កម្មវិធីបណ្តុះបណ្តាលអក្ខរកម្មទិន្នន័យដំបូងគេក្នុងប្រទេសកម្ពុជាត្រូវបានបញ្ចប់ទៅដោយភាពជោគជ័យ ក្នុងកំឡុងពេលនៃការរាតត្បាតជំងឺកូវីដ-១៩
ដោយទទួលបានការគាំទ្រពី ទីភ្នាក់ងារសហរដ្ឋអាមេរិកសំរាប់អភិវឌ្ឍន៏អន្តរជាតិ (USAID) ក្រោមគម្រោងពង្រឹងសមត្ថភាពសង្គមស៊ីវិលនៅកម្ពុជា (CCSS) នៃវិទ្យាស្ថានគ្រប់គ្រងបូព៌ា-បស្ចឹម (EWMI) អង្គការទិន្នន័យអំពីការអភិវឌ្ឍ (ODC) បានបញ្ចប់ការសាកល្បងកម្មវិធីអក្ខរកម្មទិន្នន័យនៅកម្ពុជាដោយជោគជ័យ។ កម្មវិធីនេះបានបង្កើតឡើងដោយផ្អែកលើកម្មវិធីសិក្សារបស់ធនាគារពិភពលោក ដែលត្រូវបានរៀបចំ និងអនុវត្តដំបូងនៅប្រទេសមីយ៉ាន់ម៉ា តាមរយៈការផ្តួចផ្តើមពិសេសមួយទៀតរបស់ EWMI ក្នុងភាពជាដៃគូជាមួយ Phandeeyar។
នៅថ្ងៃទី៣០ ខែមិថុនា ឆ្នាំ២០២០ អង្គការទិន្នន័យអំពីការអភិវឌ្ឍ (អូឌីស៊ី) បានបញ្ចប់ជាស្ថាពរនូវកម្មវិធីបណ្តុះបណ្តាលអក្ខរកម្មទិន្នន័យ ដែលមានរយៈពេលមួយឆ្នាំ ជាមួយនឹងសិក្ខាសាលាចុងក្រោយដែលធ្វើឡើងតាមរយៈអ៊ីនធើណេត។ ទោះបីស្ថិតនៅក្នុងកំឡុងពេលជំងឺរាតត្បាតកូវីដ-១៩ ការប្រជុំតាមរយៈប្រព័ន្ធវីដេអូនេះត្រូវបានធ្វើឡើងដោយជោគជ័យតាមរយៈកម្មវិធី Zoom Video Conference ហើយមានវត្តមានភ្ញៀវកិត្តិយសពី EWMI និង USAID។
ការធ្វើបទបង្ហាញរបស់គម្រោងទិន្នន័យពីសិក្ខាកាមគឺជារបៀបវារៈដ៏សំខាន់មួយនៃការជួបប្រជុំនេះ។ បទបង្ហាញទាំងនោះក៏ទទួលបានមតិយោបល់ពីគណៈកម្មាការកិត្តិយសចំនួន ៣ រួមមានមន្ត្រីរបស់ USAID គឺលោក Carlos Lamadrid នាយកប្រតិបតិ្តនៃអង្គការអូឌីស៊ី លោក ធី ទ្រី ក៏ដូចជាគ្រូបង្គោលសំខាន់របស់យើងគឺលោក Yan Naung Oak។ គម្រោងទិន្នន័យល្អបំផុតចំនួន ៣ ត្រូវបានជាប់ជាជ័យលាភី ដោយទទួលបានពិន្ទុខ្ពស់បំផុតដោយគណៈកម្មាការវាយតម្លៃ។
ក្នុងចំណោមសិក្ខាកាមចំនួន ២៥ នាក់ អូឌីស៊ីទទួលបានគម្រោងសាច់រឿងទិន្នន័យចំនួន ២០ ដែលគម្រោងទាំងនេះត្រូវបានប្រមូលទុកសម្រាប់ធ្វើការវិនិច្ឆ័យពីគណៈកម្មការ។ ការមានប្រភពដើមច្បាស់លាស់ ភាពពេញលេញនៃសាច់រឿងទិន្នន័យ សារៈសំខាន់នៃទិន្នន័យ និងការបំលែងទិន្នន័យជារូបភាព គឺជាធាតុសំខាន់ៗនៃការវាយតម្លៃគម្រោងសាច់រឿងនីមួយៗ បូករួមជាមួយនឹងការធ្វើបទបង្ហាញរយៈពេល ៥នាទីរបស់សិក្ខាកាមនៅក្នុងសិក្ខាសាលា។
