ឈន កក្កដា៖ បទពិសោធន៍ និងចំណាប់អារម្មណ៍នៃការហាត់ការនៅអូឌីស៊ី
កក្កដា ក្នុងកម្ពុជា អាយស៊ីធីខែម ២០២៦
ខ្ញុំចាប់ផ្ដើមចូលធ្វើការងារជាអ្នកហាត់ការនៅ អង្គការទិន្នន័យអំពីការអភិវឌ្ឍ (អូឌីស៊ី) នៅថ្ងៃទី០៩ ខែមីនា ឆ្នាំ២០២៦ ក្នុងនាមជាអ្នកហាត់ការផ្នែកបណ្ណាធិការ-ស្រាវជ្រាវ។ ខ្ញុំពិតជារីករាយយ៉ាងខ្លាំងដែលទទួលបានឱកាសមួយនេះ។ ខ្ញុំជានិស្សិតដែលទើបបញ្ចប់ការសិក្សាដោយទទួលបានសញ្ញាបត្រកិត្តិយសថ្នាក់បរិញ្ញាបត្រលើជំនាញវិទ្យាសាស្ត្រនយោបាយ និងរដ្ឋបាលសាធារណៈ ពីវិទ្យាស្ថានសិក្សាអន្តរជាតិ និងគោលនយោបាយសាធារណៈ នៃសាកលវិទ្យាល័យភូមិន្ទភ្នំពេញ ដោយមានចំណាប់អារម្មណ៍យ៉ាងខ្លាំងលើកិច្ចការសង្គម និងការស្រាវជ្រាវ។ កន្លងមក ខ្ញុំទទួលបានបទពិសោធន៍មួយចំនួនតាមរយៈការធ្វើជាអ្នកស្ម័គ្រចិត្ត និងជាអ្នកហាត់ការនៅតាមស្ថាប័នផ្សេងៗ។ ខ្ញុំបានចាប់ផ្ដើមចូលរួមក្នុងកិច្ចការងារសង្គមតាំងពីអាយុ ១៥ ឆ្នាំ ដោយផ្តើមចេញពីការធ្វើជាគ្រូស្ម័គ្រចិត្តបង្រៀនភាសាអង់គ្លេសរយៈពេលជាង ៥ ឆ្នាំ នៅសមាគមមួយក្នុងតំបន់ដាច់ស្រយាលនៃខេត្តកំពត ដែលជាស្រុកកំណើតរបស់ខ្ញុំ។ បន្តបន្ទាប់មក ខ្ញុំបានចាប់ផ្ដើមអនុវត្តគម្រោងផ្សេងៗជាមួយយុវជនដទៃទៀតនៅក្នុងសមាគម ដើម្បីលើកកម្ពស់ការយល់ដឹងរបស់សហគមន៍អំពីបរិស្ថាន អនាម័យ ការគ្រប់គ្រងសំណល់ និងជាពិសេសគឺវេទិកាលើកកម្ពស់ការអប់រំសម្រាប់កុមារ និងយុវជន ព្រមទាំងការលើកទឹកចិត្តឱ្យបន្តការសិក្សាថ្នាក់ឧត្តមសិក្សា ដើម្បីឱ្យកុមារ និងយុវជននៅក្នុងសហគមន៍មានឱកាសទទួលបានការអប់រំកាន់តែទូលំទូលាយ។
ការទទួលបានឱកាសធ្វើជាអ្នកហាត់ការនៅ អូឌីស៊ី គឺជាមាគ៌ា និងបទពិសោធន៍ដ៏ល្អបំផុតសម្រាប់ខ្ញុំ។ ក្នុងនាមជាយុវជនម្នាក់ដែលចូលចិត្តការងារសង្គម និងមានបំណងចង់ចូលរួមចំណែកដល់សង្គមជាតិ ក្នុងរយៈពេល ៦ ខែនៅអូឌីស៊ី ខ្ញុំទទួលបានបទពិសោធន៍អនុវត្តជាក់ស្ដែងយ៉ាងច្រើន។ នៅក្នុងតួនាទីរបស់ខ្ញុំ កិច្ចការប្រចាំថ្ងៃរួមមាន ការអាន និងស្វែងរកព័ត៌មាន ព្រមទាំងសេចក្ដីប្រកាសផ្សេងៗដើម្បីដាក់បញ្ចូលទៅលើគេហទំព័ររបស់អូឌីស៊ី។ ទោះបីជាការងារនេះជាការងារប្រចាំថ្ងៃ និងដដែលៗក៏ដោយ ក៏ខ្ញុំមិនដែលមានអារម្មណ៍ធុញទ្រាន់ឡើយ ព្រោះការអានព័ត៌មាន និងការស្វែងរកសេចក្ដីប្រកាសបានធ្វើឱ្យខ្ញុំទទួលបានព័ត៌មានបច្ចុប្បន្នភាពថ្មីៗជាប្រចាំអំពីព្រឹត្តិការណ៍នានានៅក្នុងសង្គម។
