កាកបាទក្រហមកម្ពុជា គឺជាសង្គមមនុស្សធម៌ដ៏សំខាន់នៅកម្ពុជា។ រដ្ឋាភិបាលបានកំណត់កាកបាទក្រហមកម្ពុជាជាជំនួយដល់ស្ថាប័នសាធារណៈដែលផ្តល់ជំនួយមនុស្សធម៌។ ក្រៅពីទីស្នាក់ការជាតិ កាកបាទក្រហមកម្ពុជា មានសាខាចំនួន ២៥ នៅគ្រប់បណ្តាលខេត្តនៃព្រះរាជាណាចក្រកម្ពុជា។1 កាកបាទក្រហមកម្ពុជាត្រូវបានបង្កើតឡើងក្នុងឆ្នាំ១៩៥៥ ហើយបានធ្វើការយ៉ាងជិតស្និទ្ធជាមួយគណៈកម្មាធិការអន្តរជាតិនៃកាកបាទក្រហម ចាប់តាំងពីពេលនោះមក។2 គណៈកម្មាធិការអន្តរជាតិនៃកាកបាទក្រហម និងកាកបាទក្រហមកម្ពុជាបានចុះកិច្ចព្រមព្រៀងក្របខ័ណ្ឌភាពជាដៃគូរយៈពេលបីឆ្នាំក្នុងឆ្នាំ២០១៦។3 ដៃគូសំខាន់ៗរបស់កាកបាទក្រហមកម្ពុជា រួមមានកាកបាទក្រហមអូស្ត្រាលី កាកបាទក្រហមជប៉ុន កាកបាទក្រហមហ្វាំងឡង់ សមាគមកាកបាទក្រហមនៃប្រទេសចិន សហព័ន្ធកាកបាទក្រហមអន្តរជាតិ គណៈកម្មាធិការអន្តរជាតិនៃកាកបាទក្រហម កាកបាទក្រហមដាណឺម៉ាក និង World Mate ។4
អ្នកស្ម័គ្រចិត្តកាកបាទក្រហមកម្ពុជាដឹកនាំចរាចរណ៍។ រូបភាព ដោយ Michael Stout, បានថតនៅថ្ងៃទី ២៧ ខែកុម្ភៈ ឆ្នាំ២០១០។ ក្រោមអាជ្ញាបណ្ណ CC BY-SA 2.0 ។
អ្នកស្ម័គ្រចិត្តកាកបាទក្រហម និងអឌ្ឍចន្ទក្រហមមានប្រមាណ ១៧ លាននាក់ នៅក្នុងសហគមន៍មូលដ្ឋាន។5 ក្នុងឆ្នាំ២០១៤ សមាជិកកាកបាទក្រហមកម្ពុជាមានប្រមាណជាង ២០ម៉ឺននាក់ អ្នកស្ម័គ្រចិត្តកាកបាទក្រហមមានចំនួន ២០.៤៥៦នាក់ និងយុវជនកាកបាទក្រហមមាន ២៩.០៩៩នាក់។6
កាកបាទក្រហមកម្ពុជាចូលរួមក្នុងសកម្មភាពជំនួយមនុស្សធម៌ និងការអភិវឌ្ឍន៍ផ្សេងៗនៅក្នុងប្រទេស។7 កាកបាទក្រហមកម្ពុជាបានជួយដល់ជនដែលរងគ្រោះដោយទឹកជំនន់ ខ្យល់ព្យុះ និងគ្រោះមហន្តរាយធម្មជាតិផ្សេងទៀត។8 កាកបាទក្រហមកម្ពុជាក៏លើកទឹកចិត្តអ្នកដែលមានហានិភ័យខ្ពស់នៃគ្រោះមហន្តរាយ ឱ្យកាន់តែមានភាពធន់ ដោយជំរុញលទ្ធភាពទទួលបានអាហារ និងអនុវត្តគំនិតផ្តួចផ្តើមអប់រំផងដែរ។ កាកបាទក្រហមកម្ពុជាបានធ្វើការដើម្បីកែលម្អទឹកស្អាត និងអនាម័យ ដែលធ្វើឱ្យប្រសើរឡើងនូវសុខភាពរបស់ប្រជាជននៅក្នុងដំណើរការនេះ។ ជាមួយនឹងគំនិតផ្តួចផ្តើមប្រឆាំងនឹងមេរោគអេដស៍ ជំងឺគ្រុនឈាម និងជំងឺឆ្លងផ្សេងៗទៀត កាកបាទក្រហមកម្ពុជាក៏បានធ្វើការដើម្បីលើកកម្ពស់សុខភាពផងដែរ។ កាកបាទក្រហមកម្ពុជាបានដោះស្រាយកង្វល់សេដ្ឋកិច្ចសង្គម ដូចជាការលើកកម្ពស់ការយល់ដឹងអំពីគ្រោះថ្នាក់នៃការជួញដូរមនុស្ស និងការផ្តល់ប្រាក់កម្ចីខ្នាតតូច ដើម្បីជួយប្រជាជនឱ្យមានជីវិតកាន់តែប្រសើរឡើង និងកាត់បន្ថយភាពក្រីក្រ។9
