ទិដ្ឋភាពទូទៅនៃការដ្ឋានអាជីវកម្ម និងរោងចក្រចម្រាញ់រ៉ែមាសនៅអូរខ្វាវ ។ រូបថតពី គេហទំព័រហ្វេសប៊ុករបស់ក្រសួងរ៉ែ និងថាមពល ថតនៅថ្ងៃទី១១ ខែមិថុនា ឆ្នាំ២០២១។
ធនធានរ៉ែ ត្រូវបានកំណត់ថាជា “សារធាតុទាំងឡាយណា ទោះជាក្នុងទម្រង់រឹង រាវ ឧស្ម័ន ដែលកកើតឡើងដោយធម្មជាតិតាម ដំណើរវិវត្តភូគព្ភសាស្ត្រ ឬជាលទ្ធផលនៃការជីកយកពីក្នុងដី លើដី ក្នុងសមុទ្រ ក្រោមបាតសមុទ្រ មានជាអាទិ៍ត្បូងថ្ម ធ្យូងថ្ម រ៉ែអលោហៈ រ៉ែលោហៈ ទឹកខនិជ ថ្ម ក្រួស ខ្សាច់ ដីឥដ្ឋ ប្រេងកាត និងឧស្ម័ន” នេះបើយោងតាមមាត្រា ៣ នៃច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ (តទៅនេះហៅថាច្បាប់រ៉ែ)។1 ធនធានរ៉ែរបស់ប្រទេសកម្ពុជាត្រូវបានបែងចែកទៅជាប្រាំក្រុម រួមមាន៖
- រ៉ែលោហៈ
- រ៉ែអលោហៈ/រ៉ែឧស្សាហកម្ម
- ត្បូងនិងថ្មលម្អ
- រ៉ែឥន្ធនៈរឹង
- និងរ៉ែសំណង់។2
ធនធានរ៉ែទាំងអស់ក្នុងបូរណភាពទឹកដីនៃព្រះរាជាណាចក្រកម្ពុជាជាសម្បត្តិរដ្ឋ។ ដូច្នេះហើយការធ្វើប្រតិបត្តិការធនធានរ៉ែដោយគ្មានអាជ្ញាបណ្ណពីរដ្ឋគឺខុសច្បាប់។ ក្រសួងរ៉ែ និងថាមពល (MME) ទទួលខុសត្រូវលើការផ្តល់អាជ្ញាបណ្ណ ការគ្រប់គ្រង និងការត្រួតពិនិត្យប្រតិបត្តិការរុករករ៉ែ ដើម្បីធានាថាបទប្បញ្ញត្តិនៃច្បាប់រុករករ៉ែត្រូវបានគោរព។3 ចំនួនអាជ្ញាបណ្ណធនធានរ៉ែបានកើនឡើងយ៉ាងឆាប់រហ័សពីអាជ្ញាបណ្ណស្វែងរុករកចំនួន១៩ និងអាជ្ញាបណ្ណឧស្សាហកម្មអាជីវកម្មធនធានរ៉ែចំនួន១១ ពីឆ្នាំ ១៩៩៤-២០០៦ កើនដល់ អាជ្ញាបណ្ណអណ្តូងរ៉ែបើក និងការដ្ឋានវាយថ្ម(អាជីវកម្មរ៉ែសំណង់គ្រប់ប្រភេទ)សរុបចំនួន៤៣៥ អាជ្ញាបណ្ណឧស្សាហកម្មអាជីវកម្មធនធានរ៉ែចំនួន១៧ និងអាជ្ញាបណ្ណស្វែងរុករកចំនួន ៣០ គិតត្រឹមឆ្នាំ ២០២២។4
ប្រតិបត្តិការធនធានរ៉ែ
យោងតាមច្បាប់រ៉ែ ប្រតិបត្តិការធនធានរ៉ែមានបីដំណាក់កាលដូចជា បុរេសនា ស្វែងរុករក និងអាជីវកម្មធនធានរ៉ែ។ ដំណាក់កាលបុរេសនា គឺជាការស្វែងរុករកជំហានដំបូងនៅស្រទាប់ដីលើ ដោយប្រើប្រាស់ឧបករណ៍សាមញ្ញ ហើយមានការប៉ះពាល់បន្តិចបន្តួចដល់ផ្ទៃដី ដើម្បីកំណត់វត្តមានធនធានរ៉ែ ដែលមានតម្លៃពាណិជ្ជកម្ម និងអាចជាទិសដៅសម្រាប់ការស្នើសុំអាជ្ញាបណ្ណស្វែងរុករក និងអាជីវកម្មធនធានរ៉ែ។
ដំណាក់កាលបន្ទាប់គឺការស្វែងរុករក ដែលជាការសិក្សាស្រាវជ្រាវក្នុងបំណងរុករក និងធ្វើតេស្តសន្ទស្សន៍រ៉ែ ដើម្បីកំណត់សក្កានុពល ទំហំ គុណភាព បរិមាណ ព្រមទាំងលទ្ធភាពសេដ្ឋកិច្ច អាជីវកម្មតាមរយៈការធ្វើបុរសនា ការស្រាវជ្រាវភូគព្ភសាស្ត្រ រូបភូគព្ភសាស្ត្រ និងគីមីភូគព្ភសាស្ត្រ ការជីកកកាយ ការខួង ការដឹកជញ្ជូន និងការធ្វើវិភាគដី ដីល្បាប់ ទឹក ថ្ម និងគំរូរ៉ែផ្សេងៗទៀត។
