ទិន្នន័យបើកទូលាយសម្រាប់វិបុលភាពរួម៖ អូឌីស៊ី ចូលរួមសន្និសីទសកលឆ្នាំ២០២៦ នៃគំនិតផ្តួចផ្តើមតម្លាភាពក្នុងវិស័យឧស្សាហកម្មនិស្សារណកម្ម (EITI)
លោក ធី ទ្រី ដែលជានាយកប្រតិបត្តិ/និពន្ធនាយកនៃអង្គការទិន្នន័យអំពីការអភិវឌ្ឍ (អូឌីស៊ី) បានចូលរួមសន្និសីទសកលឆ្នាំ២០២៦ នៃគំនិតផ្តួចផ្តើមតម្លាភាពក្នុងវិស័យឧស្សាហកម្មនិស្សារណកម្ម (EITI)
នៅថ្ងៃទី០៨–០៩ ខែតុលា ឆ្នាំ២០២៦ លោក ធី ទ្រី ដែលជានាយកប្រតិបត្តិ/និពន្ធនាយកនៃអង្គការទិន្នន័យអំពីការអភិវឌ្ឍ (អូឌីស៊ី) បានចូលរួមសន្និសីទសកលឆ្នាំ២០២៦ នៃគំនិតផ្តួចផ្តើមតម្លាភាពក្នុងវិស័យឧស្សាហកម្មនិស្សារណកម្ម (EITI) នៅទីក្រុងប្រ៊ុចសែល ប្រទេសបែលហ្ស៊ិក។ ក្រោមប្រធានបទ «តម្លាភាពដើម្បីវិបុលភាពរួម» សន្និសីទនេះបានប្រមូលផ្តុំតំណាង និងអ្នកពាក់ព័ន្ធជាង ១.០០០ នាក់ មកពីរដ្ឋាភិបាល ក្រុមហ៊ុនឯកជន អង្គការសង្គមស៊ីវិល និងដៃគូអភិវឌ្ឍន៍។ ក្នុងរយៈពេលពីរថ្ងៃ ថ្នាក់ដឹកនាំ អ្នករៀបចំគោលនយោបាយ និងអ្នកអនុវត្តការងារផ្ទាល់មកពីជាង ៥០ ប្រទេស បានផ្លាស់ប្តូរបទពិសោធន៍ បង្ហាញពីគំនិតច្នៃប្រឌិតថ្មីៗ និងពង្រឹងកិច្ចសហប្រតិបត្តិការ ដើម្បីជំរុញអភិបាលកិច្ចធនធានធម្មជាតិប្រកបដោយការទទួលខុសត្រូវ។ សម្រាប់អូឌីស៊ី សន្និសីទនេះគឺជាឱកាសដ៏ល្អក្នុងការចែករំលែកធនធានទិន្នន័យបើកទូលាយ និងភ្ជាប់កិច្ចពិភាក្សាកម្រិតសកល មកកាន់បេសកកម្មរបស់ខ្លួននៅកម្ពុជា៖ ការធ្វើឱ្យព័ត៌មានដែលអាចទុកចិត្តបានងាយស្រួលចូលប្រើប្រាស់ ការគាំទ្រដល់កិច្ចពិភាក្សាសាធារណៈ និងការជួយសហគមន៍ឱ្យយល់ដឹងពីសេចក្តីសម្រេចចិត្តផ្សេងៗ ដែលប៉ះពាល់ដល់ដីធ្លី ជីវភាព រួមទាំងធនធានធម្មជាតិរបស់ពួកគេ។
