ឯកអគ្គរដ្ឋទូតស៊ុយអែតប្រចាំកម្ពុជា ឯកឧត្តម Björn Häggmark បានចាប់ដៃជាមួយលោកនាយករដ្ឋមន្ត្រី ហ៊ុន សែន នៅថ្ងៃទី០៤ ខែធ្នូ ឆ្នាំ២០១៩។ រូបភាព ពីទំព័រហ្វេសប៊ុករបស់សម្ដេចតេជោ ហ៊ុន សែន។
ប្រទេសកម្ពុជា និងប្រទេសស៊ុយអែតបានបង្កើតចំណងការទូតនៅឆ្នាំ១៩៦១។ ប្រទេសស៊ុយអែតបានចាប់ផ្តើមផ្តល់ការជំនួយកិច្ចសហប្រតិបត្តិការអភិវឌ្ឍន៍លើកដំបូងដល់ប្រទេសកម្ពុជាក្នុងឆ្នាំ១៩៧៩ បន្ទាប់ពីរបបខ្មែរក្រហម1 ដែលជំនួយនោះគឺទាក់ទងនឹងជំនួយមនុស្សធម៌ និងជំនួយសង្គ្រោះបន្ទាន់ ដោយផ្តោតលើការសង្គ្រោះជីវិត សម្រាលទុក្ខលំបាក រក្សាសេចក្តីថ្លៃថ្នូររបស់អ្នករងផលប៉ះពាល់ដោយជម្លោះប្រដាប់អាវុធ គ្រោះមហន្តរាយធម្មជាតិ ឬលក្ខខណ្ឌស្រដៀងគ្នាៗ។2
រដ្ឋាភិបាលស៊ុយអែតបានប្រកាសថា ស្ថានទូតស៊ុយអែតនៅទីក្រុងភ្នំពេញនឹងត្រូវបិទនៅថ្ងៃទី៣០ ខែវិច្ឆិកា ឆ្នាំ២០២១ ប៉ុន្តែស្ថានទូតបានអះអាងថា ទំនាក់ទំនងការទូតរវាងប្រទេសទាំងពីរនឹងបន្ត។3 កិច្ចសហប្រតិបត្តិការអភិវឌ្ឍន៍ជាមួយប្រទេសកម្ពុជានឹងត្រូវដឹកនាំដោយទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត ដែលជាទីភ្នាក់ងារបស់ររដ្ឋាភិបាលនៃប្រទេសស៊ុយអែតសម្រាប់កិច្ចសហប្រតិបត្តិការអភិវឌ្ឍន៍អន្តរជាតិ និងការកាត់បន្ថយភាពក្រីក្រ និងភាពគៀបសង្កត់ ហើយកិច្ចសហប្រតិបត្តិការអភិវឌ្ឍនេះនឹងធ្វើឡើងក្នុងទម្រង់ជាការិយាល័យនៅរាជធានីភ្នំពេញ។4
កិច្ចសហប្រតិបត្តិការអភិវឌ្ឍន៍ និងជំនួយនៅប្រទេសកម្ពុជា
កិច្ចសហប្រតិបត្តិការអភិវឌ្ឍន៍ជាមួយប្រទេសកម្ពុជាត្រូវបានបង្កើតឡើងក្នុងខែមិថុនា ឆ្នាំ២០២០ ដែលគ្រប់គ្រងដោយ យុទ្ធសាស្ត្រសម្រាប់កិច្ចសហប្រតិបត្តិការអភិវឌ្ឍន៍របស់ប្រទេសស៊ុយអែតជាមួយតំបន់អាស៊ី និងប៉ាស៊ីហ្វិក ហើយសម្រេចដោយរដ្ឋាភិបាលស៊ុយអែត និងអនុវត្តដោយទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត។5
នៅឆ្នាំ២០២១ ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត បានផ្តល់ជំនួយចំនួន ១៩៦,៣ លានក្រូណាស៊ុយអែត ដែលជាជំនួយអភិវឌ្ឍន៍ដល់ប្រទេសកម្ពុជា។ ជំនួយនេះបានចូលរួមចំណែកក្នុងការពង្រឹងសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋសម្រាប់សង្គមឱ្យកាន់តែបើកចំហ និងមានចីរភាពនៅប្រទេសកម្ពុជា។ ជំនួយនេះក៏បានជួយដល់កម្មវិធីជាច្រើនទៀតដែលសហការជាមួយអង្គការសង្គមស៊ីវិល និងតួអង្គមិនមែនរដ្ឋ។6
- ការពង្រឹងសង្គមស៊ីវិល
- ការលើកកម្ពស់កម្រិតនៃការអប់រំ
- ការផ្តល់ឱកាសសម្រាប់អ្នកស្រាវជ្រាវវ័យក្មេង
- ការកាត់បន្ថយវិសមភាពយេនឌ័រក្នុងកម្មវិធីច្បាប់
- ការដោះស្រាយវិវាទការងារ