ចាប់តាំងពីឆ្នាំ ១៩៩៤ មក សម្តេចព្រះមហាក្សត្រី នរោត្តម មុនីនាថ សីហនុ បានធ្វើជាប្រធានកិត្តិយសកាកបាទក្រហមកម្ពុជា។ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ភរិយាលោកនាយករដ្ឋមន្ត្រី ហ៊ុន សែន បានធ្វើជាប្រធានកាកបាទក្រហមកម្ពុជាតាំងពីឆ្នាំ១៩៩៨។10 ប៊ុន រ៉ានី ហ៊ុន សែន បានទទួលកិត្តិយសអន្តរជាតិជាច្រើនសម្រាប់ការងាររបស់ខ្លួនជាមួយកាកបាទក្រហមកម្ពុជា ក្នុងការលើកកម្ពស់ជីវភាពស្ត្រី និងកុមារឱ្យកាន់តែប្រសើរឡើង ជាពិសេសលើវិស័យកុមារកំព្រា សុវត្ថិភាពក្នុងគ្រួសារ និងការបណ្តុះបណ្តាលវិជ្ជាជីវៈដល់ស្ត្រី។ ក្នុងឆ្នាំ២០១១ ប៊ុន រ៉ានី ហ៊ុន សែន ត្រូវបានគេដាក់ឈ្មោះថាជាជើងឯកថ្នាក់ជាតិសម្រាប់សុខភាពមាតា និងទារកដោយ នាយកប្រចាំតំបន់អាស៊ីប៉ាស៊ីហ្វិក មូលនិធិប្រជាជនអង្គការសហប្រជាជាតិ ហើយបានទទួលលិខិតសរសើរពី UNICEF និង UNAIDS ផងដែរ។11
កាកបាទក្រហមកម្ពុជា គឺជាតួអង្គសំខាន់មួយក្នុងការចែកចាយច្បាប់ស្តីពីការគ្រប់គ្រងគ្រោះមហន្តរាយ ឆ្នាំ២០១៥ដើម្បីធានាបាននូវចំណេះដឹងកាន់តែប្រសើរឡើងអំពីសិទ្ធិ ភារកិច្ច និងកាតព្វកិច្ចរបស់ប្រជាជនចម្រុះ ជាពិសេសនៅកម្រិតសហគមន៍។ កាកបាទក្រហមកម្ពុជាត្រូវបានគាំទ្រដោយសហព័ន្ធអន្តរជាតិនៃកាកបាទក្រហម និងអឌ្ឍចន្ទក្រហម ក្នុងការបង្កើតកញ្ចប់ចែកចាយជាប្រព័ន្ធ និងអនុវត្តដ៏ទូលំទូលាយ ដែលមានប្រធានបទចំនួនបីដូចខាងក្រោម៖
- ការប្តេជ្ញាចិត្តអន្តរជាតិ និងតំបន់
- ច្បាប់កម្ពុជាស្តីពីការគ្រប់គ្រងគ្រោះមហន្តរាយ
- ដឹងពីសិទ្ធិ តួនាទី និងទំនួលខុសត្រូវរបស់អ្នកក្នុងការគ្រប់គ្រងហានិភ័យគ្រោះមហន្តរាយ។12
កាកបាទក្រហមកម្ពុជាបានអនុវត្តផែនការស្នូលចំនួនបួននៅក្នុងផែនការយុទ្ធសាស្ត្រឆ្នាំ ២០១១-២០២០ រួមមានការគ្រប់គ្រងគ្រោះមហន្តរាយ សុខភាព និងការថែទាំសុខភាពនៅក្នុងសហគមន៍ ការលើកកម្ពស់គោលការណ៍ជាមូលដ្ឋាននៃចលនា និងតម្លៃមនុស្សធម៌ និងការអភិវឌ្ឍន៍អង្គការ និងការអភិវឌ្ឍន៍ធនធាន។13 កាកបាទក្រហមកម្ពុជាទទួលបានមូលនិធិគាំទ្រពីអ្នករួមចំណែក មូលនិធិរដ្ឋ ដៃគូ និងប្រភពផ្សេងៗទៀត។ ក្នុងខួបលើកទី ១៥៦ របស់ខ្លួន កាកបាទក្រហមកម្ពុជាទទួលបានជំនួយជាង ២០ លានដុល្លារអាមេរិក ដែលកើនឡើង ២ លានដុល្លារធៀបនឹងឆ្នាំមុន។14