ជាចុងក្រោយគឺការធ្វើអាជីវកម្មធនធានរ៉ែ ដែលសំដៅដល់ប្រតិបត្តិការជីកយកធនធានរ៉ែដែលក្នុងនោះ ធនធានរ៉ែត្រូវបានយកចេញពីជម្រករ៉ែ ធ្វើប្រព្រឹត្តកម្ម ដឹកជញ្ជូន លក់ដូរ ឬការនាំចេញក្នុងគោលបំណងពាណិជ្ជកម្ម។ ដោយឡែកការលក់ដូរ ការនាំចេញការនាំចូលលោហធាតុមានតម្លៃ ត្បូងថ្មមានតម្លៃដែលមិនទាន់ច្នៃ និងកែច្នៃរួចហើយ ត្រូវស្ថិតនៅក្រោមបញ្ញត្តិច្បាប់នៃ ព្រះរាជាណាចក្រកម្ពុជាដែលមានជាធរមាន។5
ផែនទីអន្តរកម្ម
ផែនទីនេះបង្ហាញពីសម្បទានសម្រាប់ការជីកយករ៉ែនៅកម្ពុជា។ អ្នកប្រើប្រាស់អាចបន្ថែមស្រទាប់បន្ថែម ដូចជាគម្រោងវិនិយោគបរទេសធំៗ ការវាយតម្លៃធនធានទង់ដែងដែលមិនទាន់រកឃើញនៅក្នុងប្រទេសកម្ពុជា និងសន្ទស្សន៍សក្ដានុពលនៃការអភិវឌ្ឍន៍ការជីកយករ៉ែលោហធាតុជាដើម ទៅក្នុងផែនទីដើម្បីស្វែងយល់បន្ថែមពីទិដ្ឋភាពនៃការជីកយករ៉ែនៅកម្ពុជា។
អាជ្ញាបណ្ណធនធានរ៉ែ
អាជ្ញាបណ្ណធនធានរ៉ែចែកចេញជាប្រាំមួយប្រភេទ ដើម្បីសម្រួលដល់អ្នកដាក់ពាក្យសុំ ក្នុងគោលដៅសម្រួលការគ្រប់គ្រងលើការងារស្វែងរុករក និងការធ្វើអាជីវកម្មធនធានរ៉ែ នៅក្នុងព្រះរាជាណាចក្រកម្ពុជាឱ្យមានប្រសិទ្ធភាព។6 អាជ្ញាបណ្ណធនធានរ៉ែទាំងនោះមានដូចជា៖
អាជ្ញាបណ្ណសិប្បកម្មធនធានរ៉ែ
អាជ្ញាបណ្ណសិប្បកម្មធនធានរ៉ែ អាចផ្តល់ឱ្យចំពោះតែប្រជាពលរដ្ឋខ្មែរប៉ុណ្ណោះ ក្នុងគោលបំណងអនុវត្តការងារស្វែងរុករក និងធ្វើអាជីវកម្មធនធានរ៉ែ ដោយប្រើប្រាស់ឧបករណ៍សាមញ្ញដែលមាននៅក្នុងមូលដ្ឋាន ហើយប្រើប្រាស់កម្លាំងផ្ទាល់ខ្លួន ឬជាលក្ខណៈគ្រួសារដែលមានចំនួនមិនលើសពី ៧នាក់។7 អាជ្ញាបណ្ណសិប្បកម្មធនធានរ៉ែ មានសុពលភាពរយះពេល ០១ ឆ្នាំ។8
អតិថិជនអាចមកដាក់ពាក្យសុំនៅច្រកចេញ-ចូលតែមួយ របស់មន្ទីររ៉ែ និងថាមពល រាជធានី-ខេត្ត។ ក្រោយពីអង្គភាពជំនាញពិនិត្យលើសំណុំឯកសារខាងគ្រប់គ្រាន់នោះ និងចុះពិនិត្យមើលទីតាំង និងការដ្ឋានបានត្រឹមត្រូវតាមលក្ខណៈបច្ចេកទេស និងបរិស្ថានរួចហើយក្នុងរយៈពេល ៤៥ថ្ងៃ បន្ទាប់មកអតិថិជនអាចមកបង់តម្លៃសេវានៃអាជ្ញាបណ្ណនៅមន្ទីររ៉ែ និងថាមពល រាជធានី-ខេត្ត។
ចំណែកឯតម្លៃសេវាផ្ដល់អាជ្ញាបណ្ណសិប្បកម្មធនធានរ៉ែគឺ ១០០ ០០០៛ (មួយសែនរៀល)។ សេវាពិនិត្យ រៀបចំ និងដំណើរការឯកសារ សម្រាប់ការផ្ដល់អាជ្ញាបណ្ណសិប្បកម្មធនធានរ៉ែគឺ ១០០ ០០០៛ (មួយសែនរៀល) និងការចុះបញ្ជីអាជ្ញាបណ្ណសិប្បកម្មធនធានរ៉ែគឺ ៥០ ០០០៛ (ប្រាំមុឺន រៀល)។9
អាជ្ញាបណ្ណអណ្តូងរ៉ែបើក និងការដ្ឋានវាយថ្ម
