ការពង្រឹងសហគមន៍នេសាទតាមរយៈអក្ខរកម្មទិន្នន័យ
នៅថ្ងៃទី៣ និងទី៤ ខែកញ្ញា ឆ្នាំ២០២៥ អង្គការទិន្នន័យអំពីការអភិវឌ្ឍ (អូឌីស៊ី) បានបើកវគ្គបណ្តុះបណ្តាលរយៈពេលពីរថ្ងៃស្តីពី អក្ខរកម្មទិន្នន័យសម្រាប់សមាជិកសហគមន៍នេសាទនៅខេត្តកំពត។ វគ្គបណ្តុះបណ្តាលនេះមានសិក្ខាកាមចូលរួមចំនួន២០នាក់ ក្នុងនោះមានស្ត្រី១០នាក់មកពីសមាជិកសហគមន៍នេសាទក្នុងខេត្តកំពត និងខេត្តកែប។ គោលដៅចម្បងនៃវគ្គបណ្តុះបណ្តាលគឺដើម្បីពង្រឹងសមត្ថភាពរបស់អ្នកចូលរួមក្នុងការយល់ដឹង និងប្រើប្រាស់ទិន្នន័យទាក់ទងនឹងសហគមន៍របស់ពួកគេ និងណែនាំពួកគេអំពីឧបករណ៍ឌីជីថលដែលគាំទ្រដល់កិច្ចខិតខំប្រឹងប្រែងការពារ និងអភិវឌ្ឍន៍សហគមន៍។
វគ្គបណ្តុះបណ្តាលនេះត្រូវបានបែងចែកជាបីផ្នែកសំខាន់ៗ៖ ចំណេះដឹងមូលដ្ឋានអំពីទិន្នន័យ អន្តរកម្មជាមួយទិន្នន័យនៅលើវេបសាយអូឌីស៊ី និងការគ្រប់គ្រងទិន្នន័យផែនទីដោយប្រើប្រាស់កម្មវិធី Avenza។ នៅក្នុងវគ្គទីមួយ អ្នកចូលរួមបានស្វែងយល់ពីសារៈសំខាន់នៃទិន្នន័យដែលប្រមូលបានតាមរយៈសកម្មភាពសហគមន៍ប្រចាំថ្ងៃ។ តាមរយៈការពិភាក្សាសាមញ្ញ និងឧទាហរណ៍ដែលទាក់ទងគ្នា អ្នកចូលរួមបានរៀនពីរបៀបដែលព័ត៌មាននេះអាចត្រូវបានប្រើដើម្បីកែលម្អផែនការអាជីវកម្ម គ្រប់គ្រងធនធានធម្មជាតិ និងការពារបរិស្ថានក្នុងតំបន់របស់ពួកគេ។ នៅពេលដែលគ្រូបណ្តុះបណ្តាលបានពន្យល់ពីរបៀបដែលទិន្នន័យភ្ជាប់ទៅសកម្មភាពមួយចំនួនដូចជា ការចាប់ត្រី ការល្បាតក្នុងសហគមន៍ ឬសកម្មភាពខុសច្បាប់ អ្នកចូលរួមអាចភ្ជាប់ខ្លួនទៅនឹងឧទាហរណ៌បានភ្លាមៗ និងចែករំលែកបទពិសោធន៍ផ្ទាល់ខ្លួនរបស់ពួកគេផងដែរ។
វគ្គទីពីរបានណែនាំអ្នកចូលរួមទៅកាន់វេបសាយរបស់អូឌីស៊ី និងណែនាំពួកគេអំពីរបៀបស្វែងរក ចូលប្រើប្រាស់ និងធ្វើអន្តរកម្មជាមួយទិន្នន័យពាក់ព័ន្ធនឹងជលផល និងការអភិវឌ្ឍមូលដ្ឋាន។ មនុស្សជាច្រើនបានស្គាល់រួចមកហើយជាមួយនឹងរូបភាពដែលមានមូលដ្ឋានលើគំនូសតាង ដែលជួយពួកគេឱ្យយល់ពីរបៀបអាន និងបកស្រាយក្រាហ្វ និងតារាងទិន្នន័យ។ ទោះបីជាដំបូងមួយចំនួនបានរកឃើញថាទិន្នន័យផ្អែកលើផែនទីពិបាកយល់ក៏ដោយ បរិបទក្នុងតំបន់បានជួយពួកគេឱ្យចូលរួមក្នុងប្រធានបទប្រកបដោយអត្ថន័យ។
