វេទិកាអាយស៊ីធី និងឌីជីថលកម្ពុជា លើកទី៦៖ ការរួមបញ្ចូលគ្នានូវគំនិត និងភាពច្នៃប្រឌិត

ថ្ងៃទី ៦ ខែកញ្ញា ឆ្នាំ២០២៤
វិទ្យាសាស្ត្រ និងបច្ចេកវិទ្យា / ការអប់រំ និងការផ្សព្វផ្សាយ វិទ្យាសាស្ត្រ និងបច្ចេកវិទ្យា
វេទិកា អាយស៊ីធី និងឌីជីថល កម្ពុជា

អង្គការទិន្នន័យអំពីការអភិវឌ្ឍ (អូឌីស៊ី) បានរៀបចំវេទិកាអាយស៊ីធី និងឌីជីផលកម្ពុជា លើកទី៦ (CamIDF) នៅថ្ងៃទី២៦ និង២៧ ខែមីនា ឆ្នាំ២០២៤ នៅបណ្ឌិត្យសភាបច្ចេកវិទ្យាឌីជីថលកម្ពុជា (CADT)។ នៅក្នុងព្រឹត្តិការណ៍ដ៏មានកិត្យានុភាពនេះ គឺបានប្រមូលផ្តុំនូវក្រុមអ្នកជំនាញ អ្នកចូលចិត្ត និងអ្នកមានទស្សនៈវិស័យផ្សេងៗគ្នា ដើម្បីពិភាក្សាអំពីបញ្ហាសំខាន់ៗ និងស្វែងយល់ពីទិដ្ឋភាពឌីជីថលនៅប្រទេសកម្ពុជា រួមទាំងកត្តាដទៃលើសពីនេះទៀតផងដែរ។

រូបថតជាក្រុមនាថ្ងៃទី១ ក្នុងវេទិកាអាយស៊ីធី និងឌីជីថលកម្ពុជា លើកទី៦

ថ្ងៃទី១: ថ្ងៃនៃការសន្ទនាដ៏ស៊ីជម្រៅ

វេទិកានេះចាប់ផ្តើមដោយការបើកសុន្ទរកថាដ៏ស៊ីជម្រៅមួយដោយលោក Eric LOU ដែលជាសមាជិកនៃគណៈកម្មាធិការប្រឹក្សាយោបល់របស់ CamIDF ដែលលោកបានបង្ហាញពីភាពជាក់លាក់ សម្រាប់របៀបវារៈនៃគោលដៅគិតឆ្ពោះទៅមុខរបស់ព្រឹត្តិការណ៍នេះ និងបង្ហាញពីឥទ្ធិពលវិជ្ជមានរបស់ CamIDF រួមទាំងសារៈសំខាន់នៃវេទិកានេះផងដែរ។ ក្នុងនោះក៏មានការថ្លែងសុន្ទរកថាគន្លឹះដោយ លោក Norbert KLEIN ដែលជាសមាជិកក្រុមប្រឹក្សាភិបាលដើមរបស់អង្គការទិន្នន័យអំពីការអភិវឌ្ឍ ដោយលោកបានលើកយកប្រធានបទសំខាន់នៃ « សន្តិសុខតាមអ៊ីនធឺណិតសម្រាប់មនុស្សគ្រប់គ្នា » មកធ្វើបទបង្ហាញដោយសង្កត់ធ្ងន់ទៅលើសារៈសំខាន់នៃការការពារខ្លួនយើង រួមទាំងកូនៗរបស់យើងនៅក្នុងពិភពអនឡាញផងដែរ។

នៅក្នុងថ្ងៃនោះផងដែរ កម្មវិធីនេះបានបន្តជាមួយនឹងការធ្វើបទបង្ហាញរបស់លោកស្រីបណ្ឌិត Elisa OREGLIA អំពីលំហូរបច្ចេកវិទ្យារបស់ចិន និងលោកខាងលិចនៅក្នុងប្រទេសកម្ពុជា ដែលជំរុញឱ្យមានការគិត ការវិភាគ រួមទាំងបានផ្តល់នូវការយល់ដឹងពីភាពខុសគ្នានៃប្រព័ន្ធអេកូឌីជីថលរបស់ប្រទេសផងដែរ។ លោក Poren CHIANG សមាជិកម្នាក់ទៀតនៃគណៈកម្មាធិការប្រឹក្សាយោបល់របស់ CamIDF ក៏បានផ្តល់ដំណោះស្រាយលើបញ្ហាស្មុគស្មាញជុំវិញការគ្រប់គ្រង និងការត្រួតពិនិត្យលើបណ្តាញអ៊ីនធឺណិត ដែលបណ្តាលឱ្យមានការជជែកដេញដោលយ៉ាងសកម្មក្នុងចំណោមអ្នកចូលរួមទៀតផង។

