សាលាដំបូងខេត្តកំពង់ចាមដោះលែងកម្មករប្រាំនាក់ឲ្យនៅក្រៅឃុំ
យោងតាមមេធាវីបានឲ្យដឹងថា កាលពីម្សិលមិញ សាលាដំបូងខេត្តកំពង់ចាមបានដោះលែងកម្មកររោងចក្រប្រាំនាក់ឲ្យនៅក្រៅឃុំ រយៈពេលបីសប្តាហ៍ បន្ទាប់ពីពួកគេត្រូវបានចោទប្រកាន់ពីបទញុះញង់ឲ្យមានការប្រើអំពើហិង្សា និងបំផ្លាញទ្រព្យសម្បត្តិ អំឡុងការតវ៉ាដែលបានក្លាយជាហិង្សានៅរោងចក្រស្បែកជើង Juhui កាលពីចុងខែមុន។ ការប៉ះទង្គិចគ្នានៅរោងចក្រស្ថិតក្នុងស្រុកជើងព្រៃនេះបានកើតឡើងកាលពីថ្ងៃទី២៥ ខែតុលា បន្ទាប់ពីមានការធ្វើកូដកម្មរយៈពេលជិតពីរខែជុំវិញការទាមទារប្រាក់ឧបត្ថម្ភ និងប្រាក់កម្រៃផ្សេងៗទៀត ដែលអំឡុងពេលនោះ រោងចក្របានបញ្ឈប់ការងារកម្មករទាំង៥.០០០នាក់ ហើយបន្ទាប់មកបានទទួលយកកម្មករ៣.០០០នាក់ឲ្យចូលធ្វើការវិញ។ …