ក្នុងនាមជាអង្គការមនុស្សធម៌ឈានមុខគេរបស់កម្ពុជា កាកបាទក្រហមកម្ពុជាបានធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា និងអ្នកពាក់ព័ន្ធដទៃទៀត ដើម្បីឆ្លើយតបយ៉ាងសកម្ម និងមានប្រសិទ្ធភាពក្នុងការចែកអំណោយមនុស្សធម៌ដល់ជនរងគ្រោះពីគ្រោះមហន្តរាយគ្រប់ប្រភេទ ជាពិសេសអ្នកដែលរងផលប៉ះពាល់ដោយទឹកជំនន់ និងជំងឺកូវីដ-១៩។15
ជំនួយមនុស្សធម៌
គ្រោះមហន្តរាយធម្មជាតិដូចជា ខ្យល់ព្យុះ គ្រោះរាំងស្ងួត និងទឹកជំនន់ បានជំរុញឱ្យមានសកម្មភាពឆ្លើយតបយ៉ាងសំខាន់ចាប់តាំងពីដើមឆ្នាំ២០២០ មក។16 ក្នុងអំឡុងពេលទឹកជំនន់ សកម្មភាពបន្ទាន់ត្រូវបានផ្តួចផ្តើមអនុម័តជំនួយសង្គ្រោះបន្ទាន់ ដើម្បីជួយដល់សាខាកាកបាទក្រហមកម្ពុជា ដែលរងផលប៉ះពាល់យ៉ាងធ្ងន់ធ្ងរក្នុងខេត្តពោធិ៍សាត់ បាត់ដំបង បន្ទាយមានជ័យ កំពង់ស្ពឺ និងកំពង់ធំ។17 សាខាដែលទទួលបានថវិកា ១០០លានរៀល ត្រូវបានអនុញ្ញាតឱ្យទិញសម្ភារៈសង្គ្រោះចែកជូនជនរងគ្រោះជាបន្ទាន់។ សាខាកាកបាទក្រហមកម្ពុជានីមួយៗ ត្រូវកំណត់អាទិភាពលើគោលគំនិតនៃការរក្សាអាយុជីវិត មុនពេលជួយដល់ការកែលម្អជីវភាពរស់នៅរបស់ប្រជាពលរដ្ឋនៅទីតាំងដែលមានសុវត្ថិភាព និងផ្ទះផ្ទាល់ខ្លួនរបស់ពួកគេ។ កាកបាទក្រហមកម្ពុជាបានផ្តល់ជំនួយមនុស្សធម៌ដល់ ១១១.៧៨៤ គ្រួសារ (រួមទាំង ២៧.៣២១ គ្រួសារ មកពីទីស្នាក់ការជាតិ និង ៨៤.៤៦៣ គ្រួសារមកពីសាខារបស់កាកបាទក្រហមកម្ពុជា)។18
ការត្រៀមលក្ខណៈគ្រោះមហន្តរាយ
កាកបាទក្រហមកម្ពុជាបង្កើតភាពធន់របស់សហគមន៍ចំពោះគ្រោះមហន្តរាយ ដោយមានសកម្មភាពសំខាន់ៗចំនួនបួនដូចជា៖
- ទឹកស្អាត និងអនាម័យ៖ ដើម្បីផ្តល់ទឹកស្អាត និងអនាម័យនៅឆ្នាំ២០២០ កាកបាទក្រហមកម្ពុជា (ដោយមានថវិកាពីមូលនិធិ World Mate Foundation សមាគមកាកបាទក្រហមនៃប្រទេសចិន និងថវិកាសាខាកាកបាទក្រហមកម្ពុជា) បានសាងសង់អណ្តូងចំនួន ២៥៣ នៅក្នុងខេត្តចំនួន ៩ ដែលបម្រើប្រជាពលរដ្ឋចំនួន ៤.៧៣៧ គ្រួសារ (២០.៤០៩ នាក់) ក្នុងខេត្ត កំពង់ស្ពឺ បាត់ដំបង កំពង់ធំ ក្រចេះ មណ្ឌលគិរី ប៉ៃលិន ព្រះវិហារ រតនគិរី និងស្ទឹងត្រែង។
