ធនាគារជាតិនៃកម្ពុជា ជូនដំណឹងអំពីការផ្សាយពាណិជ្ជកម្ម និងការផ្តល់ប្រាក់កម្ចីខុសច្បាប់
នៅថ្ងៃទី ២៥ ខែសីហា ឆ្នាំ ២០២២ ធនាគារជាតិនៃកម្ពុជា បានចេញផ្សាយសេចក្តីប្រកាសព័ត៌មានស្តីពីការផ្សាយពាណិជ្ជកម្ម និងការផ្តល់ប្រាក់កម្ចីខុសច្បាប់។ ធនាគារជាតិនៃកម្ពុជាបានសង្កេតឃើញថាមានជនខិលខូចមួយចំនួនបានផ្សព្វផ្សាយយ៉ាងបើកចំហ និងផ្តល់ឥណទានដល់ប្រជាពលរដ្ឋតាមរូបភាពផ្សេងៗជាច្រើន ដូចជា ប្រព័ន្ធអនឡាញ បណ្តាញសង្គម ការផ្សព្វផ្សាយតាមខិត្តប័ណ្ណ និងការបិតផ្សាយតាមទីកន្លែងសាធារណៈនានាជាដើម។ ការផ្តល់ឥណទានដោយក្រុមហ៊ុន ឬបុគ្គលដែលគ្មានអាជ្ញាបណ្ណទាំងនេះ គឺជាសកម្មភាពល្មើសនឹងច្បាប់ជាធរមាន ជាពិសេស ច្បាប់ស្តីពី គ្រឹះស្ថានធនាគារនិងហិរញ្ញវត្ថុ។
ធនាគារជាតិនៃកម្ពុជា អំពាវនាវសាធារណជនមេត្តាប្រុងប្រយ័ត្នឱ្យបានខ្ពស់បំផុត និងសូមលើកទឹកចិត្តឱ្យប្រើប្រាស់តែសេវារបស់គ្រឹះស្ថានផ្លូវការតែប៉ុណ្ណោះ។ ធនាគារជាតិនៃកម្ពុជា កំពុងសហការជាមួយអាជ្ញាធរមាន សមត្ថកិច្ចពាក់ព័ន្ធដើម្បីចាត់វិធានការតាមផ្លូវច្បាប់ចំពោះក្រុមហ៊ុន ឬបុគ្គលដែលធ្វើសកម្មភាពល្មើសនានាតាមនីតិវិធីច្បាប់ជាធរមាន។
ធនាគារជាតិនៃកម្ពុជា