បន្ថែមពីនេះ ខ្ញុំបានសរសេរទំព័រប្រធានបទមួយស្ដីពី «ស្ត្រីនៅក្នុងរដ្ឋាភិបាល និងនយោបាយ»។ ការសរសេរប្រធានបទនេះបានជួយឱ្យខ្ញុំទទួលបានបទពិសោធន៍លើការសរសេរផ្អែកលើប្រធានបទច្បាស់លាស់ និងការរក្សាភាពត្រឹមត្រូវនៃទិន្នន័យដើម ដោយមិនមានការបញ្ចូលការវិភាគបន្ថែម ឬទស្សនៈផ្ទាល់ខ្លួនឡើយ។ ខ្ញុំបានរៀនសូត្របានច្រើនបន្ថែមទៀតពាក់ព័ន្ធនឹងការប្រមូលទិន្នន័យ ការស្រង់យកទិន្នន័យពីប្រភពច្បាស់លាស់ ការរក្សាអត្ថន័យដើមពីប្រភពព័ត៌មាន និងការប្រើប្រាស់ទិន្នន័យបើកទូលាយ។ ចំណុចសំខាន់មួយដែលខ្ញុំកោតសរសើរយ៉ាងជ្រាលជ្រៅនោះគឺ អូឌីស៊ីផ្តល់ជូននូវទិន្នន័យបើកទូលាយ ដោយប្រកាន់ខ្ជាប់យ៉ាងម៉ឹងម៉ាត់នូវអព្យាក្រឹតភាពនៃទិន្នន័យ។
ក្រៅពីកិច្ចការចម្បង និងការសរសេរអត្ថបទ ខ្ញុំក៏បានរួមចំណែកជួយដល់ផ្នែកផ្សេងៗទៀតនៅក្នុងអង្គភាព ដូចជា ការពិនិត្យផ្ទៀងផ្ទាត់អត្ថបទ ការកែសម្រួល ការបកប្រែ ការបញ្ចូលទិន្នន័យ និងការថតរូបជាដើម។ លើសពីនេះ ខ្ញុំមានឱកាសបានចូលរួមក្នុងវគ្គសិក្ខាសាលា និងវគ្គបណ្ដុះបណ្ដាលសហគមន៍នៅតាមខេត្តមួយចំនួន ដូចជា ខេត្តក្រចេះ រតនគិរី និងមណ្ឌលគិរី ដោយខ្ញុំបានជួយរៀបចំសម្ភារ ជួយសម្របសម្រួលផ្ទាល់នៅទីតាំង និងកត់ត្រាកំណត់ហេតុនៃសិក្ខាសាលា។ ក្រោយពេលវគ្គបណ្ដុះបណ្ដាលត្រូវបានបញ្ចប់ ខ្ញុំបានសរសេរអត្ថបទប្លុកមួយដែលមានចំណងជើងថា «ពង្រឹងការការពារព្រៃសហគមន៍តាមរយៈទិន្នន័យបើកទូលាយ» ដែលត្រូវបានដាក់បញ្ចូលទៅលើគេហទំព័ររបស់អូឌីស៊ី។ បន្ថែមលើនេះ ខ្ញុំបានចូលរួមក្នុងវគ្គបណ្ដុះបណ្ដាលផ្សេងៗដែលរៀបចំដោយអូឌីស៊ី នៅរាជធានីភ្នំពេញ និងជំនួបបច្ចេកទេសស្ដីពីការធ្វើផែនទី ដែលកម្មវិធីទាំងនេះបានជួយឱ្យខ្ញុំទទួលបានចំណេះដឹង និងពង្រីកបណ្ដាញទំនាក់ទំនងសង្គមបន្ថែមលើភារកិច្ចការងារប្រចាំថ្ងៃ។
