សេចក្តីប្រកាសព័ត៌មានស្តីពីកិច្ចប្រជុំពិភាក្សារវាងគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា ជាមួយនឹងក្រសួងព័ត៌មាន
នៅថ្ងៃទី២៥ ខែមករា ឆ្នាំ២០២៣ នៅវិមានរដ្ឋសភា គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា ជាមួយនឹងក្រសួងព័ត៌មាន និងសហការី បានរៀបចំកិច្ចប្រជុំពិភាក្សាដើម្បីស្វែងយល់ពី “កិច្ចការប្រព័ន្ធផ្សព្វផ្សាយនៅកម្ពុជា” ក្នុងគោលបំណងលើកកម្ពស់ប្រសិទ្ធិភាព និងប្រសិទ្ធផលនៃប្រព័ន្ធសារព័ត៌មាននៅកម្ពុជា សំដៅលើកកម្ពស់សិទ្ធិទទួលបានព័ត៌មានរបស់ប្រជាពលរដ្ឋ។ ក្រសួងព័ត៌មានបានឱ្យដឹងផងដែរថា ក្រសួងនឹងគិតគូរពីការធ្វើបច្ចុប្បន្នភាពលើច្បាប់ស្តីពីរបបសារព័ត៌មាននៅពេលខាងមុខ ដើម្បីឱ្យស្របទៅនឹងបរិបទជាក់ស្តែងនៃសង្គមជាតិ និងការកើនឡើងកាន់តែច្រើនទាំងកាសែត វិទ្យុ ទូរទស្សន៍ និងបណ្តាញផ្សព្វផ្សាយអនឡាញ។ ភាគីទាំងពីរក៏បានលើកឡើងអំពីសេចក្តីព្រាងច្បាប់ស្តីពីសិទ្ធិទទួលបានព័ត៌មាន ដែលជាច្បាប់ក៏សំខាន់ មានភាពស្មុគស្មាញ និងមានការពាក់ព័ន្ធក្រសួងស្ថាប័នជាច្រើនដែលត្រូវធ្វើការសិក្សាឱ្យបានគ្រប់ជ្រុងជ្រោយ។ បច្ចុប្បន្ន សេចក្តីព្រាងច្បាប់នេះ ស្ថិតនៅក្រសួងយុត្តិធម៌ កំពុងពិនិត្យមើលលើជំពូកស្តីពីទោសប្បញ្ញត្តិ និងមានគម្រោងសម្រេចចេញឱ្យបាននៅក្នុងនីតិកាលទី៧ នៃរដ្ឋសភា នាពេលខាងមុខ។
រដ្ឋសភានៃព្រះរាជាណាចក្រកម្ពុជា
