សេចក្តីប្រកាសព័ត៌មានស្តីពីកិច្ចចរចាស្តីពីកិច្ចសហប្រតិបត្តិការអភិវឌ្ឍន៍កម្ពុជា-អាល្លឺម៉ង់ ឆ្នាំ២០២៥
ថ្ងៃទី១៩ ខែវិច្ឆិកា ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានចេញសេចក្តីប្រកាសព័ត៌មាន ស្តីពីកិច្ចចរចាស្តីពីកិច្ចសហប្រតិបត្តិការអភិវឌ្ឍន៍កម្ពុជា-អាល្លឺម៉ង់ ឆ្នាំ២០២៥។ រាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធអាល្លឺម៉ង់ ដោយមាន ឯកឧត្តម ឈៀង យ៉ាណារ៉ា និងលោកជំទាវ Christina Laun ជាសហប្រធាន បានដឹកនាំកិច្ចចរចាស្តីពីកិច្ចសហប្រតិបត្តិការអភិវឌ្ឍន៍ឆ្នាំ២០២៥ នៅថ្ងៃទី១៨-១៩ ខែវិច្ឆិកា ឆ្នាំ២០២៥ ។ គោលដៅចម្បងនៃកិច្ចចរចានេះ គឺដើម្បីពិភាក្សាលើវឌ្ឍនភាពនៃកិច្ចសហប្រតិបត្តិការអភិវឌ្ឍន៍ទ្វេភាគី និងកំណត់វិស័យអាទិភាពនាពេលអនាគត។ ភាគីអាល្លឺម៉ង់បានកោតសរសើរចំពោះវឌ្ឍនភាពនៃការអភិវឌ្ឍន៍សង្គម-សេដ្ឋកិច្ចរបស់កម្ពុជា ក្រោមយុទ្ធសាស្ត្របញ្ចកោណ-ដំណាក់កាលទី ១ ជាពិសេសក្នុងការកាត់បន្ថយភាពក្រីក្រ និងការធ្វើឱ្យប្រសើរឡើងនូវអភិបាលកិច្ច ប្រព័ន្ធគាំពារសង្គម និងការគ្រប់គ្រងហិរញ្ញវត្ថុសាធារណៈ។
ភាគីអាល្លឺម៉ង់បានវាយតម្លៃខ្ពស់ចំពោះកម្ពុជាថាជាដៃគូដ៏សំខាន់។ ភាគីទាំងពីរបានឯកភាពបន្តកិច្ចសហប្រតិបត្តិការអភិវឌ្ឍន៍លើវិស័យអាទិភាពចំនួន ៣ រួមមាន៖ ១) ការអភិវឌ្ឍសេដ្ឋកិច្ចប្រកបដោយចីរភាព, ២) សុខាភិបាល និងគាំពារសង្គម, និង ៣) ថាមពល និងអន្តរកាលថាមពលប្រកបដោយយុត្តិធម៌ ព្រមទាំងវិស័យផ្សេងៗទៀតដូចជា វិមជ្ឈការ និងឌីជីថលូបនីយកម្ម។ ជាចុងក្រោយ ឯកឧត្តម ឈៀង យ៉ាណារ៉ា ក៏បានថ្លែងអំណរគុណចំពោះការបន្តរួមចំណែករបស់អាល្លឺម៉ង់ក្នុងកិច្ចអភិវឌ្ឍន៍កម្ពុជាផងដែរ។
ក្រុមប្រឹក្សាអភិវឌ្ឍន៍កម្ពុជា
