សុន្ទរកថារបស់ឯកឧត្តមរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងក្នុងមហាសន្និបាតអង្គការសហប្រជាជាតិលើកទី៨០
នៅថ្ងៃទី២ ខែតុលា ឆ្នាំ ២០២៥ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងសុន្ទរកថាក្នុងមហាសន្និបាតអង្គការសហប្រជាជាតិលើកទី ៨០ ក្រោមមូលបទ «រួមគ្នាដើម្បីភាពប្រសើរឡើង៖ ៨០ឆ្នាំ និងច្រើនឆ្នាំទៀត ដើម្បីសន្តិភាព ការអភិវឌ្ឍ និងសិទ្ធិមនុស្ស»។ ឯកឧត្តម បានគូសបញ្ជាក់អំពីការប្តេជ្ញាចិត្តយ៉ាងមុតមាំរបស់កម្ពុជាចំពោះពហុភាគីនិយម សន្តិភាព និងការអភិវឌ្ឍប្រកបដោយចីរភាព។ ឯកឧត្តម បានជំរុញឱ្យសហគមន៍ពិភពលោកបន្តជឿទុកចិត្តលើអង្គការសហប្រជាជាតិឡើងវិញ ហើយអំពាវនាវឱ្យមានកំណែទម្រង់ដើម្បីពង្រឹងស្ថាប័ននានារបស់អង្គការនេះ ដើម្បីដោះស្រាយបញ្ហាប្រឈមដ៏ស្មុគស្មាញនាសម័យទំនើបប្រកបដោយប្រសិទ្ធភាព។ ឧបនាយករដ្ឋមន្ត្រី បានសង្កត់ធ្ងន់ថា ការលើកកម្ពស់សេចក្តីថ្លៃថ្នូររបស់មនុស្ស ការការពារសុវត្ថិភាពតាមប្រព័ន្ធអុីនធឺណិត និងភាពធន់នឹងអាកាសធាតុ នៅតែជាចំណុចស្នូលនៃអាទិភាពជាតិរបស់ព្រះរាជាណាចក្រកម្ពុជា។
សុន្ទរកថានោះ បានលើកយកបទពិសោធន៍ជោគជ័យនៃការផ្លាស់ប្តូររបស់កម្ពុជាពីប្រទេសដែលធ្លាប់ហែកហួរដោយសង្គ្រាម ទៅជាសមាជិកដែលបានចូលរួមចំណែកក្នុងប្រតិបត្តិការរក្សាសន្តិភាពសកល ដោយបានលើកឡើងពីស្ថិរភាព និងវឌ្ឍនភាពនេះថាជាសមិទ្ធផលនៃនយោបាយឈ្នះ-ឈ្នះជាតិ។ ឯកឧត្តមបានចង្អុលបង្ហាញពីការរីកចម្រើនជាបន្តបន្ទាប់នៅក្នុងវិស័យសុខាភិបាល ការអប់រំ ការកាត់បន្ថយភាពក្រីក្រ និងសមភាពយេនឌ័រ។ លើសពីនេះ ឧបនាយករដ្ឋមន្ត្រីបានអំពាវនាវឱ្យមានការចាប់ផ្តើមកិច្ចសន្ទនាឡើងវិញ និងការគោរពច្បាប់អន្តរជាតិ ដើម្បីដោះស្រាយជម្លោះសកលនាពេលបច្ចុប្បន្ន ខណៈពេលជាមួយគ្នានេះ ក៏បានលើកឡើងពីភាពតានតឹងតាមបណ្តោយព្រំដែនថ្មីៗនេះជាមួយប្រទេសជិតខាង និងបានតស៊ូមតិឱ្យមានការអត់ធ្មត់ និងដំណោះស្រាយដោយសន្តិវិធី។
ក្រសួងការបរទេស និងសហប្រតិបត្តិការអន្តរជាតិ