- ការណែនាំយុវជនកម្ពុជាឱ្យឆ្ពោះទៅរកការងារក្នុងក្តីស្រមៃរបស់ពួកគេ។
ជំនួយពីប្រទេសស៊ុយអែតតែងតែត្រូវធ្វើឡើងតាមរយៈអង្គការអន្តរជាតិ ដូចជាអង្គការសហប្រជាជាតិ និងសហភាពអឺរ៉ុប ដែលមានគោលបំណងជួយប្រជាជនក្រីក្រក្នុងការលើកកម្ពស់កម្រិតជីវភាពរបស់ពួកគេ។7
ការឆ្លើយតបចំពោះកូវីដ-១៩ នៅកម្ពុជា
ការរាតត្បាតនៃជំងឺកូវីដ-១៩ បានជះឥទ្ធិពលអវិជ្ជមានដល់សេដ្ឋកិច្ចរបស់ប្រទេសកម្ពុជា ដែលបណ្តាលឱ្យមានការកើនឡើងនៃភាពក្រីក្រ និងការគ្មានការងារធ្វើ។8 ការឆ្លើយតបរបស់ប្រទេសស៊ុយអែតចំពោះជំងឺរាតត្បាតអាចប្រែប្រួលដោយផ្អែកលើតម្រូវការ និងគោលការណ៍ប្រជាធិបតេយ្យ និងសិទ្ធិមនុស្ស សមភាពយេនឌ័រ សមធម៌ តម្លាភាព និងជំនួយផ្អែកលើភស្តុតាង។9
ដោយសហការជាមួយក្រសួងអប់រំ យុវជន និងកីឡា រួមជាមួយនឹងភាគីពាក់ព័ន្ធផ្សេងទៀត ប្រទេសស៊ុយអែតបានផ្តល់ជំនួយដល់ការពង្រឹងគុណភាពនៃការអប់រំនៅប្រទេសកម្ពុជាសម្រាប់ការស្តារឡើងវិញនៃជំងឺកូវីដ-១៩។10 នៅដើមឆ្នាំ២០២១ ក្រសួងអប់រំ យុវជន និងកីឡា បានផ្តល់សៀវភៅសិក្សាចំនួន ៣៥,០៥៥ ក្បាលដល់ខេត្តភាគពាយ័ព្យ ដោយអនុញ្ញាតឱ្យសិស្សចំនួន ៣២,៤៨៦ នាក់បន្តការសិក្សារបស់ពួកគេ ដែលជំនួយនេះគឺជាផ្នែកមួយនៃកិច្ចខិតខំប្រឹងប្រែងទប់ស្កាត់ការចម្លងជំងឺកូវីដ-១៩ របស់រដ្ឋាភិបាល និងមានការគាំទ្រពីអង្គការយូនីសេហ្វ និងប្រទេសស៊ុយអែត។ ឯកអគ្គរដ្ឋទូតស៊ុយអែតប្រចាំកម្ពុជា ឯកឧត្តម Björn Häggmark មានប្រសាសន៍ថា “ការអប់រំគឺជាសិទ្ធិមនុស្សជាមូលដ្ឋាន ប៉ុន្តែជំងឺកូវីដ-១៩ នៅតែបន្តរំខានដល់ការសិក្សារបស់កុមាររាប់ពាន់នាក់នៅក្នុងប្រទេសកម្ពុជា។ ប្រទេសស៊ុយអែតរីករាយក្នុងការជួយដល់ការឆ្លើយតបបន្ទាន់ដ៏សំខាន់នេះ ដោយធានាថាក្មេងស្រី និងក្មេងប្រុសនៅជួរមុខនៃជំងឺកូវីដ-១៩ មានធនធានសិក្សាគ្រប់គ្រាន់ដើម្បីបន្តការសិក្សារបស់ពួកគេ»។11
ក្រោម គម្រោងជំរុញបរិយាកាសអំណោយផលសម្រាប់ការអភិវឌ្ឍន៍ដោយចីរភាព ប្រទេសស៊ុយអែតបានផ្តល់ថវិកាចំនួន ៤,៣ លានក្រូណាស៊ុយអែត (ជិតកន្លះលានដុល្លារអាមេរិក) ដើម្បីគាំទ្រផ្នែកហិរញ្ញវត្ថុដល់សហគមន៍ជនបទក្នុងប្រទេសកម្ពុជា។ គំនិតផ្តួចផ្តើមនេះមានគោលបំណងចូលរួមជាមួយគ្រួសារជនបទជាង ១,៦០០ គ្រួសារក្នុងខេត្តសៀមរាប និងខេត្តពោធិ៍សាត់ ដើម្បីបណ្តុះកូនឈើ ដាំដើមឈើក្នុងស្រុក និងចូលរួមក្នុងសកម្មភាពអភិរក្សផ្សេងៗទៀត។ គម្រោងនេះនឹងផ្តល់ឱកាសការងារសម្រាប់សហគមន៍ និងគាំទ្រសកម្មភាពរៀបចំផែនការដើមឈើក្នុងអំឡុងពេលមានជំងឺរាតត្បាត។12
ទាក់ទងនឹងជំនួយពីប្រទេសស៊ុយអែត
ឯកសារយោង