រ៉ែសំខាន់ៗ បានក្លាយជាប្រធានបទលេចធ្លោជាងគេនៅក្នុងសន្និសីទ និងទទួលបានការចាប់អារម្មណ៍យ៉ាងខ្លាំងពីគ្រប់ភាគីពាក់ព័ន្ធ។ ការពិភាក្សាបានផ្តោតលើតួនាទីកាន់តែសំខាន់នៃរ៉ែទាំងនេះ សម្រាប់ការផ្លាស់ប្តូរទៅប្រើប្រាស់ថាមពលបៃតង ព្រមទាំងតម្រូវការចាំបាច់នៃអភិបាលកិច្ចប្រកបដោយតម្លាភាព និងគណនេយ្យភាព នៅទូទាំងខ្សែច្រវាក់ផ្គត់ផ្គង់រ៉ែ។ នៅក្នុងបទបង្ហាញបន្ទាប់ រ៉ែសំខាន់ៗទទួលបានការយកចិត្តទុកដាក់ច្រើនជាងវិស័យប្រេង និងឧស្ម័ន។ ការផ្តោតបែបនេះបានឆ្លុះបញ្ចាំងពីសារៈសំខាន់នៃការធានាថា កំណើនតម្រូវការរ៉ែត្រូវតែដើរទន្ទឹមគ្នានឹងការវិនិយោគប្រកបដោយការទទួលខុសត្រូវ ព័ត៌មានដែលអាចជឿទុកចិត្តបាន និងការចូលរួមយ៉ាងសកម្មពីសំណាក់សហគមន៍ដែលរងផលប៉ះពាល់។ សម្រាប់អូឌីស៊ី ការពិភាក្សាទាំងនេះបានគូសបញ្ជាក់កាន់តែច្បាស់អំពីតម្រូវការក្នុងការបម្លែងទិន្នន័យរ៉ែដែលស្មុគស្មាញ ឱ្យទៅជាព័ត៌មានដែលងាយយល់ និងអាចយកទៅប្រើប្រាស់ជាប្រយោជន៍បាន។ សហគមន៍ចាំបាច់ត្រូវការព័ត៌មានច្បាស់លាស់ ដើម្បីយល់ដឹងពីគម្រោងអភិវឌ្ឍន៍ដែលបានស្នើឡើង វាយតម្លៃផលប៉ះពាល់ដែលអាចកើតមាន និងចូលរួមក្នុងដំណើរការសម្រេចចិត្ត ស្តីពីការបែងចែកផលប្រយោជន៍ និងហានិភ័យ។
ទំនុកចិត្ត គឺជាប្រធានបទស្នូលនៃការពិភាក្សានៅក្នុងសន្និសីទ។ ព័ត៌មានដែលត្រឹមត្រូវ និងអាចជឿទុកចិត្តបាន គឺជាគ្រឹះដ៏សំខាន់សម្រាប់អភិបាលកិច្ចធនធានធម្មជាតិប្រកបដោយគណនេយ្យភាព និងជាមូលដ្ឋាននៃការសម្រេចចិត្តប្រកបដោយភាពឆ្លាតវៃ។ ការផ្សព្វផ្សាយទិន្នន័យគឺជាជំហានដំបូងដ៏សំខាន់ ប៉ុន្តែទិន្នន័យនឹងកាន់តែមានតម្លៃ នៅពេលដែលមនុស្សគ្រប់គ្នាអាចយល់ វាយតម្លៃភាពជឿជាក់ និងប្រើប្រាស់វាដើម្បីចោទជាសំណួរបាន។ ការបញ្ជាក់ប្រភពច្បាស់លាស់ ការផ្ទៀងផ្ទាត់ដោយប្រុងប្រយ័ត្ន និងការពន្យល់អំពីដែនកំណត់នៃទិន្នន័យ នឹងជួយកសាងទំនុកចិត្ត ព្រមទាំងបង្ហាញឱ្យឃើញនូវចន្លោះខ្វះខាតនៃព័ត៌មាន។ ទិន្នន័យបើកទូលាយផ្តល់នូវមូលដ្ឋានរួមសម្រាប់កិច្ចសន្ទនារវាងសហគមន៍ ស្ថាប័នរដ្ឋ ក្រុមហ៊ុនឯកជន អ្នកស្រាវជ្រាវ អ្នកសារព័ត៌មាន និងអង្គការសង្គមស៊ីវិល។ ទិន្នន័យទាំងនេះជួយឱ្យភាគីពាក់ព័ន្ធទាំងអស់អាចពិនិត្យមើលភស្តុតាងជាក់ស្តែង និងយល់ដឹងពីផលប៉ះពាល់នៃការសម្រេចចិត្តលើធនធានធម្មជាតិមកលើជីវភាពរបស់ពួកគេ។
