យុទ្ធសាស្ត្របំផ្លាញព្រៃឈើឲ្យអស់ពី ខេត្តព្រះវិហារ របស់ក្រុមហ៊ុន ឧកញ៉ា ទ្រី ភាព
ប្រភេទឈើធ្នង់ ដែលមានមុខកាត់បីតឹកបួនជ្រុងបណ្តោយប្រវែង ២ ម៉ែត្របានតម្រៀបគ្នាជាគំនរនៅតាមផ្ទះនីមួយៗរបស់ប្រជាជននៅក្នុងស្រុកចំនួនបីនៃ ខេត្តព្រះវិហារ ដោយដាក់រង់ចាំឈ្មួញមកប្រមូលយកនៅពេលល្ងាច ខណៈពេលសំឡេងសន្ធឹករបស់គោយន្តដែលផ្ទុកទៅដោយរណាររ៉ៃថ្មីៗ បានកំពុងធ្វើដំណើរចេញពីភូមិនៅពេលព្រឹកព្រលឹមដើម្បីទៅកាប់និងប្រមូលឈើដែលបានផ្តួលរួចហើយនៅកណ្តាលព្រៃដឹកយកមកដាក់នៅក្នុងភូមិដែលនេះគឺជាយុទ្ធសាស្ត្ររបស់ក្រុមហ៊ុន លោកឧកញ៉ា ទ្រី ភាព ដែលលើកទឹកចិត្តឲ្យពលរដ្ឋទៅកាប់បំផ្លាញព្រៃឲ្យអស់នៅក្នុង ខេត្តព្រះវិហារ។ នៅក្នុងគោយន្តដែលផ្ទុកទៅដោយឈើធ្វើចរាចរណ៍ដោយសេរីនៅក្នុង ឃុំធ្មា ស្រុកជ័យសែន លោក ថោង កុសល ជាឈ្មោះដែលអ្នកសារព័ត៌មានដាក់ឲ្យដែលជាពលរដ្ឋម្នាក់តែងចេញមុខប្រឆាំងជាមួយនឹងឈ្មួញឈើនៅក្នុងឃុំរបស់លោកបានថ្លែងថា មានថៅកែរងរបស់ក្រុមហ៊ុន លោក ឧកញ៉ា ទ្រី ភាព បានមកក្នុងភូមិប្រាប់ប្រជាពលរដ្ឋឲ្យដើរទៅកាប់ព្រៃហើយគេមកទិញនៅទីនេះតាមផ្ទះនៅពេលល្ងាច។ លោកបានថ្លែងថា៖ «ថៅកែគេដើររកទិញតាមផ្ទះហើយគេបាញ់ថ្នាំសម្គាល់ ខ្ញុំមិនដឹងថា មានន័យថា ម៉េចទេ វាជាអក្សរបារាំង។ នៅពេលយប់បន្ទាប់ពីប្រមូលឈើអស់ទើបគេដឹកចេញពីភូមិ»។ … យោងតាមរបាយការណ៍រូបភាពផ្កាយរណប ដែលចេញកាលពី ខែធ្នូ ឆ្នាំ២០១៣ ផែនទីដែលមានលក្ខណៈចលនាគេហទំព័រ Open Development Cambodia (ODC) បានបង្កើតពីរូបភាពផ្កាយរណប ណាស្សា (NASA) បានបង្ហាញលម្អិតអំពីការបំផ្លាញខ្លាំងក្លាទៅលើព្រៃឈើរបស់ ប្រទេសកម្ពុជា ជាការបំផ្លាញដែលបានកើនឡើងយ៉ាងខ្លាំងក្នុងរយៈកាល ៥ ឆ្នាំចុងក្រោយនេះ។ គេហទំព័រ ODC បានឲ្យដឹងថា ការវិភាគរូបភាពផ្កាយរណបបង្ហាញថា នៅក្នុង ឆ្នាំ១៩៧៣ ប្រហែល ៧២,១១ ភាគរយនៃ ប្រទេសកម្ពុជា ត្រូវបានគ្របដណ្តប់ដោយព្រៃឈើ។ រូបភាពថ្មីៗបានបង្ហាញថា គម្របព្រៃឈើបច្ចុប្បន្នមានតិចទៅៗគឺចំនួន ៤៦,៣៣ ភាគរយ ដោយរួមបញ្ចូលទាំងចម្ការកៅស៊ូផង។ …
ម៉ៃ ទិត្យថារ៉ា
http://www.postkhmer.com/national/1-national-news/112996-2014-04-09-03-18-39