ជាពិសេសជាងនេះទៅទៀត ខ្ញុំទទួលបានឱកាសដ៏អស្ចារ្យមួយផ្សេងទៀត ដោយអូឌីស៊ីបានអនុញ្ញាតឱ្យខ្ញុំចូលរួមក្នុងកម្មវិធីកម្ពុជា អាយស៊ីធីខែម ២០២៦ ដែលនៅក្នុងនោះ ខ្ញុំបានចូលរួមចំណែកជាអ្នកស្ម័គ្រចិត្តកត់ត្រាកំណត់ហេតុ/សរសេរអត្ថបទប្លុក ក្នុងការរៀបចំកម្មវិធីនេះឱ្យទទួលបានជោគជ័យ។ នៅថ្ងៃកម្មវិធី ខ្ញុំបានសរសេរអត្ថបទប្លុកមួយដែលមានចំណងជើងថា «បរិយាកាសថ្ងៃដំបូងនៃការវិលត្រឡប់មកវិញនៃកម្ពុជា អាយស៊ីធីខែម ២០២៦» ដែលត្រូវបានដាក់បញ្ចូលទៅលើគេហទំព័ររបស់កម្ពុជា អាយស៊ីធីខែម។ នៅមុនពេល និងអំឡុងពេលកម្មវិធី តួនាទីរបស់ខ្ញុំគឺផ្តោតយ៉ាងម៉ត់ចត់លើការកត់ត្រាកំណត់ហេតុ ដោយប្រុងប្រយ័ត្នក្នុងការកត់ត្រា រក្សាទុក និងថែរក្សានូវព័ត៌មានលម្អិត សារសំខាន់ៗ និងទិន្នន័យដែលបានចែករំលែកដោយវាគ្មិនពេញមួយកម្មវិធី។ តាមរយៈឱកាសនេះ ខ្ញុំទទួលបានបទពិសោធន៍បន្ថែមទៀតលើការស្តាប់ដោយយកចិត្តទុកដាក់ ការកត់ត្រាកំណត់ហេតុ និងការក្រសោបយកចំណេះដឹងពាក់ព័ន្ធនឹងបញ្ញាសិប្បនិម្មិត សុវត្ថិភាពឌីជីថល សិទ្ធិ និងការទទួលបានព័ត៌មាន។ កម្មវិធីនេះក៏បានផ្តល់ឱកាសឱ្យខ្ញុំបានជួប និងស្តាប់នូវទស្សនៈស៊ីជម្រៅដែលបានចែករំលែកពីសំណាក់វាគ្មិនជំនាញៗផងដែរ។
អានអំពីកក្កដានៅទីនេះ
ជាចុងក្រោយ ក្រៅពីការទទួលបានចំណេះដឹង បទពិសោធន៍ និងជំនាញ អូឌីស៊ីក៏បានផ្ដល់ឱ្យខ្ញុំនូវបរិយាកាសការងារដ៏ល្អ និងពុំមានការរើសអើងនោះទេ។ រយៈពេល ៦ ខែនៃការហាត់ការនេះ ខ្ញុំពុំធ្លាប់ទទួលបាននូវពាក្យមិនសមរម្យ ឬពាក្យសម្ដីស្អប់ខ្ពើមឡើយ។ ផ្ទុយទៅវិញ ក្រុមការងាររបស់អូឌីស៊ី បានយកចិត្តទុកដាក់លើអ្នកហាត់ការគ្រប់ៗគ្នា លើកទឹកចិត្ត និងជំរុញឱ្យខ្ញុំធ្វើការងារបានល្អ ព្រមទាំងផ្តល់នូវដំបូន្មានល្អៗ និងប្រឹក្សាយោបល់អំពីអនាគតអាជីពការងារដល់ខ្ញុំផងដែរ។ ទាំងនេះគឺពិតជាមានតម្លៃខ្លាំងណាស់សម្រាប់ខ្ញុំ។ ខ្ញុំពិតជាអរគុណអូឌីស៊ីខ្លាំងណាស់ដែលបានផ្តល់នូវឱកាស និងបទពិសោធន៍ដែលមិនអាចកាត់ថ្លៃបានចំពោះខ្ញុំ។ សូមជូនពរឱ្យអូឌីស៊ីកាន់តែរីកចម្រើនបន្តទៅមុខ និងសម្រេចបានជោគជ័យនូវបេសកកម្មរបស់ខ្លួនកាន់តែច្រើន។ អូឌីស៊ីពិតជាស្ថាប័នដ៏ល្អ និងស័ក្តិសមសម្រាប់និស្សិតដែលកំពុងស្វែងរកឱកាសដើម្បីអនុវត្តជាក់ស្ដែង និងរួមចំណែកដល់សហគមន៍ទិន្នន័យបើកទូលាយនៅកម្ពុជា។ សូមអរគុណ!