របាយការណ៍បច្ចេកទេស និងសំណុំទិន្នន័យធំៗ ច្រើនតែមានភាពស្មុគស្មាញ និងពិបាកស្វែងយល់។ ប៉ុន្តែ សហគមន៍តែងតែត្រូវការចម្លើយចំពោះសំណួរជាក់ស្តែងដូចជា៖ តើគម្រោងនេះស្ថិតនៅទីណា? តើក្រុមហ៊ុនណាខ្លះបានចូលរួម? តើគម្រោងនេះអាចប៉ះពាល់ដល់ដីធ្លី ជីវភាព និងបរិស្ថានយ៉ាងដូចម្តេច? តើប្រជាពលរដ្ឋដែលរងផលប៉ះពាល់អាចលើកឡើងពីកង្វល់ និងចូលរួមក្នុងការសម្រេចចិត្តដោយរបៀបណា? ការបង្កើតផែនទីដែលងាយស្រួលប្រើប្រាស់ ការពន្យល់ដោយច្បាស់លាស់ និងការផ្តល់ព័ត៌មានជាភាសាតំបន់ អាចជួយឆ្លើយសំណួរទាំងនេះបាន។ ការប្រែក្លាយព័ត៌មានបច្ចេកទេសទៅជាចំណេះដឹងដែលអាចយកទៅប្រើប្រាស់បាន គឺជាកត្តាចាំបាច់សម្រាប់តម្លាភាពពិតប្រាកដ ជាពិសេសសម្រាប់ជនជាតិដើមភាគតិច និងក្រុមងាយរងគ្រោះ ដែលតែងតែជួបឧបសគ្គក្នុងការទទួលបានព័ត៌មាន និងការចូលរួមសម្រេចចិត្ត។
ក្នុងអំឡុងពេលសន្និសីទ លោក ទ្រី បានចែករំលែកសំណុំទិន្នន័យបើកទូលាយស្តីពីឧស្សាហកម្មនិស្សារណកម្មរបស់អូឌីស៊ី និងតំបន់មេគង្គ (ODM) ដោយបានបង្ហាញថា ទិន្នន័យដែលងាយស្រួលចូលប្រើ អាចជួយគាំទ្រយ៉ាងខ្លាំងដល់ការស្រាវជ្រាវ ការសន្ទនាផ្អែកលើភស្តុតាង និងការបង្កើនគណនេយ្យភាពក្នុងអភិបាលកិច្ចធនធានធម្មជាតិ។ អូឌីស៊ី មានប្រព័ន្ធទិន្នន័យ ផែនទី និងព័ត៌មានជាសាធារណៈ ស្តីពីធនធានរ៉ែ ព្រមទាំងវិស័យប្រេង និងឧស្ម័ននៅកម្ពុជា។ ធនធានទាំងនេះត្រូវបានប្រមូលផ្តុំពីប្រភពផ្សេងៗ ដើម្បីជួយឱ្យអ្នកប្រើប្រាស់អាចសិក្សា និងយល់ដឹងកាន់តែច្បាស់អំពីសកម្មភាពនិស្សារណកម្ម និងទំនាក់ទំនងរបស់វាទៅនឹងការអភិវឌ្ឍសង្គម-សេដ្ឋកិច្ច។ តាមរយៈវេទិកាទិន្នន័យបើកទូលាយ ការស្រាវជ្រាវ ការធ្វើផែនទី