- 1. ប៊ុណ្ណា វណ្ណ, “ហេតុអ្វីបានជាស៊ុយអែតជ្រើសរើសបិទស្ថានទូតរបស់ខ្លួននៅកម្ពុជា,” The Diplomat, ថ្ងៃទី០៩ ខែធ្នូ ឆ្នាំ២០២០, បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 2. ស្ថានទូតស៊ុយអែត, “កិច្ចសហប្រតិបត្តិការអភិវឌ្ឍន៍,” បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 3. បុគ្គលិក ខ្មែរថាមស៍, “ទំនាក់ទំនងល្អរបស់ប្រទេសស៊ុយអែតជាមួយកម្ពុជាបន្តនៅក្នុងទម្រង់ថ្មីជាការិយាល័យ,” កាសែតខ្មែរថាមស៍, ថ្ងៃទី១៧ ខែកញ្ញា ឆ្នាំ២០២១, បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 4. ប៊ុណ្ណា វណ្ណ, “ហេតុអ្វីបានជាស៊ុយអែតជ្រើសរើសបិទស្ថានទូតរបស់ខ្លួននៅកម្ពុជា,” The Diplomat, ថ្ងៃទី០៩ ខែធ្នូ ឆ្នាំ២០២០, បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 5. ស្ថានទូតស៊ុយអែត, “កិច្ចសហប្រតិបត្តិការអភិវឌ្ឍន៍,” បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 6. ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត, “ការងាររបស់ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែតនៅកម្ពុជា,” ថ្ងៃទី០៣ ខែធ្នូ ឆ្នាំ២០២១, បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 7. ស្ថានទូតស៊ុយអែត, "កិច្ចសហប្រតិបត្តិការអភិវឌ្ឍន៍," បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 8. ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត, "ការងាររបស់ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែតនៅកម្ពុជា," ថ្ងៃទី០៣ ខែធ្នូ ឆ្នាំ២០២១, បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 9. ស្ថានទូតស៊ុយអែត, "ការអភិវឌ្ឍន៍សេដ្ឋកិច្ច និងសង្គម," ថ្ងៃទី២៤ ខែមិថុនា ឆ្នាំ២០២០, បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 10. Gregers Møller, "ស៊ុយអែតគាំទ្រការអប់រំប្រកបដោយគុណភាពក្នុងអំឡុងជំងឺកូវីដ-១៩ នៅកម្ពុជា," ថ្ងៃទី០៨ ខែវិច្ឆិកា ឆ្នាំ២០២១, បានចូលអាននៅខែធ្នូ ឆ្នាំ២០២២។ ឯកសារជាភាសាអង់គ្លេស ពុំមានការបកប្រែជាភាសាខ្មែរ។
- 11. អង្គការយូនីសេហ្វ, "សេចក្ដីប្រកាសព័ត៌មាន ប្រទេសកម្ពុជា ស៊ុយអែត និងយូនីសេហ្វ រួមគ្នាការពារការអប់រំសម្រាប់កុមារ ដែលសាលារៀនខ្លួនត្រូវបានប្រើប្រាស់ជាមជ្ឈមណ្ឌលចត្តាឡីស័ក," ថ្ងៃទី២៤ ខែកុម្ភៈ ឆ្នាំ២០២១, បានចូលអាននៅខែធ្នូ ឆ្នាំ២០២២។
- 12. បុគ្គលិក ខ្មែរថាមស៍, "ប្រទេសស៊ុយអែតផ្តល់មូលនិធិសង្គ្រោះកូវីដ-១៩ ដល់ប្រទេសកម្ពុជា," កាសែតខ្មែរថាមស៍, ថ្ងៃទី២៦ ខែតុលា ឆ្នាំ២០២០, បានចូលអាននៅខែធ្នូ ឆ្នាំ២០២២។
