សេចក្តីជូនដំណឹង៖ ធនាគារជាតិនៃកម្ពុជាព្រមានអំពីសកម្មភាពបោកប្រាស់ និងការប្រើប្រាស់ឈ្មោះ និងរូបភាពរបស់ធនាគារ
នៅថ្ងៃទី១៤ ខែវិច្ឆិកា ឆ្នាំ២០២៥ ធនាគារជាតិនៃកម្ពុជា បានចេញសេចក្តីជូនដំណឹងជាសាធារណៈ ដើម្បីក្រើនរំឭកដល់សាធារណជនឱ្យប្រុងប្រយ័ត្នចំពោះសកម្មភាពបោកប្រាស់ដែលកំពុងកើនឡើង។ ធនាគារជាតិនៃកម្ពុជាបានគូសបញ្ជាក់ថា ជនល្មើសកំពុងប្រើប្រាស់ឈ្មោះ និមិត្តសញ្ញា និងរូបភាពថ្នាក់ដឹកនាំរបស់ធនាគារ ដើម្បីបង្កើតព័ត៌មានក្លែងក្លាយ និងផ្សព្វផ្សាយតាមបណ្តាញសង្គម ក្នុងគោលបំណងទុច្ចរិត និងបោកប្រាស់ទ្រព្យសម្បត្តិរបស់ប្រជាជន។ ល្បិចបោកប្រាស់ទូទៅរួមមាន ការក្លែងបន្លំខ្លួនជាសាច់ញាតិ ឬបុគ្គលិកធនាគារដើម្បីស្នើសុំផ្ទេរប្រាក់ ការផ្តល់រង្វាន់/ការងារក្លែងក្លាយដែលតម្រូវឱ្យផ្ញើប្រាក់ជាមុន ឬការបញ្ចុះបញ្ចូលបុគ្គលឱ្យលក់គណនីធនាគាររបស់ខ្លួនដោយផ្តល់កម្រៃខ្ពស់។ ធនាគារជាតិនៃកម្ពុជាបានជំរុញយ៉ាងខ្លាំងដល់សាធារណជនឱ្យបង្កើនការប្រុងប្រយ័ត្នខ្ពស់ ចៀសវាងចុចលើតំណភ្ជាប់ គេហទំព័រ ឬវេទិកាវិនិយោគដែលគ្មានប្រភពច្បាស់លាស់ ហើយមិនត្រូវផ្ទេរប្រាក់ ផ្តល់ព័ត៌មានផ្ទាល់ខ្លួន ឬលក់គណនីធនាគារឱ្យអ្នកដទៃឡើយ ដើម្បីទប់ស្កាត់ការខាតបង់ផ្នែកហិរញ្ញវត្ថុ និងការជាប់ពាក់ព័ន្ធនឹងទង្វើខុសច្បាប់។ ធនាគារជាតិនៃកម្ពុជាណែនាំឱ្យរាយការណ៍រាល់ការប៉ុនប៉ងបោកប្រាស់ណាមួយជាបន្ទាន់ទៅកាន់អាជ្ញាធរពាក់ព័ន្ធ។
ធនាគារជាតិនៃកម្ពុជា