និងការបណ្តុះបណ្តាលសមត្ថភាព អូឌីស៊ី កំពុងគាំទ្រប្រជាពលរដ្ឋ អ្នកសារព័ត៌មាន អ្នកស្រាវជ្រាវ និងអង្គការសង្គមស៊ីវិល ក្នុងការទទួលបាន និងប្រើប្រាស់ព័ត៌មានអភិវឌ្ឍន៍ប្រកបដោយប្រសិទ្ធភាព។ ការចែករំលែកបទពិសោធន៍របស់អូឌីស៊ី និង ODM ក្នុងសន្និសីទនេះ បានផ្សារភ្ជាប់កិច្ចពិភាក្សាកម្រិតអន្តរជាតិ ជាមួយនឹងឧទាហរណ៍ជាក់ស្តែងនៃការប្រើប្រាស់ទិន្នន័យបើកទូលាយនៅកម្ពុជា និងក្នុងតំបន់មេគង្គ។
កិច្ចពិភាក្សាទាំងនេះមានសារៈសំខាន់ជាពិសេស ក្នុងបរិបទដែលលំហសង្គមស៊ីវិលប្រឈមនឹងការរួមតូច និងអាទិភាពនៃការផ្តល់ថវិកាមានការផ្លាស់ប្តូរ។ ការរក្សាបាននូវតម្លាភាព ទាមទារឱ្យមានការគាំទ្រជាបន្តបន្ទាប់លើសិទ្ធិទទួលបានព័ត៌មានរបស់សាធារណជន ការស្រាវជ្រាវឯករាជ្យ និងការចូលរួមយ៉ាងសកម្មពីអង្គការសង្គមស៊ីវិល។ សម្រាប់សហគមន៍ដែលប្រឈមនឹងការផាត់ចេញ ឬការរើសអើង ការទទួលបានទិន្នន័យត្រូវតែដើរទន្ទឹមគ្នាជាមួយនឹងកិច្ចសន្ទនាប្រកបដោយបរិយាបន្ន ព្រមទាំងឱកាសក្នុងការសួរសំណួរ និងទទួលបានចម្លើយច្បាស់លាស់។ ក្នុងន័យនេះ អង្គការសង្គមស៊ីវិលដើរតួនាទីយ៉ាងសំខាន់ក្នុងការជួយប្រជាពលរដ្ឋបកស្រាយព័ត៌មាន និងឆ្លុះបញ្ចាំងពីកង្វល់របស់ពួកគេទៅកាន់ថ្នាក់ដឹកនាំ។ ការចូលរួមរបស់លោក ទ្រី បានបញ្ជាក់ឡើងវិញនូវសារៈសំខាន់នៃការភ្ជាប់ទិន្នន័យដែលជឿទុកចិត្តបាន ទៅនឹងការចូលរួមរបស់សាធារណជន។ នៅពេលដែលការចាប់អារម្មណ៍លើវិស័យរ៉ែសំខាន់ៗកាន់តែកើនឡើង សហគមន៍ចាំបាច់ត្រូវយល់ដឹងអំពីរបៀបគ្រប់គ្រងធនធាន ការបែងចែកផលប្រយោជន៍ និងផលប៉ះពាល់នៃការសម្រេចចិត្តទាំងនោះចំពោះអនាគតរបស់ពួកគេ។ តាមរយៈការធ្វើឱ្យព័ត៌មានមានភាពងាយស្រួលទទួលបាន និងការជំរុញការប្រើប្រាស់ព័ត៌មានទាំងនោះ អូឌីស៊ី រួមចំណែកក្នុងការកសាងទំនុកចិត្តសាធារណៈ ការចូលរួមប្រកបដោយការយល់ដឹង និងគណនេយ្យភាព ដែលជាគ្រឹះមិនអាចខ្វះបានសម្រាប់វិបុលភាពរួម។