នៅក្នុងវគ្គចុងក្រោយ អ្នកចូលរួមបានរៀនពីរបៀបប្រើប្រាស់កម្មវិធី Avenza Maps ដែលជាកម្មវិធីទូរស័ព្ទសម្រាប់បង្កើត និងគ្រប់គ្រងទិន្នន័យផែនទីដោយគ្មានអ៊ីនធឺណិត។ ពួកគេបានអនុវត្តការបន្ថែមចំណុចផែនទី តាមដានផ្លូវល្បាត ភ្ជាប់រូបថត និងទាញយកឯកសារដើម្បីប្រើប្រាស់នៅពេលក្រោយ។ ខណៈពេលដែលនេះជាបច្ចេកវិទ្យាថ្មីសម្រាប់អ្នកចូលរួមជាច្រើន ហើយពួកគេអាចជួបឧបសគ្គផ្នែកភាសាខ្លះ អ្នកចូលរួមបានបង្ហាញពីចំណាប់អារម្មណ៍យ៉ាងខ្លាំង ជាពិសេសនៅពេលដែលពួកគេដឹងពីរបៀបដែលកម្មវិធីអាចគាំទ្រដល់កិច្ចខិតខំប្រឹងប្រែងប្រចាំថ្ងៃរបស់ពួកគេក្នុងការល្បាត និងការពារសហគមន៍របស់ពួកគេ។ អ្នកចូលរួមជាច្រើនបានសម្តែងក្តីរំភើបក្នុងការប្រើប្រាស់ឧបករណ៍ឌីជីថលដើម្បីចងក្រងឯកសារការងាររបស់ពួកគេ និងទំនាក់ទំនងកាន់តែមានប្រសិទ្ធភាពជាមួយអាជ្ញាធរមូលដ្ឋាន និងដៃគូ។
ពេញមួយវគ្គបណ្តុះបណ្តាល អ្នកចូលរួមបានចែករំលែកយ៉ាងសកម្មនូវមតិយោបល់ សួរសំណួរ និងភ្ជាប់មេរៀនជាមួយនឹងបទពិសោធន៍ជីវិតពិតរបស់ពួកគេ។ តាមតរយៈការសង្កេតបានបង្ហាញថា នៅពេលដែលទិន្នន័យត្រូវបានពន្យល់ដោយផ្សាភ្ជាប់ទៅនឹងសហគមន៍របស់ពួកគេ អ្នកចូលរួមអាចមើលឃើញច្បាស់ពីតម្លៃរបស់ទិន្នន័យ។ វគ្គបណ្តុះបណ្តាលនេះគឺជាជំហានមួយទៀតនៅក្នុងបេសកកម្មបន្តរបស់អូឌីស៊ី ដើម្បីលើកកម្ពស់ទិន្នន័យបើកទូលាយ ជំនាញឌីជីថល និងការពង្រឹងសហគមន៍។
នៅចុងបញ្ចប់នៃវគ្គបណ្តុះបណ្តាលរយៈពេលពីរថ្ងៃនេះ អ្នកចូលរួមមានទំនុកចិត្តជាងមុនក្នុងការប្រើប្រាស់ទិន្នន័យ និងឧបករណ៍ផលិតផែនទីឌីជីថល ដើម្បីគាំទ្រការងាររបស់ពួកគេក្នុងការការពារធនធានធម្មជាតិ និងជំរុញការអភិវឌ្ឍសហគមន៍។ អូឌីស៊ីនឹងបន្តការងារនេះ និងពង្រីកឱកាសបណ្តុះបណ្តាលដល់សហគមន៍បន្ថែមទៀតនៅក្នុងគម្រោង SCAEG។