លោកស្រីបណ្ឌិត Elisa OREGLIA ធ្វើបទបង្ហាញ “ការសិក្សាលំហូរបច្ចេកវិទ្យាចិន និងបស្ចិមប្រទេសនៅកម្ពុជា”

ចំណុចសំខាន់មួយទៀតក្នុងថ្ងៃនេះផងដែរ គឺកម្មវិធី Hackathon ស្តីអំពីការការពារកុមារតាមអ៊ីនធឺណិត និងការផ្តល់សិទ្ធិអំណាចដល់ក្មេងជំទង់ ដែលសម្របសម្រួលដោយលោក ហាង វិសិដ្ឋ និងដឹកនាំដោយក្រុមវាគ្មិនកិត្តិយសរួមមានដូចជា Hyeri HYUN, Dixon SIU, លោកគ្រូ Yoneda KENZO និងPaula BELLO។ ជាមួយនឹងជំនាញរបស់គាត់ទាំងអស់គ្នា គឺគាត់បានផ្តល់ជាការយល់ដឹងដ៏មានតម្លៃក្នុងការការពារសុខុមាលភាពឌីជីថលរបស់ក្មេងជំនាន់ក្រោយផងដែរ។

ក្នុងនោះក៏រួមមានការធ្វើបទបង្ហាញរបស់លោកស្រីបណ្ឌិត Velislava HILLMAN ស្តីពីការគ្រប់គ្រងទិន្នន័យ និងការបង្កើនឯកជនភាពទិន្នន័យ ដោយបំភ្លឺបង្ហាញពីភាពចាំបាច់នៃការការពារទិន្នន័យផ្ទាល់ខ្លួន និងទិន្នន័យអប់រំនៅក្នុងពិភពលោកដែលកំពុងតែមានទំនាក់ទំនងគ្នាកាន់តែខ្លាំងឡើងផងដែរ។ ដោយកម្មវិធីថ្ងៃនេះ ក៏បានបញ្ចប់ជាមួយនឹងការបកស្រាយបង្ហាញរបស់លោក កា រ៉ូហាស៊ីម អំពីវឌ្ឍនភាពរបស់ CamIDF និងដំណើរការវិវត្តចុងក្រោយបំផុតរបស់គម្រោង «ការបៀតបៀនតាមអ៊ីនធឺណិត» ដោយក្រុមគម្រោង Kapeerផងដែរ។ គម្រោង Kapeer ផ្តោតសំខាន់ទៅលើការផ្តល់ជំនួយផ្នែកបច្ចេកទេសទាក់ទងនឹងសកម្មភាពអនឡាញដែលអាចបង្កគ្រោះថ្នាក់ ដោយពួកគេបានបង្កើតឧបករណ៍ស្វែងរកការបៀតបៀនតាមអ៊ីនធឺណិត ដើម្បីតាមដាន និងវិភាគឧប្បត្តិហេតុនានាដូចជាការប្រើភាសាមិនសមរម្យ សារគំរាមកំហែង ការគំរាមកំហែងតាមអ៊ីនធឺណិត និងការបៀតបៀនផ្លូវភេទជាដើម។ លោក ង៉ែត ម៉ូសេ ដែលជាទីប្រឹក្សាសន្តិសុខឌីជីថលក៏បានធ្វើការពិភាក្សាក្រុមមួយទៀតលើសេចក្តីព្រាងច្បាប់ស្តីពីឧក្រិដ្ឋកម្មអ៊ីនធឺណិត ដែលអនុញ្ញាតឱ្យអង្គការក្រៅរដ្ឋាភិបាល និងក្រុមសិទ្ធិមនុស្សចូលរួមបង្ហាញការព្រួយបារម្ភអំពីសេចក្តីអះអាង ដែលអាចនឹងរឹតបន្តឹងដល់សេរីភាពនៃការបញ្ចេញមតិ ការលើកឡើងពីបញ្ហាគោលនយោបាយ និងការប្រមូលទិន្នន័យផងដែរ។

