សេចក្តីប្រកាសព័ត៌មាន៖ សៀវភៅម្ហូប “កេរដំណែលស្នាដៃម្ហូបខ្មែរ” ទទួលបានជ័យលាភី “Best of the Best - Cambodia”
សៀវភៅម្ហូប “កេរដំណែលស្នាដៃម្ហូបខ្មែរ“ និង “កេរដំណែលស្នាដៃម្ហូបខ្មែរ ភាគ២“ ដែលរៀបរៀង និងចងក្រងដោយក្រសួងការបរទេស និងសហប្រតិបត្តិការអន្តរជាតិ បានទទួលជ័យលាភី “Best of the Best - Cambodia” ពី Gourmand Awards Best of the Best ១៩៩៥-២០២៥ (៣០ឆ្នាំ) ដែលប្រារព្ធឡើងនៅទីក្រុងរីយ៉ាដ ប្រទេសអារ៉ាប៊ីសាអូឌីត ចាប់ពីថ្ងៃទី ២៧-៣០ ខែវិច្ឆិកា ឆ្នាំ២០២៥។ ការបោះពុម្ពផ្សាយសៀវភៅទាំងនេះ គឺជាផ្នែកមួយនៃវិស័យការទូតអាហាររបស់ក្រសួង ក្រោមយុទ្ធសាស្ត្រការទូតសេដ្ឋកិច្ច ដើម្បីលើកស្ទួយបេតិកភណ្ឌម្ហូបអាហារដ៏សម្បូរបែបរបស់កម្ពុជា និងលើកកម្ពស់កិត្យានុភាពជាតិ។ សៀវភៅទាំងពីរបានពិពណ៌នាអំពីមុខម្ហូប និងបង្អែមខ្មែរ ជាមួយនឹងវិធីចម្អិននិងគ្រឿងផ្សំដែលងាយស្រួលអនុវត្តនៅទូទាំងពិភពលោក។
ក្រសួងការបរទេស និងសហប្រតិបត្តិការអន្តរជាតិ
