បក្សសង្គ្រោះជាតិប្រើវិធីសាស្ត្រស្ងៀមស្ងាត់ ខណៈសហជីពគ្រោងនឹងធ្វើកូដកម្មនៅសប្តាហ៍ក្រោយ
នៅពេលសហជីពចំនួនប្រាំមួយបានរៀបចំ ការធ្វើកូដកម្មទូទាំងប្រទេសកាលពីខែធ្នូ ដើម្បីទាមទារឲ្យមានការដំឡើងប្រាក់ខែគោលដល់១៦០ដុល្លារ គណបក្សសង្គ្រោះជាតិបានចូលរួមយ៉ាងសកម្មជាមួយសហជីពទាំងនោះ។ មេដឹកនាំគណបក្សប្រឆាំង បាននាំគ្នាចូលរួមគាំទ្រនៅខាងក្រៅច្រកទ្វាររោងចក្រនានានៅទូទាំងប្រទេស ហើយកម្មកររោងចក្រកាត់ដេររាប់ម៉ឺននាក់បានជួបជុំគ្នានៅទីលានប្រជាធិតេយ្យក្នុងរាជធានីភ្នំពេញ ជាទីដែលលោក សម រង្ស៊ី ប្រធានគណបក្សសង្គ្រោះជាតិបានប្រាប់ទៅកាន់កម្មកររោងចក្រកាត់ដេរទាំងនោះថា កុំឲ្យទទួលយកប្រាក់ខែដែលមិនឡើងដល់១៦០ដុល្លារ សូម្បីតែខ្វះ១ដុល្លារក៏មិនបានដែរ។ បន្ទាប់ពីកន្លងហួសជាង២ខែក្រោយពេលរដ្ឋាភិបាលបានបង្ក្រាបយ៉ាងហិង្សាលើកម្មកររោងចក្រកាត់ដេរនិងអ្នកគាំទ្រគណបក្សសង្គ្រោះជាតិដែលកំពុងធ្វើបាតុកម្ម សហជីពមួយចំនួនគ្រោងនឹងរៀបចំការធ្វើកូដកម្មជាលើកទី២ ដែលនឹងផ្តើមនៅសប្តាហ៍ក្រោយ។ ប៉ុន្តែលើកនេះ គណបក្សសង្គ្រោះជាតិមិនបានបញ្ចេញសកម្មភាពរបស់ខ្លួនដើម្បីគាំទ្រកម្មកររោងចក្រកាត់ដេរឡើយ។ លោក សម រង្ស៊ី បានឲ្យដឹងថា មេដឹកនាំគណបក្សសង្គ្រោ ះជាតិមិនបានពិភាក្សាគ្នាអំពីការចូលរួមគាំទ្រនៅក្នុងការធ្វើកូដកម្មដែលគ្រោងនឹងប្រព្រឹត្តទៅនៅថ្ងៃទី១២ ខែមីនា ដែលត្រូវបានរៀបចំដោយសហជីពនិងសមាគមចំនួន១៦នោះទេ។ … លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានលើកឡើងថា ការធ្វើបាតុកម្មនឹងមានប្រសិទ្ធភាពជាងមុន ប្រសិនបើគ្មានការចូលរួមពាក់ព័ន្ធពីគណបក្សសង្គ្រោះជាតិ។ លោក ស៊ីណា បានមានប្រសាសន៍ថា “នៅពេលអ្នកនយោបាយចូលរួមនៅក្នុងការធ្វើកូដកម្មនេះ សហជីពនឹងជួបការលំបាកដើម្បីសម្រេចនូវអ្វីដែលខ្លួនបានទាមទារទៅវិញទេ។ វានឹងធ្វើឲ្យគេគិតថា សហជីពធ្វើអ្វីបម្រើអ្នកនយោបាយមិនមែនកម្មករនោះទេ”។ លោកបានប្រសាសន៍បន្តទៀតថា “អ្នកនយោបាយមិនគួរលូកដៃចូលក្នុងរឿងរបស់សហជីពឡើយ ព្រោះវាអាចធ្វើឲ្យការងាររបស់សហជីពអាចជួបបញ្ហាកាន់តែច្រើន។ ហើយបន្ទាប់មក [រដ្ឋាភិបាល] គិតថា នៅពេលខ្លួនដំឡើងប្រាក់ខែ អ្នកនយោបាយ [មកពីគណបក្សប្រឆាំង] នឹងទទួលបានផលប្រយោជន៍”។ …
Colin Meyn និង ផន បុប្ផា
http://www.cambodiadailykhmer.com/news/11517/