ថ្ងៃទី២៖ ការពិភាក្សាស៊ីជម្រៅ និងការសន្ទនាប្រកបដោយថាមវន្ត

នាថ្ងៃទីពីរនៃព្រឹត្តិការណ៍ CamIDF លើកទី៦ បានចាប់ផ្តើមជាមួយនឹងការសង្ខេបឡើងវិញនៃសកម្មភាពនៅថ្ងៃទី១។ ក្នុងនោះកញ្ញា Rawon JANG ដែលអញ្ជើញមកពីទីភ្នាក់ងារសង្គមព័ត៌មានជាតិ (NIA) បានបើកថ្ងៃនៃកម្មវិធីជាមួយនឹងការធ្វើបទបង្ហាញស្តីពីគោលនយោបាយទិន្នន័យរដ្ឋាភិបាលបើកចំហរបស់ប្រទេសកូរ៉េ និងវិបផតថលទិន្នន័យ (data.go.kr) ដោយបង្ហាញពីការបោះជំហានទៅមុខ ធ្វើឡើងនៅក្នុងលទ្ធភាពដែលអាចប្រើប្រាស់បាននូវទិន្នន័យសាធារណៈ និងតម្លាភាព។

បន្ទាប់មកទៀត វេទិកានេះក៏បានបង្វែរចំណាប់អារម្មណ៍ដោយផ្តោតសំខាន់ទៅលើចំនុចប្រសព្វនៃទិន្នន័យផ្ទាល់ខ្លួន និងបច្ចេកវិទ្យាវិញ ដោយលោក Dixon SIU លោក សុង ម៉េងថុង និងលោក ឡី កំថូង ដោយការធ្វើបទបង្ហាញទៅលើ MyData, CheckinMe និង CamDX ផងដែរ។ ការផ្ដល់នូវចំណេះដឹងរបស់វាគ្មិនទាំង ៣ អំពីភាពជាម្ចាស់នៃទិន្នន័យ និងសន្តិសុខតាមអ៊ីនធឺណិត មិនត្រឹមតែធ្វើឡើងឋិតក្នុងពេលវេលាដ៏សមស្របមួយប៉ុណ្ណោះទេ ប៉ុន្តែវាក៏ជាចំណុចសំខាន់សម្រាប់ទិដ្ឋភាពឌីជីថលកម្ពុជាឥឡូវនេះផងដែរ។

លោក សុង ម៉េងថុង និងលោក ឡី កំថូង បានធ្វើការបង្ហាញពី CamDX និង CheckinMe

ទស្សនវិស័យរបស់យុវជនត្រូវបានយកមកបង្ហាញជាមួយនឹងការធ្វើបទបង្ហាញលើវេទិកាអភិបាលកិច្ចអ៊ីន ធឺណិតសម្រាប់យុវជន ឆ្នាំ២០២៤ និងកម្ពុជា អាយស៊ីធីខែម ដោយសមាជិកគណៈកម្មាធិការរៀបចំ YIGF រួមមានលោក ហេង សុខឡាយ កញ្ញា សុខាច័ន្ទ សុជាតា និងលោក សុខ ហាំងឃាង។ ដោយការចូលរួមរបស់ពួកគេក៏បានបញ្ជាក់ពីការប្តេជ្ញាចិត្តរបស់វេទិកាក្នុងការអប់រំអ្នកដឹកនាំឌីជីថលជំនាន់ក្រោយផងដែរ។

ក្នុងនោះលោកស្រីបណ្ឌិត Velislava HILLMAN និងលោក Dixon SIU ក៏បានដឹកនាំសិក្ខាសាលាអន្តរកម្មមួយដែលស្តីពីឯកជនភាពទិន្នន័យ ចំណេះដឹង រួមទាំងជំនាញទិន្នន័យ និងការរៀបចំទិន្នន័យនៃការអប់រំ ដែលវគ្គបណ្តុះបណ្តាលនេះបានផ្តល់ឱ្យអ្នកចូលរួមនូវជំនាញ និងចំណេះដឹងជាក់ស្តែង ដែលជាការផ្តល់សិទ្ធិអំណាចឱ្យពួកគេអាចរុករកពីភាពស្មុគស្មាញនៃទិន្នន័យឌីជីថលប្រកបដោយទំនុកចិត្តផងដែរ។

