ជំហានដំបូងសម្រាប់មូលដ្ឋានគ្រឹះនៃ QGIS ជាមួយអូឌីស៊ី
នេះគឺជាលើកទី១ ហើយដែលអង្គការទិន្នន័យអំពីការអភិវឌ្ឍរៀបចំសិក្ខាសាលាជាសាធារណៈ ស្ដីអំពីប្រព័ន្ធព័ត៌មានភូមិសាស្ត្រ ក្រោមប្រធានបទ «មូលដ្ឋានគ្រឹះនៃ QGIS»។ សិក្ខាសាលាស្ដីអំពីមូលដ្ឋានគ្រឹះនៃប្រព័ន្ធព័ត៌មានភូមិសាស្ត្រ ដែលប្រើប្រាស់កម្មវិធី QGIS នេះបានប្រព្រឹត្តទៅចាប់ពីថ្ងៃទី ១២ ដល់ថ្ងៃទី ១៤ ខែមីនា ឆ្នាំ២០១៨ នៅការិយាល័យរបស់អង្គការទិន្នន័យអំពីការអភិវឌ្ឍ នារាជធានីភ្នំពេញ។ សិក្ខាកាមចូលរួមមានចំនួន ២៤ នាក់ ដែលក្នុងនោះមានសិក្ខាកាមជានារីចំនួន ៣ នាក់ មកពីស្ថាប័នជាច្រើនខុសៗគ្នា ដូចជា មន្ត្រីរាជរដ្ឋាភិបាល សិស្សនិស្សិត និងបណ្តាបុគ្គលិកអង្គការនានាជាដើម បានមកសិក្សាស្វែងយល់ពីរបៀបប្រើប្រាស់កម្មវិធី QGIS និងធ្វើលំហាត់អនុវត្តផ្ទាល់ ដើម្បីប្រើប្រាស់ជំនាញដែលពួកគាត់ទើបទទួលបាន ក៏ដូចជាឆ្លើយតបទៅនឹងការរំពឹងទុករបស់ពួកគាត់។ សិក្ខាសាលារយៈពេល ៣ ថ្ងៃនេះរួមមាន បទបង្ហាញ សំណួរសាកល្បង ការធ្វើតេស្តតាមប្រព័ន្ធអ៊ិនធើណែត និងការធ្វើលំហាត់អនុវត្តផ្ទាល់ក្នុងកម្មវិធី QGIS។
សិក្ខាកាមទាំងអស់កំពុងតម្លើងកម្មវិធី QGIS តាមការបង្ហាញរបស់គ្រូបង្គោល។
ថ្ងៃដំបូងនៃសិក្ខាសាលានេះ បានចាប់ផ្តើមជាមួយនឹងការវាយតម្លៃកម្រិតចំណេះដឹង និងជំនាញរបស់សិក្ខាកាមដែលបានចូលរួមទាំងអស់។ ដើម្បីឱ្យវគ្គបណ្តុះបណ្តាលនេះទទួលបានជោគជ័យ វាមានសារៈសំខាន់ណាស់ ក្នុងការដឹងអំពីជំនាញដែលមានស្រាប់របស់សិក្ខាកាម។ ដូច្នេះហើយ ការបណ្ដុះបណ្ដាលត្រូវបានផ្លាស់ប្ដូរឱ្យសមស្របទៅនឹងចំណេះដឹងរបស់អ្នកចូលរួម។ ការវាយតម្លៃបានបង្ហាញថា សិក្ខាកាមដែលបានចូលរួមចំនួន ២៤ នាក់នេះ មិនមានចំណេះដឹងច្បាស់លាស់អំពីកម្មវិធី QGIS នេះទេ បើទោះបីជា អ្នកខ្លះធ្លាប់មានបទពិសោធខ្លះជាមួយកម្មវិធី GIS មួយផ្សេងទៀតដែលមានឈ្មោះថា ArcGIS ក៏ដោយ។ ដូច្នោះហើយ លោក