សេចក្តីប្រកាសព័ត៌មាន ស្តីពីការដាក់ឱ្យដំណើរការ ”ថ្នាលគាំពារសង្គមឌីជីថលកម្ពុជា”
នៅថ្ងៃទី៦ ខែតុលា ឆ្នាំ២០២៥, “ថ្នាលគាំពារសង្គមឌីជីថលកម្ពុជា” ឬហៅកាត់ថា “DSPP” ត្រូវបានប្រកាសដាក់ឱ្យដំណើរការជាផ្លូវការ ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម និងដោយមានការអញ្ជើញចូលរួមដោយផ្ទាល់ពីថ្នាក់ដឹកនាំក្រសួង ស្ថាប័នពាក់ព័ន្ធ, ឯកអគ្គរដ្ឋទូត, អភិបាលនៃគណៈអភិបាលរាជធានី-ខេត្ត, តំណាងដៃគូអភិវឌ្ឍន៍, អង្គការសង្គមស៊ីវិល និងស្ថាប័នសិក្សាស្រាវជ្រាវ ចំនួនប្រមាណ ៣៥០នាក់ ព្រមទាំងមានការចូលរួមតាមរយៈប្រព័ន្ធវីដេអូពីចម្ងាយ ដោយអភិបាលក្រុង/ស្រុក/ខណ្ឌ និងមេឃុំ/ចៅសង្កាត់ និងមន្ត្រីអនុវត្តកម្មវិធីទូទាំងប្រទេសចំនួនប្រមាណ ៥ ០០០នាក់។
ថ្នាលឌីជីថលរួមរបស់រាជរដ្ឋាភិបាលនេះ បានធ្វើសុខដុមនីយកម្មនូវកម្មវិធីជាតិជំនួយសង្គម និងរបបសន្តិសុខសង្គម ចំនួន ១០ ដែលនេះជាការបោះជំហានដ៏សំខាន់ និងជាការសម្រេចបាននូវបង្គោលចរថ្មីមួយទៀត ស្របតាម «និម្មាបនកម្មគាំពារសង្គមឌីជីថល» ដែលត្រូវបានកំណត់នៅក្នុងផែនការយុទ្ធសាស្ត្របរិវត្តកម្មឌីជីថលក្នុងប្រព័ន្ធគាំពារសង្គម ឆ្នាំ២០២៤-២០២៨។
ក្រុមប្រឹក្សាជាតិគាំពារសង្គម
