លោក ស៊ូប៊ែឌី សន្យាលើកសំណើរបស់សហជីពទៅពិភាក្សាជាមួយរដ្ឋាភិបាល
អ្នករាយការណ៍ពិសេសរបស់ឧត្ដមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំកម្ពុជា បានមកដល់ប្រទេសកម្ពុជា ដើម្បីពិនិត្យមើលការអនុវត្តផ្នែកគោរពសិទ្ធិមនុស្ស។ ជាងនេះទៀត អ្នករាយការណ៍ពិសេសរូបនេះ ក៏គ្រោងនឹងជួបសន្ទនាជាមួយដៃគូពាក់ព័ន្ធនានា និងមន្ត្រីរដ្ឋាភិបាលដែរ។ លោក សុរិយា ស៊ូប៊ែឌី ដែលបានចេញមកទទួលញត្តិដោយផ្ទាល់ពីក្រុមសហជីព និងបណ្ដាញអ្នកតស៊ូមតិក្នុងរឿងដីធ្លីនៅថ្ងៃទី១៣ មករា បានសន្យាថា នឹងយកសំណើទាំងនេះទៅពិនិត្យដោយល្អិតល្អន់ មុននឹងត្រូវជួបពិភាក្សាជាមួយដៃគូពិគ្រោះយោបល់ និងរដ្ឋាភិបាលក្នុងដំណើរនៃការបំពេញទស្សនកិច្ចរបស់លោកជាថ្មីម្ដងទៀតនេះ។ ថ្លែងទៅកាន់អ្នកចូលរួមប្រមាណជាង ១០០នាក់ នៅខាងមុខការិយាល័យនៃឧត្ដមស្នងការអង្គការសហប្រជាជាតិប្រចាំកម្ពុជា លោក សុរិយា ស៊ូប៊ែឌី អះអាងថា លោកនឹងយកសំណើសុំកិច្ចអន្តរាគមន៍របស់សហជីព និងសហគមន៍ដែលមានជម្លោះដីធ្លីក្នុងតំបន់បឹងកក់ និងបុរីកីឡា ដែលទទូចសុំឲ្យរដ្ឋាភិបាលដោះលែងមនុស្ស ២៣នាក់នេះ ទៅពិនិត្យជាមុនសិន មុននឹងត្រូវពិភាក្សាបន្តជាមួយរដ្ឋាភិបាល។ លោក ស៊ូប៊ែឌី ដែលជាញឹកញាប់តែងត្រូវបានរដ្ឋាភិបាលចំអកថា ជាអ្នករាយការណ៍ឲ្យបក្សប្រឆាំងថ្លែងថា លោកបានដឹងពីព្រឹត្តិការណ៍ដែលបានកើតឡើងក្នុងប្រទេសកម្ពុជា សព្វគ្រប់ហើយក្នុងដំណាក់កាលចុងក្រោយនេះ។ បើទោះជាបែបណា លោកបញ្ជាក់ថា នឹងនៅតែបន្តឃ្លាំមើលការវិវត្តន៍ស្ថានការណ៍នេះបន្តទៀត។ លោក សុរិយា ស៊ូប៊ែឌី៖ «ខ្ញុំនឹងអានញត្តិដែលបានដាក់ជូនខ្ញុំនៅពេលនេះ ហើយក៏អរគុណដែលអស់លោក លោកស្រីបានមកជួបខ្ញុំដែរ។ ខ្ញុំនឹងជួបប្រជុំជាមួយតួអង្គសំខាន់ៗ ដែលពាក់ព័ន្ធ ក៏ដូចរដ្ឋាភិបាលដែរ។ ខ្ញុំនឹងប្រឹងប្រែងឲ្យអស់ពីសមត្ថភាពរបស់ខ្ញុំ ចំពោះកង្វល់ទាំងនេះ របស់លោក លោកស្រី ជាមួយដៃគូដែលខ្ញុំនឹងជួប»។ …
បុគ្គលិកសារព័ត៌មាន វិទ្យុអាស៊ីសេរី
http://www.rfa.org/khmer/news/human-rights/rally-at-un-office-01122014222212.html