វ៉ាមឿន និមល ដែលជាគ្រូបង្គោល ក៏ដូចជាអ្នកជំនាញការផ្នែកប្រព័ន្ធព័ត៌មានភូមិសាស្ត្រ ជាមួយនឹងបទពិសោធ GIS អស់រយៈពេលជាង ១០ ឆ្នាំ បានបង្ហាត់បង្រៀនសិក្ខាកាមផ្ដើមចេញពីការដំឡើងកម្មវិធី រហូតដល់ជំហានផ្សេងៗនៃកម្មវិធី។ នៅចុងបញ្ចប់ សិក្ខាកាមទាំងអស់អាចបង្កើតផែនទីសាមញ្ញ ដែលជាសមិទ្ធផលមួយ ដែលផ្តល់ឱ្យពួកគាត់មានចំណេះដឹងគ្រប់គ្រាន់សម្រាប់បន្តទៅថ្ងៃបន្ទាប់។
សិក្ខាកាមកំពុងស្វែងយល់អំពីផ្ទាំងអន្តរកររបស់ QGIS និងទស្សនីយកម្មទិន្នន័យភូមិសាស្ត្រ។
ទស្សនីយកម្មទិន្នន័យភូមិសាស្ត្រ ក៏ដូចជាការគ្រប់គ្រងទិន្នន័យគឺជាចំណុចផ្តោតសំខាន់នៅក្នុងថ្ងៃទី ២ ដែលរួមបញ្ចូលនូវអន្តរកម្មជាច្រើន ដែលអ្នកចូលរួមអាចយល់ដឹងបន្ថែម អំពីរបៀបប្រើប្រាស់ទិន្នន័យនៅលើកម្មវិធី QGIS។ អ្នកចូលរួមបានសិក្សាពីទម្រង់ខុសគ្នានៃទិន្នន័យ របៀបទាញយកទិន្នន័យពីឯកសារ មូលដ្ឋានទិន្នន័យ និងសេវាកម្មវេប ក៏ដូចជារៀនពីរបៀបរចនាទិន្នន័យទម្រង់វ៉ិចទ័រ និងទិន្នន័យរូបភាពផងដែរ។ បន្ទាប់ពីអាហារថ្ងៃត្រង់បានបញ្ចប់ អង្គសិក្ខាសាលាបានផ្ដោតលើរបៀបគ្រប់គ្រងទិន្នន័យ រួមបញ្ចូលទាំងមេរៀននៅលើកម្មវិធី QGIS ការបង្កើត និងកែសម្រួលទិន្នន័យវ៉ិចទ័រថ្មី និងមូលដ្ឋានទិន្នន័យ។ ថ្ងៃសិក្ខាសាលាទី ២ ត្រូវបានបញ្ចប់ដោយលំហាត់តូចមួយ ដែលតម្រូវឱ្យសិក្ខាកាមទាំងអស់បង្កើតមូលដ្ឋានទិន្នន័យមួយ ដើម្បីរក្សាទុកទិន្ន័យរបស់អង្គការអូឌីស៊ីសម្រាប់បង្កើតផែនទី។
ថ្ងៃចុងក្រោយនៃអង្គសិក្ខាសាលាត្រូវបានផ្ដោតសំខាន់លើការកែច្នៃទិន្នន័យ និងការវិភាគទិន្នន័យ រួមទាំងការវាយតម្លៃលើជំនាញរបស់សិក្ខាកាមដែលបានរៀនពីថ្ងៃដំបូង រហូតមកដល់ពេលនេះ។ បន្ទាប់ពីការសិក្សាលើការកែច្នៃទិន្នន័យវ៉ិចទ័រ និងរូបភាព និងកេសផ្ទុកឧបករណ៍កែច្នៃរួចមក អ្នកចូលរួមអាចបង្ហាញពីជំនាញរបស់ពួកគាត់ ដោយការសាកល្បងបង្កើតផែនទីរៀងៗខ្លួន។ សិក្ខាកាមបានជ្រើសរើសប្រធានបទផ្សេងៗដូចជា