យុវតីជនជាតិដើមភាគតិចចូលរួមវេទិកាទីក្រុងប៉ារីសស្តីពីសន្តិភាពឆ្នាំ២០២២
ក្នុងនាមជាសមាជិកនៃវេទិកាអាយស៊ីធីនិងឌីជីថលកម្ពុជា (CamIDF) ខ្ញុំមានឱកាសដាក់ពាក្យចូលរួមវេទិកាទីក្រុងប៉ារីសស្តីពីសន្តិភាព (PPF) ជាលើកដំបូង។ ខ្ញុំត្រូវបានជ្រើសរើសឱ្យចូលរួមក្នុងវេទិកាលើកទីប្រាំ ក្រោមគម្រោងដែលមានចំណងជើងថា “ទិន្នន័យបើកទូលាយសម្រាប់ជនជាតិដើមភាគតិច និងជនជាតិភាគតិច“ ដែលនេះពិតជាឱកាសដ៏កម្រមួយ។ ក្នុងនាមជាជនជាតិដើមភាគតិច ខ្ញុំជឿថា ពួកយើងនឹងទទួលបានអត្ថប្រយោជន៍យ៉ាងច្រើនពីគម្រោងនេះ ព្រោះវានឹងជួយបង្កើនលទ្ធភាពទទួលបានទិន្នន័យ ព័ត៌មាន និងការគ្រប់គ្រងខ្លួនឯង។ លើសពីនេះ គម្រោងនេះត្រូវបានបង្ហាញនៅលើឆាកអន្តរជាតិ និងបានឃើញទូទាំងពិភពលោក។ ខ្ញុំមានឱកាសជួបនិយាយជាមួយអ្នកជំនាញ និងអ្នកធ្វើការសម្រេចចិត្តនៅក្នុងវិស័យនេះ។
ខ្ញុំមានសេចក្តីសោមនស្សរីករាយដែលបានស្លៀកសម្លៀកបំពាក់ជនជាតិដើមភាគតិចចូលរួមក្នុងវេទិកា និងបង្ហាញគម្រោងនេះនៅក្នុងកម្មវិធីលើកទី៥ ដែលប្រារព្ធធ្វើឡើងនៅ Palais Brongniart នៅថ្ងៃទី១១ និងថ្ងៃទី១២ ខែវិច្ឆិកា ឆ្នាំ២០២២។ វេទិកាលើកទី៥ ផ្តោតលើការពង្រឹងលម្ហពលរដ្ឋ ប្រជាពលរដ្ឋ និង សង្គមស៊ីវិល ដូច្នេះពួកគេអាចដើរតួនាទីក្នុងការកំណត់តុល្យភាពអំណាច ពីកម្រិតអភិបាលកិច្ចមូលដ្ឋានដល់សកលលោក។ លើសពីនេះទៀត គំនិតផ្តួចផ្តើមក្នុងការផ្តល់អំណាចដល់ស្ត្រី និងលើកកម្ពស់សមភាពយេនឌ័រ ត្រូវបានសង្កត់ធ្ងន់ជាពិសេស។ គម្រោងចំនួន ៧០ ត្រូវបានបង្ហាញ ហើយមានការពិភាក្សាជាក្រុមចំនួន ៨០ ដោយមានអ្នកចូលរួមចំនួន ៤,៨០០ នាក់។ ទោះបីជាសមាជិកក្រុមរបស់យើងមានការមមាញឹកជាមួយអ្នកទស្សនានៅស្តង់របស់យើងក៏ដោយ ក៏ខ្ញុំអាចប្រាប់ពីការធ្វើបទបង្ហាញរបស់ខ្ញុំថា អ្នកចូលរួមពិតជាចាប់អារម្មណ៍លើគម្រោងរបស់យើង។ ខ្ញុំបាននិយាយអំពីសហគមន៍ជនជាតិដើមភាគតិចរបស់ខ្ញុំ វប្បធម៌ ស្ថានភាពអប់រំ សម្លៀកបំពាក់។ល។ ការយល់ដឹងអំពីបញ្ហានាពេលបច្ចុប្បន្នគឺជាបទពិសោធន៍ដ៏ល្អមួយ។ យើងក៏ធ្វើការជាមួយគ្នាដើម្បីស្វែងរកដំណោះស្រាយ ជួបមនុស្សដែលមានសក្តានុពល និងមានឱកាសនិយាយជាមួយអ្នកដឹកនាំដើម្បីទទួលបានការយល់ដឹងអំពីរបៀបដែលពួកគាត់អាចដោះស្រាយបញ្ហាមុនដោយជោគជ័យ។ យើងត្រូវការអ្នកដឹកនាំដែលមានឆន្ទៈស្តាប់គំនិតច្នៃប្រឌិតថ្មី ហើយប្តេជ្ញាចិត្តយ៉ាងពិតប្រាកដក្នុងការដាក់ដំណោះស្រាយទាំងនោះទៅក្នុងការអនុវត្ត។
