច្ចប្រជុំ ជួយក្នុងការសម្របសម្រួល និងរៀបចំកម្រងសំណួរ និងការសម្ភាសន៍តាមការចាត់តាំង ហើយក៍ដូចជាជួយក្រុមស្រាវជ្រាវក្នុងការបកប្រែឯកសារខាងក្នុង និងខាងក្រៅ និងពិនិត្យផ្ទៀងផ្ទាត់ កែសម្រួលព័ត៌មាន និងចូលរួមក្នុងកិច្ចប្រជុំ សិក្ខាសាលា និងសកម្មភាពផ្សេងៗទៀត។
ចាប់ពីខែវិច្ឆិកា ខ្ញុំបានឱកាសក្នុងការជួយលើគម្រោងស្រាវជ្រាវ និងសិក្ខាសាលាមួយ ដែលនេះគឺជាបទពិសោធន៏លើកដំបូងរបស់ខ្ញុំលើគម្រោងស្រាវជ្រាវជាក់ស្តែង។ គម្រោងនេះដំណើរការបានយ៉ាងល្អ បើទោះបីជាយើងធ្វើការពីផ្ទះក្នុងអំឡុងពេលពីរខែដំបូងនៃកម្មសិក្សារបស់ខ្ញុំក៏ដោយ។ ក្រោយមកទៀត យើងបានត្រលប់ទៅការិយាល័យវិញ។ ជារៀងរាល់ថ្ងៃ ខ្ញុំមានអារម្មណ៍ថាទទួលបានការស្វាគមន៏ ហើយក្រុមទាំងមូលបានបង្ហាញនូវស្មារតីសហការ និងការខិតខំប្រឹងប្រែងដែលខ្ញុំគិតថាវាជាបទពិសោធន៏មួយដែលមិនអាចបំភ្លេចបាន។ បន្ទាប់ពីគម្រោងទី ១ នេះ ខ្ញុំបានទទួលឱកាសធ្វើការជាមួយក្រុមលើគម្រោងមួយទៀតដែលទាក់ទងនឹងអភិបាលកិច្ចការវិនិយោគនៅកម្ពុជា។ ជាផ្នែកនៃគម្រោងទី ២ នេះ ខ្ញុំបានជួយ និងសម្រួលដល់សិក្ខាសាលាដោយធ្វើជាពិធីការនីសម្របសម្រួល។ សិក្ខាសាលាគម្រោងទាំងពីរនេះបានផ្តល់ឱ្យខ្ញុំនូវចំណេះដឹងស៊ីជម្រៅជាច្រើនតាមរយៈការចែករំលែក និងការពិភាក្សាពីវាគ្មិនសំខាន់ៗ។ គម្រោងទាំងនេះបានអនុញ្ញាតឱ្យខ្ញុំយល់កាន់តែស៊ីជម្រៅអំពីបញ្ហាដែលបានបង្ហាញក៏ដូចជាបានស្គាល់ផងដែរជាមួយនឹងជំនាញនៃការគ្រប់គ្រងគម្រោង និងការសម្របសម្រួលសិក្ខាសាលា។ ការងារសំខាន់មួយទៀតដែលខ្ញុំបានធ្វើគឺការផលិតទំព័រប្រធានបទចំនួនបីសម្រាប់វែបសាយ។
បន្ទាប់ពីការវាយតម្លៃដោយខ្លួនឯង ខ្ញុំអាចនិយាយបានថាខ្ញុំបានទទួលជំនាញដ៏មានតម្លៃមួយចំនួនមកជាមួយខ្ញុំ និងបទពិសោធន៍គ្រប់គ្រងគម្រោង។ ខ្ញុំបានទទួលជំនាញ និងចំណេះដឹងដ៏មានតម្លៃមួយចំនួនជាលទ្ធផលនៃកម្មសិក្សានេះ ដែលពិតជាមានប្រយោជន៍សម្រាប់ការអភិវឌ្ឍន៍អាជីពរបស់ខ្ញុំនាពេលអនាគត។ ប៉ុន្តែគ្មានបទពិសោធន៍ណាមួយបានមកដោយគ្មានការលំបាកនោះទេ។ ខណៈពេលដែលខ្ញុំមានបទពិសោធន៍ខ្លះដែរជាមួយនឹងការសរសេរអត្ថបទស្រាវជ្រាវ បញ្ហាប្រឈមចម្បងរបស់ខ្ញុំអំឡុងកម្មសិក្សានេះគឺ ការសរសេរទំព័រប្រធានបទសម្រាប់ការបោះពុម្ពផ្សាយ។ ការសរសេរទំព័រប្រធានបទនីមួយៗគឺជាកិច្ចការដ៏លំបាកមួយ ជាពិសេសនៅពេលនិយាយអំពីការប្រមូលផ្តុំប្រភពព័ត៌មានសំខាន់ៗ និងការរៀបចំខ្លឹមសារអត្ថបទក្នុងរបៀបមួយដែលងាយស្រួលអានសម្រាប់អ្នកអានប៉ុន្តែត្រូវរក្សាអោយបាននូវលំនាំដើមនៃព័ត៌មាន។
ជាចុងក្រោយអូឌីស៊ី និងក្រុមការងារបានបន្សល់នូវភាពស្ងើចសរសើរយ៉ាងខ្លាំងមកលើខ្ញុំចំពោះគុណភាពការងាររបស់ពួកគេ និងផលប្រយោជន៍ដែលក្រុមការងារបានធ្វើតាមរយៈការងារ និងគម្រោងរបស់ពួកគេ។ ខ្ញុំច្បាស់ណាស់នឹងណែនាំកន្លែងនេះដល់អ្នកដែលចង់ទទួលបានបទពិសោធន៍នៅទីនេះ។ ចុងក្រោយ សូមអរគុណច្រើនចំពោះបទពិសោធន៍មានតម្លៃទាំងនេះ។
រូបថតអនុស្សាវរីយ៍ជុំគ្នានៅថ្ងៃបញ្ចប់កម្មសិក្សារបស់ខ្ញុំ
សីណែត ជានិស្សិតឆ្នាំទី ៤ ផ្នែកទំនាក់ទំនងអន្តរជាតិនៃវិទ្យាស្ថានភាសាបរទេស នៃសាកលវិទ្យាល័យភូមិន្ទភ្នំពេញ។ ក្នុងអំឡុងពេលកម្មសិក្សានៅអង្គការទិន្នន័យអំពីការអភិវឌ្ឍ សីណែតជួយសម្របសម្រួលក្រុមការងារដើម្បីធ្វើការស្រាវជ្រាវ ការប្រមូលទិន្នន័យ ការអភិវឌ្ឍន៍ធនធានតាមអ៊ីនធឺណិត និងភារកិច្ចផ្សេងទៀតតាមការចាត់តាំង។ សូមអានទំព័រប្រធានបទស្រាវជ្រាវរបស់នាងនៅលើគេហទំព័រអូឌីស៊ី មានដូចជា៖ ធនាគារអភិវឌ្ឍន៍អាស៊ី (ADB) ការអភិវឌ្ឍន៍ និងជំនួយសម្រាប់ការកាត់បន្ថយភាពក្រីក្រ និងសន្តិសុខស្បៀង និងការអប់រំឧត្តមសិក្សា។