ក្នុងនោះលោក សំអាន ម៉ារឌី ក៏បានណែនាំអ្នកចូលរួមឱ្យចូលទៅកាន់ Learning Platform របស់អង្គការទិន្នន័យយអំពីការអភិវឌ្ឍ និងឈ្វេងយល់ពីរបៀបរួមចំណែកផ្ដល់ទិន្នន័យនៅក្នុងនោះ ដោយលើកឡើងពីសារៈសំខាន់នៃធនធានអប់រំក្នុងយុគសម័យឌីជីថលជាដើម។ ហើយវេទិកានេះក៏បានស្វាគមន៍ចំពោះការចូលរួមតាមប្រព័ន្ធអនឡាញពី Zaïda RIVAI ដែលបានលើកឡើងអំពីបញ្ហាសំខាន់នៃភាពលំអៀងនៃយេនឌ័រនៅក្នុង Generative AI ហើយក្នុងនោះ Paul-Olivier DEHAYE Dehaye ដែលជានាយកប្រតិបត្តិនៃ hestia.ai ក៏បានទាក់ទាញចំណាប់អារម្មណ៍អ្នកចូលរួមជាមួយនឹងការបង្ហាញអំពីរបៀបប្រើប្រាស់បញ្ញាសិប្បនិម្មិតផងដែរ។នៅពេលដែលព្រឹត្តិការណ៍បានខិតជិតដល់ទីបញ្ចប់ លោក Poren CHIANG ក៏បានថ្លែងសុន្ទរកថាបិទកម្មវិធី ដោយបង្ហាញពីស្មារតីនៃកិច្ចសហការ និងការច្នៃប្រឌិត ដែលបានកំណត់ក្នុងវេទិកានេះ ហើយសុន្ទរកថារបស់លោកជាការបញ្ចប់ដ៏មានន័យមួយ ដល់ការចែករំលែកចំណេះដឹង និងការបង្កើតនូវសហគមន៍មួយក្នុងរយៈពេលពីរថ្ងៃកន្លងមកនេះ។ ឥទ្ធិពលរបស់វេទិកាអាយស៊ីធី និងឌីជីថលកម្ពុជា លើកទី៦ (CamIDF) បានលាតសន្ធឹងលើសពីព្រឹត្តិការណ៍រយៈពេលពីរថ្ងៃនេះទៀត ដោយវាបានបង្កើតនូវចលនាមួយដ៏មានឥទ្ធិពលដែលសន្យាថានឹងផ្លាស់ប្តូរទិដ្ឋភាពឌីជីថលរបស់ប្រទេសកម្ពុជាតាមវិធីដ៏ប្រសើរបំផុតមួយផងដែរ។

ការផ្តល់អំណាចដល់បុគ្គល និងសហគមន៍

នៅកម្រិតបុគ្គល CamIDF បានផ្តល់ឱ្យអ្នកចូលរួមជាមួយនឹងចំណេះដឹង និងជំនាញដែលមានសារៈសំខាន់ក្នុងយុគសម័យឌីជីថល និងការពិភាក្សាអំពីសុវត្ថិភាពតាមអ៊ីនធឺណិត ឯកជនភាពទិន្នន័យ និងការគ្រប់គ្រងអ៊ីនធឺណិត ដែលបានផ្តល់ឱ្យពួកគេនូវឧបករណ៍ដើម្បីការពារអត្តសញ្ញាណឌីជីថលរបស់ពួកគេ និងធ្វើឱ្យការរុករកទៅក្នុងពិភពអនឡាញកាន់តែមានសុវត្ថិភាព និងទំនុកចិត្ត។

ជំរុញការច្នៃប្រឌិត និងកិច្ចសហការ

វេទិកានេះក៏បានជំរុញស្មារតីនៃការច្នៃប្រឌិត និងកិច្ចសហការផងដែរ។ ដោយកម្មវិធី Hackathon ស្តីពីការការពារកុមារតាមអ៊ីនធឺណិត និងការផ្តល់សិទ្ធិអំណាចដល់ក្មេងជំទង់ គឺជាឧទាហរណ៍ដ៏សំខាន់មួយអំពីរបៀបប្រមូលផ្តុំនូវគំនិតចម្រុះ ដែលអាចនាំទៅរកដំណោះស្រាយប្រកបដោយភាពច្នៃប្រឌិតសម្រាប់បញ្ហាស្មុគស្មាញបាន ហើយកិច្ចខិតខំប្រឹងប្រែងរួមគ្នាបែបនេះពិតជាមានសារៈសំខាន់យ៉ាងខ្លាំងសម្រាប់ការជំរុញវឌ្ឍនភាពក្នុងវិស័យអាយស៊ីធី។