គម្រោងទិន្នន័យស្តីពី ព្រៃឈើ ដោយ Saowalak Jingjungvisut ដែលជាបុគ្គលិកទទួលបន្ទុកផ្នែកគ្រប់គ្រងផ្នែកទំនាក់ទំនង និងភាពជាដៃគូរ នៃ Open Development Mekong (ODM) ទទួលបានជ័យលាភីលេខ ១ ខណៈគម្រោងសាច់រឿង ការប្រើប្រាស់អគ្គិសនី ទទួលបានជ័យលាភីលេខ ២ ផលិតឡើងដោយ លោក ម៉ៅ សំណាងដែលជាអ្នកសារព័ត៌មានរបស់ស្ថានីយ៍ទូរទស្សន៍ក្នុងស្រុក ភីអិនអិន(PNN TV) និងជ័យលាភីលេខ ៣ បានទៅលើគម្រោងសាច់រឿងស្តីពី តំបន់អនាធិបតេយ្យក្នុងរាជធានីភ្នំពេញ ដោយកញ្ញា លី វិច្ឆិកា ដែលជាមន្ត្រីអង្គការ Planete Enfants &; Development។ ខណៈជ័យលាភីលេខ ៤ និង លេខ៥ ត្រូវបានទទួលស្គាល់ជាគម្រោងសាច់រឿងទិន្នន័យគួឲ្យកោតសរសើរ ដែលធ្វើឡើងពាក់ព័ន្ធអំពីការអភិវឌ្ឍន៍ជំនាញ និងកម្មវិធីអំណាននៅថ្នាក់ដំបូងនៅកម្ពុជា។ ជ័យលាភីកំពូលៗ ទាំងបីត្រូវបានផ្តល់កិត្តិយសដោយទទួលបានពានរង្វាន់ និងវិញ្ញាបនបត្របញ្ជាក់ពីសមិទ្ធិផល។
អ្នកជាប់ជ័យលាភីលេខ ១ Saowalak បានសម្តែងការកោតសរសើរចំពោះកម្មវិធីនេះដោយបន្ថែមថា វគ្គបណ្តុះបណ្តាលនេះបានធ្វើឲ្យនាងមានកម្លាំងចិត្ត និងមានទំនុកចិត្តក្នុងការប្រើប្រាស់ព័ត៌មានដែលសំខាន់ រួមជាមួយនឹងជំនាញដែលទទួលបានពីវគ្គបណ្តុះបណ្តាលនេះ ក្នុងការអនុវត្តទៅលើការស្រាវជ្រាវផ្អែកលើទិន្នន័យរបស់ខ្លួនដោយជោគជ័យ។ គាត់មានប្រសាសាន៍ថា “ជារួម ខ្ញុំអាចអនុវត្តជាក់ស្តែងនូវជំនាញដែលទទួលបានពីវគ្គបណ្តុះបណ្តាលនេះភ្លាមៗ និងប្រើប្រាស់ចំណេះដឹងដ៏មានប្រយោជន៍ទាំងនេះដល់ការបណ្តុះបណ្តាលស្រដៀងគ្នា សម្រាប់ស្ថាប័នមិនមែនរដ្ឋាភិបាល និងអង្គការសង្គមស៊ីវិល ដែលធ្វើការក្នុងវិស័យព្រៃឈើនៅក្នុងប្រទេសថៃ។ ខ្ញុំពិតជាអរគុណខ្លាំងណាស់ដែលមានឱកាសចូលរួមវគ្គបណ្តុះបណ្តាលនេះ”។
ស្រដៀងគ្នានេះដែរ សំណាង បាននិយាយថាអក្ខរកម្មទិន្នន័យគឺជាប្រធានបទថ្មីចំពោះគាត់ ហើយបើគ្មានការគាំទ្រពីគ្រូបង្គោលទេនោះ វាពិតជាពិបាកខ្លាំងសម្រាប់គាត់ក្នុងការអនុវត្តផ្ទាល់អំឡុងពេលកម្មវិធីបណ្តុះបណ្តាលនេះ។ លោកបានបន្តទៀតថា “ខ្ញុំទទួលបានចំណេះដឹងជាច្រើនពីវគ្គបណ្តុះបណ្តាល ខ្ញុំគិតថាជំនាញទិន្នន័យនេះ ពិតជាចាំបាច់សម្រាប់ការងាររបស់ខ្ញុំ ពីព្រោះខ្ញុំអាចចូលរួមយ៉ាងសំខាន់ក្នុងការពិភាក្សាណាមួយ ឬផលិតរឿងដែលផ្អែកលើទិន្នន័យនៅកន្លែងការងាររបស់ខ្ញុំ”។
លោក ម៉ៅ សំណាង, អ្នកសារព័ត៌មាននៅស្ថានីយ៍ទូរទស្សន៍ ភីអិនអិន
ក្រៅពីការបណ្តុះបណ្តាល គម្រោងទិន្នន័យក៏ត្រូវបានផ្សព្វផ្សាយ
កម្មវិធីបណ្តុះបណ្តាលអក្ខរកម្មទិន្នន័យរបស់អូឌីស៊ី ត្រូវបានគេមើលឃើញជាទូទៅថាជាអ្នកត្រួសត្រាយផ្លូវនៅក្នុងអក្ខរកម្មទិន្នន័យ និងជាកម្មវិធីដំបូងគេនៅប្រទេសកម្ពុជា ដែលបានចូលរួមចំណែកយ៉ាងសំខាន់ក្នងការលើកស្ទួយអក្ខរកម្មឌីជីថល ក៏ដូចជាបង្កើនជំនាញវិជ្ជាជីវៈលើការផលិតសាច់រឿង ដោយផ្អែកលើទិន្នន័យច្បាស់លាស់ និងដែលមានភស្តុតាងជាក់ស្តែង។ ព័ត៌មានខាងក្រោមបង្ហាញពីពេលវេលា និងការអនុវត្តគម្រោង៖