- គម្រោងមីក្រូកម្ចីគ្មានការប្រាក់៖ កម្មវិធីនេះត្រូវបានអនុវត្តដោយទីស្នាក់ការកណ្តាលកាកបាទក្រហមកម្ពុជា និងសាខារបស់ខ្លួន ជាមួយនឹងមូលនិធិដែលផ្តល់ដោយគណៈកម្មាធិការអន្តរជាតិនៃកាកបាទក្រហម និងកាកបាទក្រហមកម្ពុជាផ្ទាល់ ដើម្បីជួយដល់ជនងាយរងគ្រោះនៅក្នុងសហគមន៍ រួមទាំងជនរងគ្រោះដោយសារមីន គ្រួសារ គ្រួសារអតីតយុទ្ធជនពិការ និងគ្រួសារអតីតយុទ្ធជនដំណើរការអាជីវកម្មខ្នាតតូច ដើម្បីលើកកម្ពស់ជីវភាពរស់នៅ ពង្រឹងភាពធន់នឹងសហគមន៍ និងកាត់បន្ថយហានិភ័យដោយផ្តល់ទំនិញ និងសាច់ប្រាក់ចំនួន ២៥០ ដុល្លារអាមេរិកដល់គ្រួសារនីមួយៗ។ បច្ចុប្បន្ននេះ គ្រួសារចំនួន ២៩៦ ក្នុងខេត្តចំនួន ៤ រួមមានខេត្តកណ្តាល ពោធិ៍សាត់ ឧត្តរមានជ័យ និងព្រះវិហារ បានទទួលអត្ថប្រយោជន៍ពីកម្មវិធីនេះ។
- គម្រោងកសាងភាពធន់ក្នុងសហគមន៍៖ គម្រោងនេះត្រូវបានអនុវត្តនៅស្រុកភ្នំស្រួច ខេត្តកំពង់ស្ពឺ ដោយផ្តល់ជូនបង្គន់អនាម័យគ្រួសារចំនួន ១៧៩ និងបង្គន់សហគមន៍ចំនួន ៣ នៅសាលាឃុំ សាងសង់ប្រព័ន្ធលូចំនួន ១២ ទីតាំង រៀបចំទូកសហគមន៍ចំនួន ១ ផ្តល់តង់ចល័តចំនួន ១ ជួសជុលស្រះចំនួន ១ ផ្តល់ធុងទឹកចំនួន ៦ នៅសាលាបឋមសិក្សា និងផ្ទះសប្បុរសធម៌ និងដាក់បដាការពាររន្ទះនៅទូទាំងភូមិចំនួន ១០ ទីតាំង។19
- គម្រោងយុវជនកាកបាទក្រហមកម្ពុជា និងសុវត្ថិភាពចរាចរណ៍ផ្លូវគោក៖20 សាខាកាកបាទក្រហមកម្ពុជា បានរៀបចំកម្មវិធី យល់ដឹងពីសុវត្ថិភាពចរាចរណ៍ផ្លូវគោកចំនួន ៤៧៧ ដោយមានអ្នកចូលរួមចំនួន ១៣១.៩២១នាក់ ក្នុងនោះស្រី ៧៩.៤៣៤នាក់ និងជនពិការចំនួន ៣២៩នាក់ ដើម្បីជួយរាជរដ្ឋាភិបាលកម្ពុជា កាត់បន្ថយចំនួនអ្នកស្លាប់ និងរបួសដោយសារគ្រោះថ្នាក់ចរាចរណ៍ ក៏ដូចជាកែលំអស្ថានភាពចរាចរណ៍ ដើម្បីសណ្តាប់ធ្នាប់សាធារណៈកាន់តែល្អប្រសើរនៅឆ្នាំ២០២០។21
ការឆ្លើយតបទៅនឹងជំងឺកូវីដ-១៩
សាខាកាកបាទក្រហមកម្ពុជាសហការយ៉ាងរឹងមាំជាមួយអាជ្ញាធរគ្រប់លំដាប់ថ្នាក់ ដើម្បីទប់ទល់នឹងជំងឺកូវីដ-១៩ នៅក្នុងសហគមន៍ ដោយដាក់ពង្រាយរថយន្តចល័ត ដើម្បីអប់រំ ផ្តល់ផ្ទាំងរូបភាព ផ្គត់ផ្គង់ម៉ាស អាល់កុល សាប៊ូ និងសកម្មភាពបង្ហាញពីរបៀបលាងដៃ។ យូនីសេហ្វ សហព័ន្ធអន្តរជាតិកាកបាទក្រហម និងអឌ្ឍចន្ទក្រហម គណៈកម្មាធិការអន្តរជាតិនៃកាកបាទក្រហម សប្បុរសជនក្នុងស្រុកនិងអន្តរជាតិ និងផ្នែកសាជីវកម្មទាំងអស់បានចូលរួមចំណែកថវិកា និងធនធានដល់បេសកកម្មនៃជំងឺកូវីដ-១៩។ យ៉ាងហោចណាស់ ៤០ម៉ឺនដុល្លារអាមេរិក ត្រូវបានបរិច្ចាគទៅកាកបាទក្រហមកម្ពុជាក្នុងខែមេសា ឆ្នាំ២០២១ ដើម្បីប្រយុទ្ធប្រឆាំងនឹងជំងឺកូវីដ-១៩។22 ក្នុងរយៈពេល ៩ ខែ កាកបាទក្រហមកម្ពុជាបានផ្តល់ជំនួយដល់គ្រួសារប្រមាណ ៧០.