អាជ្ញាបណ្ណអណ្តូងរ៉ែបើក និងការដ្ឋានវាយថ្ម អាចផ្ដល់ឱ្យរូបវន្តបុគ្គល ឬនីតិបុគ្គលដែលមានលក្ខណសម្បត្តិ និងសមត្ថភាពគ្រប់គ្រាន់ ក្នុងបំណងអនុវត្តការងារស្វែងរុករក ធ្វើអាជីវកម្មធនធានរ៉ែសំណង់ និងធនធានរ៉ែ ឧស្សាហកម្មណាមួយបម្រើឱ្យការកសាងសង់ ឧស្សាហកម្មគីមី ឧស្សាហកម្មកែច្នៃ ហើយជីកយកពីអណ្តូងរ៉ែបើក ឬការដ្ឋានវាយថ្ម។10 អាជ្ញាបណ្ណអណ្តូងរ៉ែបើក និងការដ្ឋានវាយថ្ម មានសុពលភាពរយះពេល ០២ ឆ្នាំ។11
ការស្នើអាជ្ញាបណ្ណអណ្តូងរ៉ែបើក និងការដ្ឋានវាយថ្ម មានដំណើរការដូចគ្នានឹងអាជ្ញាបណ្ណសិប្បកម្មធនធានរ៉ែដែរ លើកលែងតែអតិថិជនត្រូវដាក់ពាក្យសុំអាជ្ញាបណ្ណនៅការិយាល័យច្រកចេញចូលតែមួយនៅក្រសួងរ៉ែ និងថាមពល បន្ទាប់មកអតិថិជនអាចមកបង់តម្លៃសេវានៃអាជ្ញាបណ្ណនៅការិយាល័យគ្រប់គ្រងចំណូលធនធានរ៉ែ នៃអគ្គនាយកដ្ឋានធនធានរ៉ែ។
យោងតាមច្បាប់រ៉ែ តម្លៃសេវាអាជ្ញាបណ្ណអណ្ដូងរ៉ែបើក និងការដ្ឋានវាយថ្ម មានតម្លៃ ១០ ០០០ ០០០៛ (ដប់លានរៀល) សម្រាប់ខ្សាច់សំណង់ ក្រួស ឡាតេរីត ដីឥដ្ឋ ហើយមានតម្លៃ ២០ ០០០ ០០០៛ (ម្ភៃលានរៀល) សម្រាប់ថ្មសំណង់ ថ្មអារ ម្នាងសិលា និងថ្មផ្សេងទៀតដែលមានលក្ខណៈប្រហាក់ប្រហែល។ រីឯសេវាពន្យារបន្តសុពលភាពនៃអាជ្ញាបណ្ណអណ្តូងរ៉ែបើក និងការដ្ឋានវាយថ្មសម្រាប់ថ្មសំណង់ ថ្មអារ ម្នាងសិលា និងថ្មផ្សេងទៀតដែលមានលក្ខណៈប្រហាក់ប្រហែលមានតម្លៃ ២០ ០០០ ០០០៛ (ម្ភៃលានរៀល)។
ចំពោះសេវាការផ្ទេរសិទ្ធិ នៃអាជ្ញាបណ្ណអណ្តូងរ៉ែបើក និងការដ្ឋានវាយថ្មសម្រាប់ខ្សាច់សំណង់ ក្រួស ឡាតេរីត ដីឥដ្ឋមានតម្លៃ ១០ ០០០ ០០០ (ដប់លានរៀល) និង សម្រាប់ថ្មសំណង់ ថ្មអារ ម្នាងសិលា និងថ្មផ្សេងទៀតដែលមានលក្ខណៈប្រហាក់ប្រហែលមានតម្លៃ ៥០ ០០០ ០០០៛ (ហាសិបលានរៀល)។
ប្រភព: ប្រកាសរួមលេខ ១៤៥១ សហវ ប្រកស្តីពីការផ្តល់សេវាសាធារណៈ និងការពិន័យអន្តរការណ៍ជាប្រាក់ដោយក្រសួងរ៉ែ និងថាមពល| ការចុះបញ្ជីអាជ្ញាបណ្ណ | តម្លៃ |
|---|---|
| អាជ្ញាបណ្ណអណ្ដូងរ៉ែបើក និងការដ្ឋានវាយថ្ម សម្រាប់ខ្សាច់សំណង់ គ្រួស៖ | ៨០០ ០០០៛ (ប្រាំបីសែនរៀល) |
| អាជ្ញាបណ្ណអណ្ដូងរ៉ែបើក និងការដ្ឋានវាយថ្ម សម្រាប់ថ្មសំណង់ ថ្មអារ ម្នាងសិលា និងថ្មផ្សេងៗទៀត ដែលមានលក្ខណៈប្រហាក់ប្រហែល៖ | ១ ៥០០ ០០០៛ (មួយលាន ប្រាំសែនរៀល) |
| សេវាពិនិត្យ រៀបចំ និងដំណើរការឯកសារ សម្រាប់ការផ្តល់អាជ្ញាបណ្ណធនធានរ៉ែផ្សេងទៀត៖ | ៥០០ ០០០៛ (ប្រាំសែនរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលក្រោម ៥០%) | |
| អាជ្ញាបណ្ណអណ្តូងរ៉ែបើក និងការដ្ឋានវាយថ្ម សម្រាប់ខ្សាច់សំណង់ គ្រួស ឡាតេរីត ដីឥដ្ឋ | ២ ៥០០ ០០០៛ (ពីរលាន ប្រាំសែនរៀល) |
