សេចក្តីប្រកាសព័ត៌មានរបស់ក្រសួងកសិកម្មស្តីពីកិច្ចការពារ និងអភិរក្សសត្វផ្សោតទន្លេមេគង្គ
នៅថ្ងៃទី១៥ ខែវិច្ឆិកា ឆ្នាំ២០២៥ ក្រសួងកសិកម្ម រុក្ខាប្រមាញ់ និងនេសាទ បានចេញផ្សាយសេចក្តីប្រកាសព័ត៌មានពីកិច្ចការពារ និងអភិរក្សសត្វផ្សោតទន្លេមេគង្គ។ ក្រសួងបានបញ្ជាក់ថា រយៈពេលមួយឆ្នាំចុងក្រោយនេះ គិតចាប់ពីថ្ងៃទី១៣ ខែវិច្ឆិកា ឆ្នាំ២០២៤ ដល់ថ្ងៃទី១៣ ខែវិច្ឆិកា ឆ្នាំ២០២៥ ករណីសត្វផ្សោតស្លាប់នៅកម្ពុជាពុំមានកើតឡើងឡើយ។ នេះជាលើកទី១ហើយ ដែលពុំមានសត្វផ្សោតស្លាប់ក្នុងរយៈពេលមួយឆ្នាំពេញ គិតចាប់ពីការចាប់ផ្តើមតាមដាន និងកត់ត្រាដំបូងនៅឆ្នាំ២០០២មកទល់បច្ចុប្បន្ន។ ទន្ទឹមនឹងនេះ កម្ពុជាទទួលស្វាគមន៍កូនផ្សោតកើតថ្មីចំនួន ៧ក្បាល គិតត្រឹមខែវិច្ឆិកា ឆ្នាំ២០២៥ ដែលធ្វើឱ្យចំនួនសត្វផ្សោតសរុបនៅកម្ពុជានាពេលបច្ចុប្បន្នកើនដល់ ១១១ក្បាល។
ក្រសួងកសិកម្ម រុក្ខាប្រមាញ់ និងនេសាទ