ឥទ្ធិពលលើគោលនយោបាយ និងអភិបាលកិច្ច

ការយល់ដឹងដែលចែករំលែកនៅ CamIDF ទំនងជាមានឥទ្ធិពលលើគោលនយោបាយ និងអភិបាលកិច្ចទាក់ទងនឹងអាយស៊ីធីនៅកម្ពុជាក្នុងទ្រង់ទ្រាយធំ។ បទបង្ហាញស្តីពីគោលនយោបាយទិន្នន័យបើកចំហរបស់រដ្ឋាភិបាល និងគំនិតផ្តួចផ្តើម MyData បានផ្តល់ជាគម្រោងចម្បងសម្រាប់តម្លាភាព និងអភិបាលកិច្ចផ្តោតលើពលរដ្ឋ ដែលអាចអនុម័តបានដោយអ្នកបង្កើតគោលនយោបាយ។

ការផ្សារភ្ជាប់គម្លាតយេនឌ័រ

CamIDF ក៏បានបោះជំហានទៅមុខក្នុងការផ្សារភ្ជាប់គម្លាតយេនឌ័រក្នុងវិស័យអាយស៊ីធីផងដែរ។ តាមរយៈការធានាឱ្យមានការចូលរួមរបស់ស្ត្រី និងការដោះស្រាយបញ្ហាដូចជាភាពលំអៀងយេនឌ័រនៅក្នុងបញ្ញាសិប្បនិម្មិត។ វេទិកានេះក៏បានលើកឡើងពីសារៈសំខាន់នៃបរិយាបន្ននៅក្នុងបច្ចេកវិទ្យាផងដែរ។

វឌ្ឍនភាពនៃការអប់រំ

សេចក្តីណែនាំនៃ Learing Platform របស់អង្គការទិន្នន័យអំពីការអភិវឌ្ឍ និងការរួមចំណែកទិន្នន័យ បកស្រាយដោយ លោក សំអាន ម៉ារឌី គឺជាជំហានឆ្ពោះទៅរកការលើកកម្ពស់ការអប់រំតាមរយៈបច្ចេកវិទ្យា។ Learning Platform នេះអាចក្លាយជាមូលដ្ឋានគ្រឹះសម្រាប់ការសិក្សាដោយខ្លួនឯង និងការអភិវឌ្ឍជំនាញសម្រាប់ប្រជាជនកម្ពុជាជាច្រើនផងដែរ។

កិច្ចសហការអន្តរជាតិ

ការចូលរួមរបស់អ្នកជំនាញអន្តរជាតិដូចជា Rawon JANG, Paul-Olivier DEHAYE និងបុគ្គលសំខាន់ផ្សេងៗទៀតជាច្រើនដោយផ្ទាល់ និងអនឡាញ បានគូសបញ្ជាក់ពីតួនាទីរបស់វេទិកាក្នុងការសម្របសម្រួលដល់កិច្ចសហការអន្តរជាតិ ហើយអន្តរកម្មនេះអាចនាំទៅរកភាពជាដៃគូអន្តរជាតិ និងការផ្លាស់ប្តូរចំណេះដឹង ដែលជួយពង្រឹងដល់សមត្ថភាពឌីជីថលរបស់កម្ពុជាផងដែរ។ យើងសូមថ្លែងអំណរគុណយ៉ាងជ្រាលជ្រៅបំផុតចំពោះបណ្ឌិត្យសភាបច្ចេកវិទ្យាឌីជីថលកម្ពុជា – វិទ្យាស្ថានស្រាវជ្រាវឌីជីថល និងនវានុវត្តន៍ សម្រាប់ភាពជាដៃគូដ៏រឹងមាំ។ ការប្ដេជ្ញាចិត្ត និងការសហការគ្នានេះ គឺជាចំណុចសំខាន់មួយក្នុងភាពជោគជ័យនៃការខិតខំរបស់យើងទាំងអស់គ្នាផងដែរ។ សូមថ្លែងអំណរគុណយ៉ាងជ្រាលជ្រៅចំពោះក្រុមប្រឹក្សាស្រាវជ្រាវរបស់សហភាពអឺរ៉ុប សម្រាប់ការគាំទ្រដ៏ពេញទំហឹងរបស់ពួកគេតាមរយៈគម្រោងស្រាវជ្រាវ Digisilk ហើយក្រោមការដឹកនាំពោរពេញដោយសមត្ថភាពរបស់លោកស្រីបណ្ឌិត Elisa OREGLIA។ គម្រោងនេះបានក្លាយជាសញ្ញានៃភាពច្នៃប្រឌិត និងឧត្តមភាព។ យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះមជ្ឈមណ្ឌលសម្រាប់សហគ្រាសឯកជនអន្តរជាតិ (CIPE) សំរាប់ការផ្តល់ការណែនាំដ៏មានតម្លៃ និងជំនួយផ្សេងៗ។ រាល់ការយកចិត្តទុកដាក់របស់ CIPE ក្នុងការជំរុញសហគ្រាសអន្តរជាតិ គឺពិតជាគួរឱ្យកោតសរសើរក្រៃលែង។