| អាជ្ញាបណ្ណអណ្ដូងរ៉ែបើក និងការដ្ឋានវាយថ្ម សម្រាប់ថ្មសំណង់ ថ្មអារ ម្នាងសិលា និងថ្មផ្សេងៗទៀត ដែលមានលក្ខណៈប្រហាក់ប្រហែល | ១៥ ០០០ ០០០៛ (ដប់ប្រាំលានរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការ ផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលចាប់ពី ៥០% ឡើងទៅ) | |
| អាជ្ញាបណ្ណអណ្ដូងរ៉ែបើក និងការដ្ឋានវាយថ្ម សម្រាប់ខ្សាច់សំណង់ គ្រួស ឡាតេរីត ដីឥដ្ឋ | ៥ ០០០ ០០០៛ (ប្រាំលានរៀល) |
| អាជ្ញាបណ្ណអណ្ដូងរ៉ែបើក និងការដ្ឋានវាយថ្ម សម្រាប់ថ្មសំណង់ ថ្មអារ ម្នាងសិលា និងថ្មផ្សេងៗទៀត ដែលមានលក្ខណៈប្រហាក់ប្រហែល | ២៥ ០០០ ០០០៛ (ម្ភៃប្រាំលានរៀល) |
អាជ្ញាបណ្ណអាជីវកម្មរ៉ែត្បូងថ្មមានតម្លៃ
អាជ្ញាបណ្ណអាជីវកម្មរ៉ែត្បូងថ្មមានតម្លៃ អាចផ្ដល់ឱ្យដល់រូបវន្តបុគ្គល ឬនីតិបុគ្គលដែលមានលក្ខណសម្បត្តិ និងសមត្ថភាពគ្រប់គ្រាន់ក្នុងបំណងស្វែងរុករក និងធ្វើអាជីវកម្មធនធានរ៉ែត្បូងថ្មមានតម្លៃ ពាក់កណ្តាលមានតម្លៃ និងថ្មសំអាង។12 អាជ្ញាបណ្ណអាជីវកម្មរ៉ែត្បូងថ្មមានតម្លៃ មានសុពលភាពរយះពេល ០១ ឆ្នាំ។13
អាជ្ញាបណ្ណអាជីវកម្មរ៉ែត្បូងថ្មមានតម្លៃ អនុវត្តតាមស្តង់ដារសេវាកម្មដូចគ្នានឹងអាជ្ញាបណ្ណអណ្តូងរ៉ែបើក និងការដ្ឋានវាយថ្មដែរ។ តម្លៃសេវាអាជ្ញាបណ្ណអាជីវកម្មរ៉ែត្បូងថ្មមានតម្លៃ ទ្រង់ទ្រាយតូចគឺ ១ ០០០ ០០០៛ (មួយលានរៀល) និងទ្រង់ទ្រាយធំគឺ ១៥ ០០០ ០០០៛ (ដប់ប្រាំលានរៀល) ។ សម្រាប់សេវាលើការផ្ទេរសិទ្ធិអាជ្ញាបណ្ណអាជីវកម្មរ៉ែត្បូងថ្មមានតម្លៃ ទ្រង់ទ្រាយធំ ៥០ ០០០ ០០០៛ (ហាសិបលានរៀល)។ សេវាពិនិត្យ រៀបចំ និងដំណើរការឯកសារ សម្រាប់ការផ្តល់អាជ្ញាបណ្ណធនធានរ៉ែផ្សេងទៀតមានតម្លៃ ៥០០ ០០០៛ (ប្រាំសែនរៀល)។
ប្រភព: ប្រកាសរួមលេខ ១៤៥១ សហវ ប្រកស្តីពីការផ្តល់សេវាសាធារណៈ និងការពិន័យអន្តរការណ៍ជាប្រាក់ដោយក្រសួងរ៉ែ និងថាមពល| ការចុះបញ្ជីអាជ្ញាបណ្ណ | តម្លៃ |
|---|---|
| អាជ្ញាបណ្ណអាជីវកម្មរ៉ែត្បូងថ្មមានតម្លៃ ទ្រង់ទ្រាយតូច | ១០០ ០០០៛ (មួយសែនរៀល) |
| អាជ្ញាបណ្ណអាជីវកម្មរ៉ែត្បូងថ្មមានតម្លៃ ទ្រង់ទ្រាយធំ | ៣ ០០០ ០០០៛ (បីលានរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការ ផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលក្រោម ៥០%) | |
| អាជ្ញាបណ្ណអាជីវកម្មរ៉ែត្បូងថ្មមានតម្លៃ | ២០ ០០០ ០០០៛ (ម្ភៃលានរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការ ផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលចាប់ពី៥០% ឡើងទៅ) | |
| អាជ្ញាបណ្ណអាជីវកម្មរ៉ែត្បូងថ្មមានតម្លៃ | ២៥ ០០០ ០០០៛ (ម្ភៃប្រាំលានរៀល) |
អាជ្ញាបណ្ណកែច្នៃធនធានរ៉ែ
