ឯកឧត្តមបណ្ឌិត ហង់ជួន ណារ៉ុន និងលោកស្រី ជូលី ឈុង នៅក្នុងពិធីសម្ពោធសាលារៀងនរ៉ាយអាខាដេមី នៅប្រទេសកម្ពុជា។ រូបភាព ថតដោយស្ថានទូតសហរដ្ឋអាមេរិចប្រចាំទីក្រុងភ្នំពេញ កាលពីថ្ងៃទី ១៧ ខែកញ្ញា ឆ្នាំ២០១៤។ ក្រោមអាជ្ញាប័ណ្ណ CC BY-NC-ND 2.0
ក្រសួងអប់រំ យុវជន និងកីឡា ត្រូវបានបង្កើតឡើងនៅក្នុងឆ្នាំ១៩៩៦ ដោយច្បាប់។1 ការរៀបចំ និងការប្រព្រឹត្តទៅរបស់ក្រសួងអប់រំ យុវជន និងកីឡា ត្រូវបានកំណត់ដោយអនុក្រឹត្យរបស់រាជរដ្ឋាភិបាលនៃព្រះរាជាណាចក្រកម្ពុជា។2 រដ្ឋមន្ត្រីទទួលបន្ទុកក្រសួងអប់រំ យុវជន និងកីឡា ត្រូវបានជ្រើសរើសដោយនាយករដ្ឋមន្ត្រី និង តែងតាំងដោយព្រះមហាក្សត្រ ។ បន្ទាប់ពីទទួលបានការបោះឆ្នោតទុកចិត្តពីរដ្ឋសភា រដ្ឋមន្ត្រីត្រូវបានតែងតាំងជាមួយនឹងគណៈរដ្ឋមន្ត្រីទាំងមូល ដោយព្រះរាជក្រឹត្យ។3
ក្រសួងអប់រំ យុវជន និងកីឡា មានបេសកកម្មគ្រប់គ្រង និងអភិវឌ្ឍវិស័យអប់រំ យុវជន និងកីឡា ដើម្បីឆ្លើយតបទៅនឹងតម្រូវការនៃការអភិវឌ្ឍខាងសេដ្ឋកិច្ច សង្គមកិច្ច និងវប្បធម៌ នៃប្រទេសកម្ពុជា។4 រាប់បញ្ចូលទៅក្នុងសមត្ថកិច្ច និងការទទួលខុសត្រូវរបស់ក្រសួង រួមមានការអភិវឌ្ឍធនធានមនុស្សនិងគុណភាពធនធានមនុស្ស តាមរយៈគោលនយោបាយ និង ផែនការសកម្មភាពជាតិ និងការកសាងច្បាប់ និងបទបញ្ជាក្នុងវិស័យពាក់ព័ន្ធ។5 ដើម្បីបំពេញភារកិច្ចនេះ ក្រសួងអប់រំ យុវជន និងកីឡា ត្រូវបានរៀងចំជាអគ្គនាយកដ្ឋានទៅតាមផ្នែកផ្សេងៗ និង គ្រិះស្ថានឧត្តមសិក្សារដ្ឋ ព្រមទាំង មន្ទីរអប់រំ យុវជន និងកីឡា នៅតាមបណ្តារាជធានី និងខេត្ត។6
សម្រាប់ព័ត៌មានបន្ថែមស្តីពី៖
- ប្រព័ន្ធអប់រំ ៖ កុមារតូចៗ បឋមសិក្សា ការអប់រំមធ្យមសិក្សាចំណេះទូទៅ ឧត្តមសិក្សា ការបណ្តុះបណ្តាលគ្រូ និងការអប់រំក្រៅប្រព័ន្ធ
- គោលនយោបាយ និងយុទ្ធសាស្ត្រ
- ស្ថិតិនិងសូចនាករអប់រំ
- គម្រោងផ្សេងៗ
- ច្បាប់ និងបទបញ្ជាពាក់ព័ន្ធ
ទំនាក់ទំនង:
- អាសយដ្ឋាន: អគារលេខ ៨០ មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
- អ៊ីម៉ែល: info@moeys.gov.kh / webmaster@moeys.gov.kh
- ទូរស័ព្ទ: (+៨៥៥) ២៣ ២១៩ ២៨៥
- ផែនទី:http://bit.ly/1IN5gQ3
បច្ចុប្បន្នភាពចុងក្រោយ ថ្ងៃទី១៤ ខែសីហា ឆ្នាំ២០១៥
ឯកសារយោង
- 1. ច្បាប់ស្តីពីការបង្កើតក្រសួងអប់រំ យុវជន និងកីឡា ប្រកាសឱ្យប្រើដោយព្រះរាជក្រមលេខ នស/រកម/០១៩៦/០១ ចុះថ្ងៃទី ២៤ ខែមករា ឆ្នាំ១៩៩៦។
- 2. អនុក្រឹត្យ លេខ៨៤ ស្តីពីការរៀបចំ និងការប្រព្រឹត្តទៅនៃក្រសួង អប់រំ យុវជន និងកីឡា ចុះថ្ងៃទី ០៩ ខែមិថុនា ឆ្នាំ២០០៩។
- 3. បច្ចុប្បន្ន រដ្ឋមន្ត្រី នៃក្រសួងអប់រំ យុវជន និងកីឡា គឺ ឯកឧត្តមបណ្ឌិត ហង់ ជួន ណារ៉ុន ។ ឯកឧត្តមរដ្ឋមន្ត្រី ត្រូវបានតែងតាំងដោយព្រះរាជក្រឹត្យលេខ នស/រកម/០៩១៣/៩០៣ ចុះថ្ងៃទី ២៤ ខែ កញ្ញា ឆ្នាំ២០១៣ ។
- 4. ដូចខាងដើម ត្រង់កំណត់លេខ២ អនុក្រឹត្យស្តីពីការរៀបចំ និងការប្រព្រឹត្តទៅនៃក្រសួង អប់រំ យុវជន និងកីឡា មាត្រា៤។
- 5. ដូចខាងដើម មាត្រា៥។
- 6. ដូចខាងដើម មាត្រា៦។