០០០ ដែលរងផលប៉ះពាល់ដោយជំងឺកូវីដ-១៩។23 ទន្ទឹមនឹងនេះ កាកបាទក្រហមកម្ពុជាភ្ជាប់ទំនាក់ទំនង និងពិនិត្យជាមួយសាខារបស់ខ្លួនជាប្រចាំ រួមទាំងការបណ្តុះបណ្តាលពីចម្ងាយ និងការប្រជុំជាមួយដៃគូបរទេសតាមរយៈប្រព័ន្ធវីដេអូ។24 ក្នុងការបង្ហាញនូវសាមគ្គីភាព កាកបាទក្រហមកម្ពុជាបានផ្គត់ផ្គង់ម៉ាស និងអាល់កុល ដល់មន្ទីរពេទ្យ និងមណ្ឌលសុខភាពចំនួន ៤ ព្រមទាំងឧបករណ៍ការពារផ្ទាល់ខ្លួន ដល់មន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ។25 កាកបាទក្រហមកម្ពុជាក៏បានអំពាវនាវឱ្យមានអ្នកស្ម័គ្រចិត្តសកម្មបន្ថែមទៀតួយុទ្ធនាការប្រយុទ្ធប្រឆាំងនឹងជំងឺកូវីដ-១៩។26
ការការពារជំងឺឆ្លង និងការបណ្តុះបណ្តាលជំនួយដំបូង
កាកបាទក្រហមហ្វាំងឡង់ គណៈកម្មាធិការអន្តរជាតិនៃកាកបាទក្រហម សហព័ន្ធអន្តរជាតិកាកបាទក្រហម និងអឌ្ឍចន្ទក្រហម កាកបាទក្រហមអ៊ីតាលី និងសមាគមកាកបាទក្រហមជប៉ុន បានចូលរួមយ៉ាងសកម្មនៅក្នុងការអនុវត្តគម្រោងជាច្រើនដើម្បីបង្ការជំងឺឆ្លង និងផ្តល់ការបណ្តុះបណ្តាលជំនួយដំបូងដូចខាងក្រោម៖
- គម្រោងកសាងសហគមន៍ភាពធន់
- ការការពារជំងឺឆ្លង និងមិនឆ្លងនៅក្នុងសហគមន៍
- គម្រោងបណ្តុះបណ្តាលជំនួយដំបូង។27
ការផ្សព្វផ្សាយព័ត៌មាន
កាកបាទក្រហមកម្ពុជាខិតខំប្រឹងប្រែងដើម្បីបង្កើន ពង្រឹង និងលើកកម្ពស់ការយល់ដឹងអំពីគោលការណ៍ជាមូលដ្ឋាន និងតម្លៃមនុស្សធម៌របស់ចលនា ដោយផ្តល់ការបណ្តុះបណ្តាលដល់យុវជន អ្នកស្ម័គ្រចិត្ត និងសមាជិកនៃកងយោធពលខេមរភូមិន្ទ ក៏ដូចជាការផ្សព្វផ្សាយព័ត៌មានស្តីពីផែនការស្នូលទាំងបួនតាមរយៈបណ្តាញទូរទស្សន៍ និងប្រព័ន្ធផ្សព្វផ្សាយសង្គម។ ចាប់តាំងពីការចាប់ផ្តើមនៃជំងឺកូវីដ-១៩ ការផ្សាយសមិទ្ធិផលរបស់កាកបាទក្រហមកម្ពុជាក្នុងឆ្នាំ២០១៩ រួមមានយុទ្ធនាការផ្សព្វផ្សាយការយល់ដឹង ការបញ្ជ្រាបជំងឺកូវីដ-១៩ និងសកម្មភាពផ្សេងៗរបស់កាកបាទក្រហមកម្ពុជា ត្រូវបានធ្វើផ្តាច់មុខតាមរយៈប៉ុស្តិ៍ទូរទស្សន៍។ ម្យ៉ាងវិញទៀត ប្រតិបត្តិការរៃអង្គាសថវិការបស់កាកបាទក្រហមកម្ពុជាក្នុងក្របខណ្ឌនៃជំងឺកូវីដ-១៩ បានឆ្លុះបញ្ជាំងពីយុទ្ធសាស្ត្រថ្មី ទាំងនៅកម្រិតការិយាល័យកណ្តាល និងថ្នាក់សាខារបស់កាកបាទក្រហមកម្ពុជា ជាមួយនឹងការទទួលអ្នកចូលរួមវិភាគទាន និងផ្សព្វផ្សាយឈ្មោះរបស់ពួកគេតាមរយៈប៉ុស្តិ៍ទូរទស្សន៍ បណ្តាញសង្គម និងប្រព័ន្ធផ្សព្វផ្សាយផ្សេងទៀត។28