អាជ្ញាបណ្ណកែច្នៃធនធានរ៉ែ អាចផ្ដល់ឱ្យចំពោះរូបវន្តបុគ្គល ឬនីតិបុគ្គលដែលមានលក្ខណសម្បត្តិគ្រប់គ្រាន់ក្នុងគោលបំណងកែច្នៃត្បូងថ្មមានតម្លៃ ពាក់កណ្ដាលមានតម្លៃ ឬថ្មសំអាង។14 អាជ្ញាបណ្ណកែច្នៃធនធានរ៉ែ មានសុពលភាពរយះពេល ០៣ ឆ្នាំ។15
ស្តង់ដារសេវាកម្មនៃអាជ្ញាបណ្ណកែច្នៃធនធានរ៉ែ មានដំណើរការដូចគ្នានឹងអាជ្ញាបណ្ណអណ្តូងរ៉ែបើកនិងការដ្ឋានវាយថ្ម និងអាជ្ញាបណ្ណអាជីវកម្មរ៉ែត្បូងថ្មមានតម្លៃដែរ។ ចំណែកឯតម្លៃសេវាអាជ្ញាបណ្ណគឺប្រែប្រួលទៅតាមចំនួនមនុស្សក្នុងប្រតិបត្តិការកែច្នៃធនធានរ៉ែនេះ ពោលគឺមានតម្លៃ ៣ ៦០០ ០០០៛ (បីលាន ប្រាំមួយសែនរៀល) សម្រាប់កម្លាំងពលកម្មតិចជាង ៧ នាក់ តម្លៃ ៧ ២០០ ០០០ (ប្រាំពីរលាន ពីរសែនរៀល) សម្រាប់កម្លាំងពលកម្មពី ៧-១៤ និងតម្លៃ ១៥ ០០០ ០០០ (ដប់ប្រាំលានរៀល) សម្រាប់កម្លាំងកម្មលើសពី ១៤ នាក់។ ចំពោះសេវាលើការផ្ទេរសិទ្ធិអាជ្ញាបណ្ណកែច្នៃធនធានរ៉ែ ត្រូវចំណាយប្រាក់ ២ ៥០០ ០០០ (ពីរលាន ប្រាំសែនរៀល) សម្រាប់កម្លាំងពលកម្មតិចជាង ៧ នាក់ ចំណាយ៥ ០០០ ០០០ (ប្រាំលានរៀល) សម្រាប់កម្លាំងពលកម្មពី ៧-១៤ នាក់ និងចំណាយ ៨ ០០០ ០០០ (ប្រាំបីលានរៀល) សម្រាប់កម្លាំងកម្មលើសពី ១៤ នាក់។
ប្រភព: ប្រកាសរួមលេខ ១៤៥១ សហវ ប្រកស្តីពីការផ្តល់សេវាសាធារណៈ និងការពិន័យអន្តរការណ៍ជាប្រាក់ដោយក្រសួងរ៉ែ និងថាមពល| ការចុះបញ្ជីអាជ្ញាបណ្ណ | តម្លៃ |
|---|---|
| ការចុះបញ្ជីអាជ្ញាបណ្ណកែច្នៃធនធានរ៉ែ | ៨ ០០០ ០០០៛ (ប្រាំបីលានរៀល) |
| សេវាពិនិត្យ រៀបចំ និងដំណើរការឯកសារ សម្រាប់ការផ្តល់អាជ្ញាបណ្ណធនធានរ៉ែផ្សេងទៀត | ៥០០ ០០០៛ (ប្រាំសែនរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការ ផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលក្រោម ៥០%) | |
| អាជ្ញាបណ្ណកែច្នៃធនធានរ៉ែ ដែលមានកម្លាំងពលកម្មតិចជាង ៧ នាក់ | ១ ០០០ ០០០៛ (មួយលានរៀល) |
| អាជ្ញាបណ្ណកែច្នៃធនធានរ៉ែ ដែលមានកម្លាំងពលកម្មពី ៧-១៤ នាក់ | ១ ០០០ ០០០៛ (មួយលានរៀល) |
| អាជ្ញាបណ្ណកែច្នៃធនធានរ៉ែ ដែលមានកម្លាំងកម្មលើសពី ១៤ នាក់ | ១ ០០០ ០០០៛ (មួយលានរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួល ចាប់ពី៥០% ឡើងទៅ) | |
| អាជ្ញាបណ្ណកែច្នៃធនធានរ៉ែ ដែលមានកម្លាំងពលកម្មតិចជាង ៧ នាក់ | ៥ ០០០ ០០០៛ (ប្រាំលានរៀល) |
| អាជ្ញាបណ្ណកែច្នៃធនធានរ៉ែ ដែលមានកម្លាំងពលកម្មពី ៧-១៤ នាក់ | ៥ ០០០ ០០០៛ (ប្រាំលានរៀល) |
| អាជ្ញាបណ្ណកែច្នៃធនធានរ៉ែ ដែលមានកម្លាំងកម្មលើសពី ១៤ នាក់ | ៥ ០០០ ០០០៛ (ប្រាំលានរៀល) |
អាជ្ញាបណ្ណស្វែងរុករក