លោក គុណ ចិន្តា ប្រធានផ្នែកកម្មវិធី និងមាតិការបស់អង្កការ អូឌីស៊ី បានលើកឡើងថាអូឌីស៊ីនៅតែមានផែនការ និងការប្តេជ្ញាចិត្តក្នុងការអនុវត្តវគ្គបណ្តុះបណ្តាល អក្ខរកម្មទិន្នន័យនេះបន្តទៀត ទោះបីជាកម្មវិធីនេះនឹងត្រូវបញ្ចប់នាពេលឆាប់ៗនេះក៏ដោយ។ លោកបានមានប្រសាសន៍បន្តថា “ថ្មីៗនេះ យើងបានកំពុងកៀរគរ ធនធានទាំងក្នុង និងខាងក្រៅ ដើម្បីបង្កើតវគ្គបណ្តុះបណ្តាលស្រដៀងគ្នានៅពេលខាងមុខ។ ហើយក្នុងនាមតំណាងឲ្យអង្គការ ខ្ញុំសូមបង្ហាញការគោរព និងការដឹងគុណចំពោះអ្នកចូលរួម និងការចូលរួមយ៉ាងសកម្មរបស់ពួកគេនៅក្នុងសកម្មភាពបណ្តុះបណ្តាលនេះ។ ក្រុមការងារ អូឌីស៊ី នឹងបន្តធ្វើការជាមួយពួកគេក្នុងការបោះពុម្ពផ្សាយគម្រោងសាច់រឿងទិន្នន័យរបស់ពួកគេ”។
អ្នកគ្រប់គ្រងទូទៅតាមប្រព័ន្ធអ៊ីនធឺណេតនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ស្រី សុភ័ក្ត្រ ក៏បានចូលរួមក្នុងវគ្គបណ្តុះបណ្តាល នេះ ហើយលោកបានមានប្រសាសន៍ថាលោកបានប្រើប្រាស់ និងអនុវត្តជំនាញដែលបានរៀនទៅក្នុងការងារប្រចាំថ្ងៃរបស់លោក។ លោកបន្ថែមថា “បន្ទាប់ពីបានចូលរួមវគ្គបណ្តុះបណ្តាលអក្ខរកម្មទិន្នន័យជាមួយ អូឌីស៊ី នេះ ខ្ញុំបានទទួលនូវចំណេះដឹងលើការវិភាគ និងបកស្រាយទិន្នន័យតាមក្បួនខ្នាតវិធីសាស្រ្តត្រឹមត្រូវ និងសមហេតុផល ការបណ្តុះបណ្តាលចំណេះដឹងផ្នែកទិន្នន័យ អាចជួយខ្ញុំអោយជម្នះឧបសគ្គនេះបាន។ ចុងក្រោយខ្ញុំបានរៀនពីរបៀបប្រើប្រាស់ ព័ត៌មានជារូបភាព ឱ្យសាកសមទៅនឹងខ្លឹមសារមាតិកា ហើយវានឹងត្រូវបានប្រើដើម្បីជូនដំណឹងយ៉ាងទូលំទូលាយដល់ទស្សនិកជនទូទៅ”។
អ្នកគ្រប់គ្រងទូទៅតាមប្រព័ន្ធអ៊ីនធឺណេតនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM)
យោងតាម លោក សុភ័ក្ត្រ ក្រុមរបស់លោកបានផលិតរឿងរ៉ាវដែលផ្អែកលើទិន្នន័យកាន់តែច្រើនឡើងក្នុងទម្រង់ជា ព័ត៌មានជារូបភាពពាក់ព័ន្ធនឹងកម្មករកាត់ដេរនៅកម្ពុជា ហើយខណៈដែលអត្ថបទជាភាសាអង់គ្លេសក៏ត្រូវបានបោះពុម្ពផ្សាយនៅថ្ងៃទី៨ ខែកក្កដា ឆ្នាំ២០២០ នេះដែរ។
អក្ខរកម្មទិន្នន័យ ជាសមត្ថភាពក្នុងការយល់ ការអាន និងការវិភាគដោយប្រើប្រាស់ព័ត៌មានជាទិន្នន័យ។ អក្ខរកម្មទិន្នន័យ ក៏ជាសមត្ថភាពក្នុងការទាញយកព័ត៌មានដែលមានខ្លឹមសារចេញពីទិន្នន័យអ្វីមួយ។