ផែនការគ្រប់គ្រងគ្រោះមហន្តរាយនៃកាកបាទក្រហមកម្ពុជាឆ្នាំ២០២១
កាកបាទក្រហមកម្ពុជាបានបង្កើតផែនការគ្រប់គ្រងគ្រោះមហន្តរាយសម្រាប់ឆ្នាំ២០២១ ដូចខាងក្រោម៖
- បន្តបង្កើនសមត្ថភាពរបស់ប្រធានសាខា និងមន្ត្រីអនុសាខា ក្នុងការប្រតិបត្តិទាន់ពេលវេលា និងមានប្រសិទ្ធភាពនៃការកាត់បន្ថយហានិភ័យគ្រោះមហន្តរាយ ការត្រៀមខ្លួន និងការស្តារឡើងវិញ។
- បន្តផ្តល់ការបណ្តុះបណ្តាលទាក់ទងនឹងការគ្រប់គ្រងគ្រោះមហន្តរាយ ការប្រែប្រួលអាកាសធាតុ ព្រមទាំងការចែកចាយទឹក និងអនាម័យ។
សហការជាមួយដៃគូជាតិ-អន្តរជាតិសំខាន់ៗ និងគណៈកម្មាធិការជាតិគ្រប់គ្រងគ្រោះមហន្តរាយ ក្នុងប្រតិបត្តិការឆ្លើយតបគ្រោះមហន្តរាយ។ - បន្តផ្តល់វគ្គបណ្តុះបណ្តាលតាមប្រព័ន្ធអ៊ីនធឺណែត ស្តីពីសុវត្ថិភាពចរាចរណ៍ និងការដាក់បញ្ចូលជនពិការ ដល់នាយកសាខា បុគ្គលិកប្រតិបត្តិការ យុវជនកាកបាទក្រហម និងអ្នកស្ម័គ្រចិត្តនៅតាមក្រុង និងខេត្ត ព្រមទាំងអនុវត្តយុទ្ធនាការសុវត្ថិភាពចរាចរណ៍នៅតាមទីសាធារណៈក្នុងទីក្រុង និងផ្លូវសំខាន់ៗទូទាំងប្រទេសកម្ពុជា។
- បន្តពង្រីកគោលដៅដោយជោគជ័យនៃកម្ចីខ្នាតតូចដោយគ្មានការប្រាក់ដែលគាំទ្រដោយគណៈកម្មាធិការអន្តរជាតិនៃកាកបាទក្រហម។29
ទាក់ទងនឹងកាកបាទក្រហមកម្ពុជា
- គ្រោះមហន្តរាយ និងការឆ្លើយតបក្នុងគ្រាអាសន្ន
- គោលនយោបាយ និងការគ្រប់គ្រងការត្រៀមបង្ការគ្រោះមហន្តរាយ និងការឆ្លើយតបក្នុងគ្រាអាសន្ន
- ទីភ្នាក់ងារមិនមែនរដ្ឋាភិបាលសម្រាប់ការត្រៀមបង្ការគ្រោះមហន្តរាយ និងការឆ្លើយតបក្នុងគ្រាអាសន្ន
- គ្រោះមហន្តរាយ
- គ្រោះរាំងស្ងួត
- ទឹកជំនន់
- ការអភិវឌ្ឍសង្គម
ឯកសារយោង
- 1. កាកបាទក្រហមកម្ពុជា, បានចូលអាននៅថ្ងៃទី ០៤ ខែវិច្ឆិកា ឆ្នាំ២០២១។
- 2. មជ្ឈមណ្ឌលឧត្តមភាពក្នុងការគ្រប់គ្រងគ្រោះមហន្តរាយ និងជំនួយមនុស្សធម៌, “ប្រទេសកម្ពុជា សៀវភៅណែនាំស្តីពីការគ្រប់គ្រងគ្រោះមហន្តរាយ ឆ្នាំ២០២០,” ខែធ្នូ ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 3. គណៈកម្មាធិការអន្តរជាតិនៃកាកបាទក្រហម និងអឌ្ឍចន្ទក្រហម, “គណៈកម្មាធិការអន្តរជាតិនៃកាកបាទក្រហម និងអឌ្ឍចន្ទក្រហម,” ឆ្នាំ២០១៦, បានចូលអាននៅថ្ងៃទី ០៤ ខែវិច្ឆិកា ឆ្នាំ២០២១។