សូមថ្លែងអំណរគុណយ៉ាងជ្រាលជ្រៅចំពោះក្រុមហ៊ុន Fujitsu សម្រាប់ការគាំទ្រ និងការផ្ដល់នូវជំនាញវិជ្ជាជីវៈ ដែលការរួមចំណែករបស់ក្រុមហ៊ុន Fujitsu បានពង្រឹងនូវគុណភាព និងឥទ្ធិពលយ៉ាងខ្លាំងដល់ការងាររបស់យើង។

ជាចុងក្រោយ យើងសូមថ្លែងអំណរគុណយ៉ាងជ្រាលជ្រៅចំពោះអង្គការយូនីសេហ្វកម្ពុជា សម្រាប់ការគាំទ្រ និងការការពារសិទ្ធិ និងសុខុមាលភាពរបស់កុមារ។ ការចូលរួមរបស់អង្គការយូនីសេហ្វកម្ពុជាពិតជាមានសារៈសំខាន់ក្នុងការពង្រីកឥទ្ធិពលវិជ្ជមាននៃព្រឹត្តិការណ៍របស់យើងទៅកាន់សាធារណជនកាន់តែច្រើន។

ជាមួយគ្នាដែរ ភាពជាដៃគូ និងការគាំទ្រទាំងនេះមិនត្រឹមតែបានរួមចំណែកដល់ភាពជោគជ័យនៃព្រឹត្តិការណ៍របស់យើងប៉ុណ្ណោះទេ ប៉ុន្តែថែមទាំងបានពង្រឹងការតាំងចិត្តរបស់យើងក្នុងការបន្តបេសកកម្មឱ្យឆ្ពោះទៅមុខទៀតផងដែរ។ យើងពិតជាមានកិត្តិយសយ៉ាងខ្លាំង ដែលមានអ្នកគាំទ្រដ៏ល្អៗបែបនេះឈរនៅជាមួយយើង។

ព្រឹត្តិការណ៍ CamIDF លើកទី៦ មិនត្រឹមតែជាការប្រមូលផ្តុំនៃគំនិតប៉ុណ្ណោះទេ ប៉ុន្តែវាក៏ជាកត្តាជំរុញឱ្យមានការផ្លាស់ប្តូរផងដែរ។ ដោយក្នុងនោះវាបានជំរុញឱ្យមានការសន្ទនាដែលនឹងបន្តមានសន្ទុះក្នុងសហគមន៍ ជំរុញសកម្មភាព និងការច្នៃប្រឌិត។ ក្នុងពេលដែលប្រទេសកម្ពុជាបន្តរុករកការផ្លាស់ប្តូរឌីជីថលរបស់ខ្លួន គោលការណ៍ និងគំនិតដែលត្រូវបានជំរុញនៅ CamIDF ប្រាកដជានឹងដើរតួយ៉ាងសំខាន់ក្នុងការបង្កើតអនាគតឌីជីថលដ៏រឹងមាំ ប្រកបដោយបរិយាបន្ន និងភាពរីកចម្រើន។

លោកស្រីបណ្ឌិត Velislava HILLMAN និង Norbert KLEIN កំពុងសន្ទនាគ្នាអំឡុងពេលសំរាក

រូបថតក្រុមមួយទៀតក្នុងវេទិកាអាយស៊ីធី និងឌីជីថលកម្ពុជា លើកទី៦

​ថ្ងៃ​ទី​១:​ ថ្ងៃ​នៃ​ការ​សន្ទនា​ដ៏​ស៊ីជម្រៅ​

​ថ្ងៃ​ទី​២៖​ ការ​ពិភាក្សា​ស៊ីជម្រៅ​ និង​ការ​សន្ទនា​ប្រកបដោយ​ថាមវន្ត​

ការ​ផ្តល់​អំណាច​ដល់​បុគ្គល​ និង​សហគមន៍​