សេចក្តីថ្លែងការណ៍ក្រសួងការបរទេស៖ កម្ពុជាថ្កោលទោសយ៉ាងខ្លាំងបំផុតចំពោះការបាញ់ប្រហាររបស់កម្លាំងថៃលើជនស៊ីវិលខ្មែរនៅថ្ងៃទី១២ ខែវិច្ឆិកា ឆ្នាំ២០២៥
ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីថ្លែងការណ៍នៅថ្ងៃទី១២ ខែវិច្ឆិកា ឆ្នាំ២០២៥ ដោយថ្កោលទោសយ៉ាងខ្លាំងបំផុតចំពោះការបាញ់ប្រហារដោយគ្មានហេតុផលរបស់កងកម្លាំងថៃមកលើជនស៊ីវិលខ្មែរនៅភូមិព្រៃចាន់ ខេត្តបន្ទាយមានជ័យ ដែលបណ្តាលឱ្យជនស៊ីវិលម្នាក់ស្លាប់ និងបីនាក់រងរបួស។ រាជរដ្ឋាភិបាលកម្ពុជាបានប្រកាសថា ទង្វើនេះគឺជាការរំលោភបំពានយ៉ាងធ្ងន់ធ្ងរលើអធិបតេយ្យភាពរបស់កម្ពុជា និងជាការបំពានយ៉ាងគឃ្លើនចំពោះច្បាប់អន្តរជាតិ រួមទាំងធម្មនុញ្ញអាស៊ានផងដែរ។
ជាការឆ្លើយតប កម្ពុជាបានធ្វើការតវ៉ាជាផ្លូវការទៅកាន់ស្ថានទូតថៃប្រចាំនៅទីក្រុងភ្នំពេញ ហើយបានប្រកាសអំពីការស៊ើបអង្កេតនៅនឹងកន្លែងអំពីការបាញ់សម្លាប់ជនស៊ីវិល ដោយមានការចូលរួមពីក្រុមអ្នកសង្កេតការណ៍អាស៊ាន (ASEAN Observer Team)ផងដែរ។ នៅក្នុងសេចក្តីថ្លែងការណ៍នេះ ក្រសួងបានគូសបញ្ជាក់ពីការបន្តអនុវត្តនូវ “ការអត់ធ្មត់ខ្ពស់ជាទីបំផុត” របស់កម្ពុជាចាប់តាំងពីបទឈប់បាញ់ចូលជាធរមាននៅថ្ងៃទី២៨ ខែកក្កដា ឆ្នាំ២០២៥ មក ហើយបានជំរុញឱ្យប្រទេសថៃបញ្ឈប់ការប្រើប្រាស់កម្លាំង និងគោរពតាមការប្តេជ្ញាចិត្តរបស់ខ្លួនចំពោះសន្តិភាព និងការដោះស្រាយវិវាទដោយសន្តិវិធី ក្រោមសេចក្តីថ្លែងការណ៍រួមទីក្រុងកូឡាឡាំពួ។
ក្រសួងការបរទេស និងសហប្រតិបត្តិការអន្តរជាតិ
