សមាជិកសភាគណបក្សប្រជាជនកម្ពុជាទាំង ៦៨ រូប ចូលធ្វើសច្ចាប្រណិធាន នៅក្នុងព្រះបរមរាជវាំង នៅល្ងាចថ្ងៃទី២៣កញ្ញា

ភ្នំពេញ: បន្ទាប់ពី​ព្រះករុណា ព្រះបាទ សម្តេចព្រះ​បរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា បាន​យាង​ជា​ព្រះរាជាធិបតីភាព​ដ៏​ខ្ពង់ខ្ពស់ ក្នុងសម័យ​ប្រជុំ​ដំបូង នៃ​រដ្ឋសភា នីតិកាល​ទី​៥ រួម​មក សម្តេច​អគ្គ​មហា​ពញា​ចក្រី ហេង សំរិន ព្រឹទ្ធសមាជិក​អ្នកតំណាងរាស្ត្រ ដែល​ជាប់ឆ្នោត បាន​បន្ត​ដឹកនាំ​កិច្ចប្រជុំ​រដ្ឋសភា​លើក​ទី​១ នៅ​វិមាន​រដ្ឋសភា នៅ​ព្រឹក​ថ្ងៃទី​២៣ ខែកញ្ញា ឆ្នាំ​២០១៣​។​ ​    ​ ​នៅក្នុង​ កិច្ចប្រជុំ សម្តេច​អគ្គ​មហា​ពញា​ចក្រី ហេង សំរិន ព្រឹទ្ធសមាជិក ដែលមាន​អាយុ​ច្រើនជាងគេ រហូតដល់ ៨០ ឆ្នាំ បាន​ដឹកនាំ​សមាជិកសភា ធ្វើការ​អនុម័ត​លើ​បទបញ្ជាផ្ទៃក្នុង​រដ្ឋសភា នីតិកាល​ទី​៥ ដោយ​យោងតាម​មាត្រា ៨៨ ថ្មី រដ្ឋធម្មនុញ្ញ ចែង​ពី​ការប្រជុំ​សភា​ដោយ​មតិ​ភាគច្រើន​ដាច់ខាត​។ មាត្រា ៨២​ថ្មី រដ្ឋធម្មនុញ្ញ​អនុម័ត​បទបញ្ជាផ្ទៃក្នុង​សភា ដោយមាន​សំឡេងគាំទ្រ ៦៨ លើ ៦៨ និង​ឧបសម្ព័ន្ធ​ទី​៥ នៃ​រដ្ឋធម្មនុញ្ញ​ចែង​អំពី​ការធ្វើ​សច្ចាប្រណិធាន​។​ ​ សូមបញ្ជាក់ថា សមាជិកសភា​ចំនួន ៥៥ រូប នៃ​គណបក្ស​សង្គ្រោះ​ជាតិ ពុំបាន​ចូលរួម​ប្រជុំ​ដំបូង នៃ​រដ្ឋសភា នៅ​ព្រឹក​ថ្ងៃទី​២៣​កញ្ញា​ទេ ហើយក៏​ពុំមាន​វត្តមាន​ចូលធ្វើ​សច្ចាប្រណិធាន នៅ​រសៀល​ម៉ោង ៣ ថ្ងៃទី​២៣ ខែកញ្ញា​នេះ នៅ​ព្រះបរមរាជវាំង​ឡើយ​។​ ​    ​ ​សម្តេច​ពញា​ចក្រី ហេង សំរិន ព្រឹទ្ធសមាជិក​រដ្ឋសភា បាន​មានប្រសាសន៍​ខ្លី​ប្រាប់​ក្រុមអ្នកកាសែត​ថា ការមិន​មក​ចូលប្រជុំ​ដំបូង នៃ​រដ្ឋសភា របស់​គណបក្ស​សង្គ្រោះ​ជាតិ ជា​សិទ្ធិ​របស់គេ​។