- 4. កាកបាទក្រហមកម្ពុជា, “រូបភាព៖ កាកបាទក្រហមកម្ពុជា,” បានចូលអាននៅថ្ងៃទី ១៧ ខែវិច្ឆិកា ឆ្នាំ២០២១។
- 5. កាកបាទក្រហមកម្ពុជា, “របាយណ៍ការប្រចាំឆ្នាំ២០២០,” ថ្ងៃទី ០៨ ខែឧសភា ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 6. កាកបាទក្រហមកម្ពុជា, “រូបភាព៖ កាកបាទក្រហមកម្ពុជា,” បានចូលអាននៅថ្ងៃទី ១៧ ខែវិច្ឆិកា ឆ្នាំ២០២១។
- 7. អង្គការស្បៀងអាហារ និងកសិកម្ម, "កម្ពុជាកំពុងស្វែងរកវិធីសាស្ត្រថ្មី ដើម្បីកាត់បន្ថយផលប៉ះពាល់ពីគ្រោះមហន្តរាយ ការពារអាយុជីវិត និងជីវភាពរស់នៅ," អង្គការស្បៀងអាហារ និងកសិកម្មនៅកម្ពុជា, ថ្ងៃទី ២១ ខែកញ្ញា ឆ្នាំ២០២១, បានចូលអាននៅថ្ងៃទី ០៤ ខែវិច្ឆិកា ឆ្នាំ២០២១។
- 8. នឹម ឆេង, "UN ស្វែងរកជំនួយ ៩លានដុល្លារ សម្រាប់ជនរងគ្រោះទឹកជំនន់នៅកម្ពុជា," ភ្នំពេញប៉ុស្តិ៍, ថ្ងៃទី ១៥ ខែវិច្ឆិកា ឆ្នាំ២០២០, បានចូលអាននៅថ្ងៃទី ០៥ ខែវិច្ឆិកា ឆ្នាំ២០២១។
- 9. មជ្ឈមណ្ឌលឧត្តមភាពក្នុងការគ្រប់គ្រងគ្រោះមហន្តរាយ និងជំនួយមនុស្សធម៌, "ប្រទេសកម្ពុជា សៀវភៅណែនាំស្តីពីការគ្រប់គ្រងគ្រោះមហន្តរាយ ឆ្នាំ២០២០," ខែធ្នូ ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 10. DBpedia, "អំពី ប៊ុន រ៉ានី," បានចូលអាននៅថ្ងៃទី ០៥ ខែវិច្ឆិកា ឆ្នាំ២០២១។
- 11. មជ្ឈមណ្ឌលឧត្តមភាពក្នុងការគ្រប់គ្រងគ្រោះមហន្តរាយ និងជំនួយមនុស្សធម៌, "ប្រទេសកម្ពុជា សៀវភៅណែនាំស្តីពីការគ្រប់គ្រងគ្រោះមហន្តរាយ ឆ្នាំ២០២០," ខែធ្នូ ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 12. ដូចឯកសារយោងខាងលើ។
- 13. កាកបាទក្រហមកម្ពុជា, "របាយណ៍ការប្រចាំឆ្នាំ២០២០," ថ្ងៃទី ០៨ ខែឧសភា ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 14. ឡុង ម៉ារីតា, "កាកបាទក្រហមកម្ពុជា ទទួលអំណោយជាង ២០លានដុល្លារ ក្នុងឱកាសគម្រប់ខួប ១៥៦ឆ្នាំ," ភ្នំពេញប៉ុស្តិ៍, ថ្ងៃទី ០៩ ខែឧសភា ឆ្នាំ២០១៩, បានចូលអាននៅថ្ងៃទី ០៤ ខែវិច្ឆិកា ឆ្នាំ២០២១។
- 15. កាកបាទក្រហមកម្ពុជា, "របាយណ៍ការប្រចាំឆ្នាំ២០២០," ថ្ងៃទី ០៨ ខែឧសភា ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 16. បុគ្គលិកខ្មែរថាមស៍, "ប៊ុន រ៉ានី ហ៊ុន សែន ដឹកនាំផ្លូវម្ដងទៀត ចែកអំណោយដល់សហគមន៍រងគ្រោះដោយទឹកជំនន់," ថ្ងៃទី ២៦ ខែតុលា ឆ្នាំ២០២០, បានចូលអាននៅថ្ងៃទី ០៥ ខែវិច្ឆិកា ឆ្នាំ២០២១។
