សេចក្ដីជូនដំណឹងស្តីពី ការផ្តល់សេវាជិះរថយន្តក្រុង និងកាណូត ដោយឥតគិតថ្លៃ ជូនប្រជាពលរដ្ឋ រយៈពេល៧ថ្ងៃ សម្រាប់ឱកាសបុណ្យចូលឆ្នាំខ្មែរ
នៅថ្ងៃទី០៥ ខែមេសា ឆ្នាំ២០១៩ រដ្ឋបាលរាជធានីភ្នំពេញ បានចេញផ្សាយសេចក្ដីជូនដំណឹងដល់សាធារណជនទាំងអស់ឱ្យបានជ្រាបពីការបម្រើសេវារថយន្តក្រុង និងកាណូតដឹកអ្នកដំណើរ ដោយឥតគិតថ្លៃ នៅក្នុងឱកាសបុណ្យចូលឆ្នាំខ្មែរខាងមុខនេះ។ ចាប់ពីថ្ងៃទី ១២ រហូតដល់ថ្ងៃទី ១៨ ខែមេសា រដ្ឋបាលរាជធានីភ្នំពេញនឹងដាក់រថយន្តក្រុងចំនួន ១២០ គ្រឿង ដើម្បីបម្រើដល់ការធ្វើដំណើររបស់មន្ត្រីរាជការ កងកំលាំងប្រដាប់អាវុធ ប្រជាពលរដ្ឋ កម្មករ កម្មការនី និងសាធារណជនទាំងអស់ ដើម្បីធ្វើដំណើរទៅតាមបណ្ដាខេត្តនានា និងត្រលប់មកវិញ ដោយមិនមានការគិតកម្រៃសេវា។ ទន្ទឹមនឹងនេះដែរ រដ្ឋបាលរាជធានីភ្នំពេញ នឹងរៀបចំរថយន្តក្រុងចំនួន ១១៥ គ្រឿង រួមនឹងកាណូតដឹកអ្នកដំណើរចំនួន ៤ គ្រឿង សម្រាប់បម្រើសេវាដឹកជញ្ជូនសាធារណៈដោយមិនបង់ប្រាក់ រយៈពេល ៧ថ្ងៃដូចគ្នា ជូនចំពោះប្រជាពលរដ្ឋដែលរស់នៅក្នុងទីក្រុងភ្នំពេញ។ សូមបញ្ជាក់ថា រថយន្តក្រុងនឹងចេញដំណើរពីស្ថានីយ៍នានា នៅវេលាម៉ោង ៥៖៣០ ព្រឹក។
រដ្ឋបាលរាជធានីភ្នំពេញ
