សេចក្ដីប្រកាសព័ត៌មាន៖ ជប៉ុនផ្ដល់ ៣៦៣,២២៤ ដុល្លារអាមេរិក សម្រាប់គម្រោងកែលម្អផ្លូវថ្នល់ សាងសង់បរិក្ខារសុខាភិបាល និង ស្ថានីយផលិតទឹកស្អាតខ្នាតតូច
នៅថ្ងៃទី៨ ខែមករា ឆ្នាំ២០២០ រដ្ឋាភិបាលជប៉ុន បានឯកភាពផ្តល់ថវិកាក្រោមគ្រោងការណ៍ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខមនុស្ស ជាតិ (ជំនួយគូសាណូណ៌) សរុបចំនួន ៣៦៣,២២៤ ដុល្លារអាមេរិក ដល់អង្គភាព ចំនួនបី សម្រាប់ការកែលម្អផ្លូវក្នុងខេត្តប៉ៃលិន សាងសង់អគារសម្រាកពេទ្យក្នុងខេត្តកណ្តាល និង សាងសង់ស្ថានីយផលិតទឹកស្អាតខ្នាតតូចក្នុងខេត្តពីរនាទិសពាយ័ព្យ (ខេត្តឧត្តរមានជ័យ និង បន្ទាយមានជ័យ)។ កិច្ចសន្យាផ្តល់ជំនួយ ត្រូវបានចុះហត្ថលេខានៅថ្ងៃនេះ ដោយឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងអ្នកតំណាងអង្គភាពទទួលជំនួយទាំងបី។
ស្ថានទូតជប៉ុននៅកម្ពុជា