ខ្ញុំបាននិយាយជាមួយកញ្ញា Macarena García Charad មកពីគម្រោង “ពង្រឹងសិទ្ធអំណាចស្ត្រីតាមរយៈអាជីពក្នុងបច្ចេកវិទ្យា” ដែលមានស្តង់ទល់មុខនឹងស្តង់របស់ខ្ញុំ ប្រកបដោយការលើកទឹកចិត្ត។ គាត់គឺជាអ្នកដឹកនាំគម្រោងដែលគាំទ្រស្ត្រីក្នុងវិស័យបច្ចេកវិទ្យា និងលើកទឹកចិត្តក្រុមរបស់គាត់ឱ្យបន្តការសិក្សាផ្នែក ICT ។ នៅចុងបញ្ចប់នៃការសន្ទនារបស់យើង យើងបានចាប់ផ្តើមពិភាក្សាអំពីតម្លៃនៃបច្ចេកវិទ្យាអប់រំ។ គាត់បានប្រាប់ខ្ញុំថា គាត់ចង់បង្កើតសេដ្ឋកិច្ចឌីជីថលដែលមានលក្ខណៈពិពិធ ជាបរិយាបន្ន និងប្រកួតប្រជែងជាងមុន ដែលបើកឱកាសសម្រាប់ស្ត្រីទាំងអស់ឱ្យដឹងពីសក្តានុពលរបស់ពួកគេ។ ដោយវិធីនេះ គាត់សង្ឃឹមថានឹងជំរុញទឹកចិត្តស្ត្រីកម្ពុជា ជាពិសេសស្ត្រីជនជាតិដើមភាគតិចដែលស្នាក់នៅមជ្ឈមណ្ឌលនិស្សិតជនជាតិដើម (CCI) ដើម្បីបន្តអាជីពផ្នែកបច្ចេកវិទ្យា។ ជំរុំការងារបញ្ញាវន្តរបស់ស្ត្រីបានកំណត់បញ្ហាប្រឈមរបស់ជនជាតិដើមភាគតិច ដែលស្របតាមគោលដៅអភិវឌ្ឍន៍ប្រកបដោយចីរភាព (SDG) ដើម្បីពន្លឿនដំណោះស្រាយ។ នៅក្នុងការរៀនសូត្ររបស់ខ្ញុំទាក់ទងនឹងសន្តិសុខតាមអ៊ីនធឺណិតនៅសកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា (ខេមតិច) ខ្ញុំជឿថាការចង់ដឹងចង់ឃើញគឺមានសារៈសំខាន់ដូចគ្នាទៅនឹងការដែលចូលរួមជាផ្នែកមួយនៃដំណោះស្រាយទាំងនោះដើម្បីឱ្យពិភពលោករបស់យើងចាកចេញពីសង្គ្រាមតាមអ៊ីនធឺណិត ការគំរាមកំហែងតាមអ៊ីនធឺណិត ភាពលំអៀងនៃវិធីសាស្ត្រគណនា និងការបំប៉ោងព័ត៌មាន ហើយចូលទៅក្នុងដំណោះស្រាយឌីជីថលសកល ដែលទាំងអស់នេះធ្វើឱ្យខ្ញុំចង់ស្វែងយល់ឱ្យកាន់តែស៊ីជម្រៅ។
ជាចុងក្រោយ ខ្ញុំពិតជារីករាយដែលបានរៀនសូត្រច្រើន និងបានចូលរួមជាផ្នែកនៃព្រឹត្តិការណ៍ដ៏អស្ចារ្យនេះ។ ខ្ញុំសូមថ្លែងអំណរគុណចំពោះ CamIDF សម្រាប់ការផ្តល់ឱកាសដល់សហគមន៍ជនជាតិដើមភាគតិចក្នុងការចូលរួមក្នុងគំនិតផ្តួចផ្តើមជាសកល និងដល់អូឌីស៊ី សម្រាប់ការផ្តល់ឱកាសពិសេសនេះដល់ខ្ញុំក្នុងការនិយាយក្នុងនាមស្ត្រីជនជាតិដើមភាគតិចអំពីបញ្ហារបស់ជនជាតិដើមភាគតិចនៅក្នុងវេទិកានេះ ក៏ដូចជាការជួយមើលថែខ្ញុំបានយ៉ាងល្អ។
