ក្រសួងបរិស្ថានសម្រេចផ្លាស់ប្តូរទីតាំងថ្មីរបស់ខ្លួនម្តងទៀតទៅក្បែរកាស៊ីណូនិងសណ្ឋាគារ ណាហ្គាវើល
កាលពីម្សិលមិញ មន្ត្រីម្នាក់បានឲ្យដឹងថា ក្រសួងបរិស្ថាននឹងផ្លាស់ប្ដូរការិយាល័យរបស់ខ្លួនទៅកាន់ដីមួយកន្លែងក្បែរកាស៊ីណូនិងសណ្ឋាគារណាហ្គាវើលក្នុងខណ្ឌចំការមន រាជធានីភ្នំពេញ បន្ទាប់ពីរដ្ឋមន្ត្រីក្រសួងបរិស្ថានថ្មីបានលើកឡើងថា ទីស្នាក់ការថ្មីរបស់ខ្លួនដែលគ្រោងនឹងសាងសង់នៅខណ្ឌមានជ័យ ស្ថិតនៅឆ្ងាយពីកណ្តាលរាជធានីពេក។ ក្រសួងបរិស្ថានសព្វថ្ងៃមានទីតាំងនៅតាមបណ្តោយមហាវិថីព្រះសីហនុនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ប៉ុន្តែត្រូវបានគេគ្រោងផ្លាស់ទៅដីមួយកន្លែងទំហំ៩.០០០ ម៉ែត្រការ៉េនៅតាមបណ្តោយផ្លូវជាតិលេខ១ក្នុងខណ្ឌមានជ័យ បន្ទាប់ពីក្រសួងនេះបានដោះដូរដីជាមួយក្រុមហ៊ុនមួយដែលគេមិនស្គាល់ឈ្មោះ។ ឥឡូវ ក្រសួងនេះបានសម្រេចផ្លាស់ប្តូរមកកាន់ដីមួយកន្លែងទំហំ៥.០០០ម៉ែត្រក្រឡាចម្ងាយទីតាំងចាស់ប្រហែល១,៥គីឡូម៉ែត្រ នេះបើយោងតាមលោក សៅ សុភាព នាយកខុទ្ទកាល័យរបស់លោក សាយ សំអាល់ រដ្ឋមន្ត្រីក្រសួងបរិស្ថានដែលទើបតែងតាំងថ្មី។ … លោក សុភាព បានមានប្រសាសន៍ថា “ក្រសួងបរិស្ថាននឹងចាប់ផ្តើមសាងសង់ទីតាំងរបស់ខ្លួននៅខែក្រោយតាមបណ្តោយទន្លេបាសាក់ក្បែរកោះពេជ្រ”។ លោក សុភាព បានលើកឡើងថា ការផ្លាស់ប្តូរនេះគឺពីព្រោះលោក សំអាល់ គិតថា ការិយាល័យថ្មីនៅតាមបណ្តោយផ្លូវជាតិលេខ១ វាឆ្ងាយពេកសម្រាប់មន្ត្រីរបស់ក្រសួងបរិស្ថាន។ លោ សុភាព បានឲ្យដឹងថា ក្រសួងបានប្រគល់អគារដែលមិនទាន់សាងសង់ចប់រួចរាល់នៅតាមបណ្តោយផ្លូវជាតិលេខ១ឲ្យទៅក្រុមហ៊ុន Ratana Cooperation and Constuction ជាក្រុមហ៊ុនមួយដែលបានចុះកិច្ចសន្យាទទួលសាងសង់អគាររបស់ក្រសួងបរិស្ថាន។ លោកបានមានប្រសាសន៍ថា “យើងបានប្រគល់អគារដំបូង [ស្ថិតនៅតាមបណ្តោយផ្លូវជាតិលេខ១] ទៅឲ្យក្រុមហ៊ុន Ratana Cooperation and Constuction ”។ …
ឃី សុវុទ្ធី
http://www.cambodiadailykhmer.com/news/11091/