អាជ្ញាបណ្ណស្វែងរុករក អាចផ្តល់ឱ្យចំពោះរូបវន្តបុគ្គល ឬនីតិបុគ្គលដែលមានលក្ខណសម្បត្តិ និងសមត្ថភាពគ្រប់គ្រាន់ដើម្បីធ្វើការស្វែងរុករក និងសិក្សាអំពីសក្តានុពលធនធានរ៉ែ។16 អាជ្ញាបណ្ណស្វែងរុករក មានសុពលភាពរយះពេល ០៣ ឆ្នាំ អាចពន្យារបាន២ដង ម្តងបាន ០២ឆ្នាំ។17
អាជ្ញាបណ្ណស្វែងរុករក អនុវត្តតាមស្តង់ដារសេវាកម្មដូចគ្នានឹងអាជ្ញាបណ្ណអណ្តូងរ៉ែបើក និងការដ្ឋានវាយថ្ម អាជ្ញាបណ្ណអាជីវកម្មរ៉ែត្បូងថ្មមានតម្លៃ និងអាជ្ញាបណ្ណកែច្នៃធនធានរ៉ែដែរ។ តម្លៃសេវានៃអាជ្ញាបណ្ណស្វែងរុករកគឺ ២០ ០០០ ០០០ (ម្ភៃលានរៀល)។ រីឯការពន្យារបន្តនៃអាជ្ញាបណ្ណស្វែងរុករកមានតម្លៃ ២០ ០០០ ០០០៛ (ម្ភៃលានរៀល) និង ១០០ ០០០ ០០០៛ (មួយរយលានរៀល) សម្រាប់ការផ្ទេរសិទ្ធិនៃអាជ្ញាបណ្ណនេះ។ សេវាពិនិត្យ រៀបចំ និងដំណើរការឯកសារ សម្រាប់ការផ្តល់អាជ្ញាបណ្ណ ធនធានរ៉ែផ្សេងទៀតមានតម្លៃ ៥០០ ០០០៛ (ប្រាំសែនរៀល)។
ប្រភព: ប្រកាសរួមលេខ ១៤៥១ សហវ ប្រកស្តីពីការផ្តល់សេវាសាធារណៈ និងការពិន័យអន្តរការណ៍ជាប្រាក់ដោយក្រសួងរ៉ែ និងថាមពល| ការចុះបញ្ជីអាជ្ញាបណ្ណ | តម្លៃ |
|---|---|
| ការចុះបញ្ជីអាជ្ញាបណ្ណស្វែងរុករក | ៥ ០០០ ០០០៛ (ប្រាំលានរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការ ផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលក្រោម ៥០%) | |
| អាជ្ញាបណ្ណស្វែងរុករក | ៤០ ០០០ ០០០៛ (សែសិបលានរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការ ផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលចាប់ពី៥០% ឡើងទៅ) | |
| អាជ្ញាបណ្ណស្វែងរុករក | ៥០ ០០០ ០០០៛ (ហាសិបលានរៀល) |
អាជ្ញាបណ្ណឧស្សាហកម្មអាជីវកម្មធនធានរ៉ែ
អាជ្ញាបណ្ណឧស្សាហកម្មអាជីវកម្មធនធានរ៉ែ ត្រូវបានផ្ដល់ឱ្យចំពោះតែសម្បទានិកដែលមានអាជ្ញាបណ្ណស្វែងរុករកប៉ុណ្ណោះ ក្នុងគោលបំណងស្វែងរុករក និងជីកយករ៉ែណាដែលមានជម្រករ៉ែមានប្រសិទ្ធភាពសេដ្ឋកិច្ច ហើយឋិតនៅតែក្នុងរង្វង់ព្រំដែននៃអាជ្ញាបណ្ណស្វែងរុករក។18 អាជ្ញាបណ្ណឧស្សាហកម្មអាជីវកម្មធនធានរ៉ែ មានសុពលភាពមិនលើស ២១ ឆ្នាំ អាចពន្យារបាន២ដង មិនលើសពី ១០ឆ្នាំ។19
អាជ្ញាបណ្ណឧស្សាហកម្មអាជីវកម្មធនធានរ៉ែ អនុវត្តតាមស្តង់ដារសេវាកម្មដូចគ្នានឹងអាជ្ញាបណ្ណអណ្តូងរ៉ែបើកនិងការដ្ឋានវាយថ្ម អាជ្ញាបណ្ណអាជីវកម្មរ៉ែត្បូងថ្មមានតម្លៃ អាជ្ញាបណ្ណកែច្នៃធនធានរ៉ែ និងអាជ្ញាបណ្ណស្វែងរុករកដែរ។ តម្លៃសេវានៃអាជ្ញាបណ្ណឧស្សាហកម្មអាជីវកម្មធនធានរ៉ែ ទ្រង់ទ្រាយតូចគឺ ១ ០០០ ០០០៛ (មួយលានរៀល) និងទ្រង់ទ្រាយធំ ៥០ ០០០ ០០០៛ (ហាសិបលានរៀល)។ ចំណែកឯការពន្យារបន្តនៃអាជ្ញាបណ្ណឧស្សាហកម្មអាជីវកម្មធនធានរ៉ែ ទ្រង់ទ្រាយធំមានតម្លៃ ៥០ ០០០ ០០០៛ (ហាសិបលានរៀល) ខណៈដែរការផ្ទេរសិទ្ធិ នៃអាជ្ញាបណ្ណឧស្សាហកម្មអាជីវកម្មធនធានរ៉ែ ទ្រង់ទ្រាយធំមានតម្លៃ ២០០ ០០០ ០០០ (ពីររយលានរៀល)។