- 17. វេទិកាឆ្លើយតបមនុស្សធម៌កម្ពុជា, "ផែនការឆ្លើយតបទឹកជំនន់នៅកម្ពុជាឆ្នាំ ២០២០ (សម្រាប់រយៈពេល ខែវិច្ឆិកា ឆ្នាំ ២០២០ ដល់ខែមេសា ឆ្នាំ ២០២១)," ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌, ថ្ងៃទី ១១ ខែវិច្ឆិកា ឆ្នាំ២០២០, បានចូលអាននៅថ្ងៃទី ០៤ ខែវិច្ឆិកា ឆ្នាំ២០២១។
- 18. កាកបាទក្រហមកម្ពុជា, "របាយណ៍ការប្រចាំឆ្នាំ២០២០," ថ្ងៃទី ០៨ ខែឧសភា ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 19. ដូចឯកសារយោងខាងលើ។
- 20. សហព័ន្ធអន្តរជាតិនៃកាកបាទក្រហម និងអឌ្ឍចន្ទក្រហម, "យុវជនស្ម័គ្រចិត្តកាកបាទក្រហមកម្ពុជា ជើងឯកសុវត្ថិភាពចរាចរណ៍," បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 21. កាកបាទក្រហមកម្ពុជា, "របាយណ៍ការប្រចាំឆ្នាំ២០២០," ថ្ងៃទី ០៨ ខែឧសភា ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 22. David Hutt, "ការជំរុញជំងឺកូវីដ-១៩ នៅកម្ពុជាផ្អែកលើជំនួយសប្បុរសធម៌អភិជន," The Diplomat, ថ្ងៃទី ២២ ខែមេសា ឆ្នាំ២០២១, បានចូលអាននៅថ្ងៃទី ០៤ ខែវិច្ឆិកា ឆ្នាំ២០២១។
- 23. ស៊ូន មីនា, "កាកបាទក្រហមកម្ពុជាផ្តល់ជំនួយដល់គ្រួសាររងគ្រោះជិត ៧ម៉ឺននាក់ ក្នុងរយៈពេល ៩ខែ," ខ្មែរថាមស៍, ថ្ងៃទី ០៤ ខែតុលា ឆ្នាំ២០២១, បានចូលអាននៅថ្ងៃទី ០៤ ខែវិច្ឆិកា ឆ្នាំ២០២១។
- 24. កាកបាទក្រហមកម្ពុជា, "កិច្ចប្រជុំកាកបាទក្រហមកម្ពុជាចែករំលែកការទទួលខុសត្រូវក្នុងការទប់ស្កាត់ការឆ្លងជំងឺកូវីដ-១៩," ឆ្នាំ២០២១, បានចូលអាននៅថ្ងៃទី ០៥ ខែវិច្ឆិកា ឆ្នាំ២០២១។
- 25. កាកបាទក្រហមកម្ពុជា, "កាកបាទក្រហមកម្ពុជាបរិច្ចាគម៉ាសដល់មន្ទីរពេទ្យចំនួន៣ ក្នុងរាជធានីភ្នំពេញ," ថ្ងៃទី ១៥ ខែកញ្ញា ឆ្នាំ២០២០, បានចូលអាននៅថ្ងៃទី ០៤ ខែវិច្ឆិកា ឆ្នាំ២០២១។
- 26. មុំ គន្ធា, "ប៊ុន រ៉ានី អំពាវនាវឱ្យមានសកម្មភាពស្ម័គ្រចិត្តបន្ថែមទៀត," ភ្នំពេញប៉ុស្តិ៍, ថ្ងៃទី ០៦ ខែធ្នូ ឆ្នាំ២០២០, បានចូលអាននៅថ្ងៃទី ០៥ ខែវិច្ឆិកា ឆ្នាំ២០២១។
- 27. កាកបាទក្រហមកម្ពុជា, "របាយណ៍ការប្រចាំឆ្នាំ២០២០," ថ្ងៃទី ០៨ ខែឧសភា ឆ្នាំ២០២០, បានចូលអាននៅថ្ងៃទី ០៣ ខែវិច្ឆិកា ឆ្នាំ២០២១។
- 28. ដូចឯកសារយោងខាងលើ។
- 29. ដូចឯកសារយោងខាងលើ។