អចលនទ្រព្យ ធនធានទឹក ព្រៃឈើ និងនេសាទ ដើម្បីយកទៅបង្កើតផែនទីដោយប្រើកម្មវិធី QGIS។ ដោយសារមិនមានពេលវេលាគ្រប់គ្រាន់ ដើម្បីបញ្ចប់ការធ្វើលំហាត់អនុវត្តក្នុងការបង្កើតផែនទី នៅក្នុងសិក្ខាសាលា សិក្ខាកាមត្រូវបានលើកទឹកចិត្តឱ្យផ្ញើផែនទីទាំងនោះទៅគ្រូបង្គោល ដើម្បីផ្តល់ជាមតិយោបល់នៅពេលក្រោយ។ បន្ទាប់ពីសិក្ខាសាលានេះបានបញ្ចប់ទៅ អ្នកចូលរួមក៏អាចនៅបន្តការពិភាក្សារបស់ពួកគាត់តាមរយៈប្រព័ន្ធអ៊ិនធើណែតដែរ។
អ្នកចូលរួមកំពុងយកចិត្តទុកដាក់ក្នុងការបង្កើតផែនទីមួយរៀងៗខ្លួន។
អ្នកចូលរួមកំពុងយកចិត្តទុកដាក់ក្នុងការបង្កើតផែនទីមួយរៀងៗខ្លួន។
សិក្ខាសាលារយៈពេល ៣ ថ្ងៃនេះ បានបញ្ចប់ទៅជាមួយនឹងការវាយតម្លៃវគ្គបណ្តុះបណ្តាល ដែលតម្រូវឱ្យអ្នកចូលរួមផ្ដល់មតិយោបល់ និងឆ្លើយសំណួរសាកល្បង ដែលអាចវាយតម្លៃបានថាតើពួកគេបានរៀនសូត្រកម្រិតណា។ ជាចុងក្រោយ អ្នកចូលរួមទាំងអស់បានទទួលវិញ្ញាបនបត្រដែលបង្ហាញថាពួកគេអាចប្រើប្រាស់កម្មវិធី QGIS ថ្នាក់មូលដ្ឋានគ្រឹះបាន។ ទោះបីជាសិក្ខាសាលានេះបានបញ្ចប់ ប៉ុន្តែអ្នកចូលរួមនៅតែមានឱកាសក្នុងការបង្កើនជំនាញ QGIS របស់ពួកគេនៅក្នុងសិក្ខាសាលាពីរវគ្គទៀត ដែលនឹងប្រព្រឹត្តទៅចាប់ពីថ្ងៃទី ២៣ ដល់ថ្ងៃទី ២៥ ខែមេសា (ដោយផ្ដោតលើការគ្រប់គ្រងទិន្នន័យ តាមរយៈវេប និងទូរស័ព្ទដៃ ការប្រើប្រាស់កម្មវិធី GIS ក្នុងវិស័យគ្រប់គ្រងធនធានធម្មជាតិ ការប្រើប្រាស់កម្មវិធី GIS ក្នុងការគ្រប់គ្រងគ្រោះមហន្តរាយ) និងថ្ងៃទី ២៥ ដល់ថ្ងៃទី ២៧ ខែមិថុនា ឆ្នាំ២០១៨ (ការប្រើប្រាស់កម្មវិធី GIS ក្នុងវិស័យគ្រប់គ្រងដីធ្លី និងនគរូបនីយកម្ម និងការរួមបញ្ចូលបច្ចេកវិទ្យាកម្មវិធី GIS នៅក្នុងវិស័យសិក្សាធិការ)។
សិក្ខាកាមទាំងអស់បានថតរូបជុំគ្នា បន្ទាប់ពីការទទួលបានវិញ្ញាបនបត្របញ្ចប់សិក្ខាសាលានេះ។
សូមរង់ចាំទទួលព័ត៌មានពិស្ដារអំពីវគ្គបណ្ដុះបណ្ដាលបន្តបន្ទាប់នៅពេលក្រោយ!