ប្រភព: ប្រកាសរួមលេខ ១៤៥១ សហវ ប្រកស្តីពីការផ្តល់សេវាសាធារណៈ និងការពិន័យអន្តរការណ៍ជាប្រាក់ដោយក្រសួងរ៉ែ និងថាមពល| ការចុះបញ្ជីអាជ្ញាបណ្ណ | តម្លៃ |
|---|---|
| អាជ្ញាបណ្ណឧស្សាហកម្មអាជីវកម្មធនធានរ៉ែ ទ្រង់ទ្រាយធំ | ១៥ ០០០ ០០០៛ (ដប់ប្រាំលានរៀល) |
| អាជ្ញាបណ្ណឧស្សាហកម្មអាជីវកម្មធនធានរ៉ែ ទ្រង់ទ្រាយតូច | ១០០ ០០០៛ (មួយសែនរៀល) |
| សេវាពិនិត្យ រៀបចំ និងដំណើរការឯកសារ សម្រាប់ការផ្តល់អាជ្ញាបណ្ណ ធនធានរ៉ែផ្សេងទៀត | ៥០០ ០០០៛ (ប្រាំសែនរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការ ផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលក្រោម ៥០%) | |
| អាជ្ញាបណ្ណឧស្សាហកម្មអាជីវកម្មធនធានរ៉ែ | ១០០ ០០០ ០០០៛ (មួយរយលានរៀល) |
| ការចេញលិខិតទទួលស្គាល់ ការផ្លាស់ប្តូរសមាសភាពភាគហ៊ុន ឬ/និងការ ផ្លាស់ប្ដូរអ្នកគ្រប់គ្រងក្រុមហ៊ុន (ដែលមានការប្រែប្រួលចាប់ពី៥០% ឡើងទៅ) | |
| អាជ្ញាបណ្ណឧស្សាហកម្មអាជីវកម្មធនធានរ៉ែ | ១០០ ០០០ ០០០៛ (មួយរយលានរៀល) |
ទាក់ទងនឹងការផ្តល់អាជ្ញាបណ្ណ និងការបង់ប្រាក់ក្នុងវិស័យឧស្សាហកម្មនិស្សារណកម្ម
ឯកសារយោង
- 1. រាជរដ្ឋាភិបាលកម្ពុជា, “ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ,” ថ្ងៃទី ១៣ ខែកក្កដា ឆ្នាំ២០០១, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 2. Chrea Vichett, “ស្ថានភាពបច្ចុប្បន្ននៃឧស្សាហកម្មនិស្សារណកម្មនៅកម្ពុជា,” អគ្គនាយកដ្ឋានធនធានរ៉ែកម្ពុជា, ថ្ងៃទី ០៦ ខែមីនា ឆ្នាំ២០១៣, បានចូលអាននៅថ្ងៃទី ១២ ខែកញ្ញា ឆ្នាំ២០២៣។
- 3. រាជរដ្ឋាភិបាលកម្ពុជា, “ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ,” ថ្ងៃទី ១៣ ខែកក្កដា ឆ្នាំ២០០១, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 4. សាកលវិទ្យាល័យ Wisconsin-Madison, “ការបង្កើនតម្លាភាពក្នុងឧស្សាហកម្មនិស្សារណកម្មនៅកម្ពុជា,” ២០២៣, បានចូលអាននៅថ្ងៃទី ១២ ខែកញ្ញា ឆ្នាំ២០២៣។
- 5. រាជរដ្ឋាភិបាលកម្ពុជា, “ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ,” ថ្ងៃទី ១៣ ខែកក្កដា ឆ្នាំ២០០១, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 6. ដូចឯកសារយោងខាងដើម។
- 7. ដូចឯកសារយោងខាងដើម។
