សេចក្តីជូនដំណឹងស្តីពី ជំនួបពិភាក្សាការងាររវាង ឯកឧត្តម អូន ព័ន្ធមុនីរ័ត្ន និង លោកជំទាវ អេឡែន ហ្គូលស្ទីន (Ellen Goldstein)
នាថ្ងៃទី១៨ ខែកក្កដា ឆ្នាំ២០១៧ ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ បានទទួលជួបពិភាក្សាការងារជាមួយលោកជំទាវ អេឡែន ហ្គូលស្ទីន (Ellen Goldstein) ដែលត្រូវបានតែងតាំង និងចូលកាន់តំណែងជានាយកប្រចាំប្រទេសរបស់ ធនាគារពិភពលោកប្រចាំតំបន់អាស៊ីអាគ្នេយ៍ អាស៊ីខាងកើត និងប៉ាស៊ីហ្វិច។ ក្នុងនោះ រដ្ឋមន្ត្រីក្រសួងសេដ្ឋកិច្ច បានជម្រាបជូនអំពីតម្រូវការអាទិភាពរបស់កម្ពុជា ដូចជា៖
អាទិភាពសម្រាប់រយៈពេលវែង៖
១)ការអភិវឌ្ឍសមត្ថភាពជំនាញស្របតាមគោលនយោបាយអភិវឌ្ឍន៍ឧស្សាហកម្មកម្ពុជា២០១៥-២០២៥ (IDP) សំដៅប្រែក្លាយកម្ពុជាឱ្យទៅជាប្រទេសឧស្សាហកម្មផ្អែកលើពលកម្មជំនាញ
២) បន្តស្តារ និងកសាងវិស័យហេដ្ឋារចានាសម្ព័ន្ធរូបវ័ន្តដែលគាំទ្រចីរភាពកំណើនសេដ្ឋកិច្ច
៣) ពង្រឹងវិស័យឡូជីស្តីកឱ្យកាន់តែមានភាពរស់រវើក និងប្រទាក់ក្រឡាក្នុងទូទាំងប្រទេស
៤) វិស័យបង្កើនផលិតភាពកសិកម្ម
សម្រាប់រយៈពេលខ្លីចំពោះមុខ រាជរដ្ឋាភិបាល នឹងបន្តផ្តល់អាទិភាពលើវិស័យ៖
១)ការអភិវឌ្ឍជំនាញ
២) ការបង្កើតផលិតភាពកសិកម្ម និង
៣) ការលើកកម្ពស់សេវាកម្មវិស័យទេសចរណ៍
ជាការឆ្លើយតប លោកជំទាវ អេឡែន ហ្គូលស្ទីន បានថ្លែងបញ្ជាក់ឡើងវិញពី ការវិភាជន៍ថវិកាប្រមាណជាង ៥៤០ លានដុល្លារអាមេរិកបន្ថែមទៀត សម្រាប់ក្របខណ្ឌកិច្ចសហប្រតិបត្តិការពីឆ្នាំ ២០១៨ ដល់ឆ្នាំ២០២១ របស់ធនាគារពិភពលោក។ លោកជំទាវក៏បានថ្លែងថា នឹងខិតខំស្រូបទាញថវិការដែលបានវិភាជន៍ទុកនេះ និងសម្រួលរាល់នីតិវិធីអនុវត្តគម្រោងឱ្យកាន់តែមានភាពសាមញ្ញ និងងាយអនុវត្ត។
ក្រសួងសេដ្ឋកិច្ច និងហិរញ្ញវត្ថុ