- 8. ក្រសួងរ៉ែ និង ថាមពល “កម្រងព័ត៌មានសេវាសាធារណៈរបស់ក្រសួងរ៉ែ និងថាមពល បានធ្វើបច្ចុប្បន្នភាព ក្នុងឆ្នាំ២០១៦,” ឆ្នាំ២០១៦, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 9. ក្រសួងរ៉ែ និង ថាមពល “ប្រកាសរួមលេខ ១៤៥១ សហវ ប្រកស្តីពីការផ្តល់សេវាសាធារណៈ និងការពិន័យអន្តរការណ៍ជាប្រាក់ដោយក្រសួងរ៉ែ និងថាមពល,” ឆ្នាំ២០១៦, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 10. រាជរដ្ឋាភិបាលកម្ពុជា, “ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ,” ថ្ងៃទី ១៣ ខែកក្កដា ឆ្នាំ២០០១, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 11. ក្រសួងរ៉ែ និង ថាមពល “កម្រងព័ត៌មានសេវាសាធារណៈរបស់ក្រសួងរ៉ែ និងថាមពល បានធ្វើបច្ចុប្បន្នភាព ក្នុងឆ្នាំ២០១៦,” ឆ្នាំ២០១៦, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 12. រាជរដ្ឋាភិបាលកម្ពុជា, “ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ,” ថ្ងៃទី ១៣ ខែកក្កដា ឆ្នាំ២០០១, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 13. ក្រសួងរ៉ែ និង ថាមពល “កម្រងព័ត៌មានសេវាសាធារណៈរបស់ក្រសួងរ៉ែ និងថាមពល បានធ្វើបច្ចុប្បន្នភាព ក្នុងឆ្នាំ២០១៦,” ឆ្នាំ២០១៦, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 14. រាជរដ្ឋាភិបាលកម្ពុជា, “ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ,” ថ្ងៃទី ១៣ ខែកក្កដា ឆ្នាំ២០០១, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 15. ក្រសួងរ៉ែ និង ថាមពល “កម្រងព័ត៌មានសេវាសាធារណៈរបស់ក្រសួងរ៉ែ និងថាមពល បានធ្វើបច្ចុប្បន្នភាព ក្នុងឆ្នាំ២០១៦,” ឆ្នាំ២០១៦, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 16. រាជរដ្ឋាភិបាលកម្ពុជា, “ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ,” ថ្ងៃទី ១៣ ខែកក្កដា ឆ្នាំ២០០១, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 17. ក្រសួងរ៉ែ និង ថាមពល “កម្រងព័ត៌មានសេវាសាធារណៈរបស់ក្រសួងរ៉ែ និងថាមពល បានធ្វើបច្ចុប្បន្នភាព ក្នុងឆ្នាំ២០១៦,” ឆ្នាំ២០១៦, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 18. រាជរដ្ឋាភិបាលកម្ពុជា, “ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ,” ថ្ងៃទី ១៣ ខែកក្កដា ឆ្នាំ២០០១, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
- 19. រាជរដ្ឋាភិបាលកម្ពុជា, “អនុក្រឹត្យលេខ ៧២ ស្តីពីការគ្រប់គ្រងអាជ្ញាបណ្ណស្វែងរុករកនិងអាជ្ញាបណ្ណឧស្សាហកម្មអាជីវកម្មធនធានរ៉ែរាជរដ្ឋាភិបាល,” ថ្ងៃទី ០៥ ខែឧសភា ឆ្នាំ២០១៦, បានចូលអាននៅថ្ងៃទី ០៨ ខែកញ្ញា ឆ្នាំ២០២៣។
